La cumissiun per politica da stadi e strategia dal cussegl grond ha tractà la missiva da la regenza tar il relasch d'ina "lescha davart ils salaris e davart la prevenziun professiunala da las commembras e dals commembers da las dretgiras chantunalas" e tar il relasch d'ina "lescha davart ils salaris e davart la prevenziun professiunala da las commembras e dals commembers da la regenza". La cumissiun che stat sut il presidi dad Ueli Bleiker propona unanimamain al cussegl grond d'entrar en il project. Er la cussegliera guvernativa Eveline Widmer-Schlumpf è stada preschenta a quella sesida.
Il motiv da quest project è sta d'ina vart da transferir las ordinaziuns vertentas en ina lescha sco ch'i vegn pretendì da la constituziun chantunala, e da l'autra vart il basegn d'agir cumprovà en cas da l'adattaziun da la prevenziun professiunala da las magistratas e dals magistrats (derschadras e derschaders sco er commembras e commembers da la regenza) a las pretensiuns ed a las relaziuns actualas.
La cumissiun è suandada las propostas da la regenza en praticamain tut ils puncts. Tar l'artitgel 5 da la lescha davart ils salaris e davart la prevenziun professiunala da las commembras e dals commembers da las dretgiras chantunalas vul ina minoritad da la cumissiun augmentar ils dabuns da spargn - ch'il chantun sto surpigliar il mument dal pensiunament - sin 60 pertschient. La maioritad da la cumissiun percunter suonda la missiva e vul laschar l'augment tar 25 pertschient.
La fin finala ha la cumissiun deliberà la missiva da la regenza per mauns dal cussegl grond che vegn a s'occupar da questa fatschenta en la sessiun d'october.

Gremi: cumissiun per politica da stadi e strategia
Funtauna: rg cumissiun per politica da stadi e strategia