Sut il presidi dal president da la cumissiun Ueli Bleiker ed en preschientscha da la scheffa dal departament cumpetent, cussegliera guvernativa Eveline Widmer-Schlumpf, ha la cumissiun per politica da stadi e strategia dal cussegl grond (CPSS) predeliberà la fatschenta voluminusa cun il titel "rapport final davart la prolungaziun da la fasa d'emprova e davart l'ulteriur andament da la refurma da l'administraziun GRiforma".
La cumissiun propona unanimamain al cussegl grond d'entrar en il project. La cumissiun suonda l'avis da la regenza e sustegna unanimamain la proposta d'introducir en etappas la nova gestiun publica tenor ils princips da GRiforma en tut l'administraziun chantunala. Tras la realisaziun ston singuls relaschs vegnir adattads correspundentamain (lescha davart il cussegl grond, urden da gestiun dal cussegl grond, lescha davart las finanzas e lescha dal persunal). Quests relaschs ha la cumissiun medemamain concludì unanimamain. La cumissiun è divergiada da la proposta da la regenza tar la dumonda da las variantas dal preventiv. Qua preferescha la cumissiun la varianta 2. Sch'il cussegl grond suonda la proposta da la cumissiun, vegn el a prender en l'avegnir las decisiuns dal preventiv global sin il stgalim da las gruppas da products e betg per il total dals saldos da las gruppas da products. In pass pli lunsch che la regenza fa la cumissiun cun represchentar l'idea che l'introducziun dals princips da GRiforma duai vegnir extendida er sin la dretgira chantunala e sin la dretgira administrativa.
Suenter ina tractativa detagliada ha la cumissiun deliberà unanimamain la missiva per mauns dal cussegl grond. Quel vegn a tractar la missiva en la sessiun d'october 2006.

Gremi: cumissiun per politica da stadi e strategia
Funtauna: rg cumissiun per politica da stadi e strategia