Dapi tschient onns datti puspè capricorns en Svizra. Il chantun Grischun ha giugà ina rolla impurtanta en connex cun la recolonisaziun. Dals 12 fin ils 14 d'october 2006 festivescha el quest giubileum cun ina conferenza internaziunala davart il capricorn a Puntraschigna.

Avant 100 onns èn arrivads ils emprims trais capricorns da l'Italia en l'asil da selvaschina Pieder e Paul a S. Gagl. Els han furmà il tschep fundamental per il program d'allevament, cun il qual il capricorn ch'è vegnì extirpà tar nus gia il 17avel tschientaner ha puspè pudì vegnir repatrià. Il chantun Grischun ha giugà ina rolla zunt impurtanta en connex cun la recolonisaziun. Dals 12 fin ils 14 d'october 2006 festivescha el il giubileum cun ina conferenza internaziunala davart il capricorn. La conferenza è l'occurrenza academica dal program da giubileum naziunal e terminescha las festivitads uffizialas.
En il Grischun èn vegnidas fatgas las emprimas emprovas da recolonisar il capricorn gia ils onns 1879 fin 1889. Questas emprovas n'èn bain betg gartegiadas, han dentant permess da far las emprimas experientschas preziusas en il contact cun questa spezia d'animals ch'era da quel temp per gronda part nunenconuschenta. L'onn 1920 ha cumenzà la colonisaziun per propi da las muntognas grischunas, cur ch'ils capricorns da las staziuns d'allevament a S. Gagl ed ad Interlaken han pudì vegnir mess en libertad en l'Engiadin'ota. A l'Albris stevan ils animals spezialmain bain sut la tgira dal guardiaselvaschina Andrea Rauch. La populaziun è sa sviluppada svelt. In'ulteriura fasa impurtanta ha cumenzà, cur ch'ils plants dals selviculturs davart ils donns a Puntraschigna èn s'augmentads. Gia l'onn 1950 è sa fatga udir per l'emprima giada la pretensiun da prelevaziuns. Per cumbatter quai han ils guardiaselvaschina tschiffà capricorns cun traplas. Uschia n'èn betg mo vegnids mitigiads ils donns, mabain è er vegnida creada la premissa per l'ulteriura derasaziun dal capricorn en las Alps. Pertge ch'ils animals tschiffads èn numnadamain vegnids mess en libertad en autras regiuns dal chantun Grischun ed en las ulteriuras Alps ed han fundà là novas colonias. Suenter l'onn 1953, durant trenta onns, ha mo il Grischun sulet repatrià en questa moda 55 capricorns per onn.
En il fratemp datti puspè passa 13'000 capricorns en Svizra, da quels ca. 5'500 en il chantun Grischun. Tut ils territoris ch'èn favuraivels per els èn populads. Dapi l'onn 1977 poi puspè vegnir fatg chatscha sin els, e quai tenor in model ch'è vegnì sviluppà en il Grischun. Annualmain vegnan sajettads tranter 500 e 1'000 capricorns en Svizra. Las prelevaziuns ston dentant ademplir las prescripziuns severas da la confederaziun.
conferenza davart il capricorn, tel. 081 834 01 40

Gremi: uffizi da chatscha e pestga dal Grischun
Funtauna: rg uffizi da chatscha e pestga dal Grischun