Nagin scumond per las tratgas da giaglinom da tegnair al liber lur animals en il chantun Grischun; la surveglianza da la populaziun d'utschels selvadis resta

Per proteger il giaglinom indigen cunter la grippa d'utschels prenda la Svizra puspè mesiras da protecziun preventivas. A partir dals 15 d'october 2006 èsi scumandà da tegnair il giaglinom al liber en in conturn dad in kilometer enturn ils lais ed enturn ils flums pli gronds da la Bassa. Las tratgas da giaglinom en il chantun Grischun n'èn betg pertutgadas da quest scumond.

Perquai che las migraziuns d'enviern dals utschels cumenzan puspè, ston vegnir prendidas mesiras da protecziun preventivas per impedir che la grippa d'utschels vegnia importada d'utschels selvadis en ils effectivs da giaglinom indigens. L'enviern passà è la grippa d'utschels sa manifestada oravant tut tar utschels d'aua vi dals lais gronds. Sa basond sin questas enconuschientschas èsi scumandà a partir dals 15 d'october 2006 da tegnair il giaglinom al liber en in conturn dad in kilometer enturn ils lais ed enturn ils flums pli gronds da la Bassa. Las tratgas da giaglinom en il chantun Grischun n'èn betg pertutgadas da quest scumond.
Sco ulteriura mesira vegn cuntinuà cun la surveglianza dals utschels selvadis. Latiers tutga - ultra da la controlla d'utschels migrants - er l'examinaziun d'utschels selvadis che vegnan chattads morts. En il chantun Grischun po la populaziun annunziar utschels morts che vegnan chattads a la survegliadra locala u al survegliader local da chatscha e da pestga. Quellas e quels decidan al lieu davart l'ulteriur proceder tenor las directivas da l'uffizi per la segirezza da victualias e per la sanadad d'animals dal Grischun e procuran per las examinaziuns necessarias.
L'obligaziun che tratgas da giaglinom ston vegnir registradas resta dentant vinavant. Possessuras e possessurs da giaglinom che n'èn anc betg registrads, s'annunzian en quest connex tar l'uffizi per la segirezza da victualias e per la sanadad d'animals dal Grischun. Las annunzias pon vegnir fatgas durant las uras da biro tant per telefon (081 257 24 15) sco er en moda electronica per mail (info@alt.gr.ch). Las proprietarias ed ils proprietaris da giaglinom ston inditgar l'adressa, il gener da la tratga da giaglinom, la spezia da giaglina ed il dumber dals animals che vegnan tratgs.

Gremi: uffizi per la segirezza da victualias e per la sanadad d'animals dal Grischun
Funtauna: rg uffizi per la segirezza da victualias e per la sanadad d'animals dal Grischun