La regenza grischuna refusa ina reducziun da las contribuziuns federalas als servetschs d'avaria sin las vias naziunalas. Quai declera la regenza en sia resposta da consultaziun pertutgant il rapport davart la nova regulaziun per indemnisar finanzialmain ils servetschs d'avaria sin las vias naziunalas. Cun la nova concepziun da la gulivaziun da finanzas e da las incumbensas tranter la confederaziun ed ils chantuns (NGF) daventa la confederaziun la suletta responsabla per las vias naziunalas. Ils servetschs d'avaria, sco per exempel ils pumpiers, la dustanza d'ieli, la guardia da chemia, e la dustanza cunter radiaziuns, restan dentant en la cumpetenza dals chantuns. Il rapport da la confederaziun ha - tenor ils novs princips da la NGF - l'intent da simplifitgar la finanziaziun e da la concepir a moda pli efficazia.
Il chantun Grischun sustegna actualmain otg basas sin las vias naziunalas, ina basa da guardia da chemia e duas basas da dustanza d'ieli e da chemia sin las vias naziunalas A13 ed A28. Plinavant posseda l'uffizi chantunal da construcziun bassa in portal da pumpiers per il tunnel dal San Bernardino. A l'avis da la regenza ha la confederaziun l'intenziun da realisar ina "mesira da spargn" cun questa nova regulaziun d'indemnisaziun ch'ella propona. Las contribuziuns federalas da fin ussa da 14.6 milliuns francs duain numnadamain vegnir reducidas sin 12.2 milliuns francs. Quests meds na dastgassan dentant, a l'avis da la regenza, mai vegnir reducids. Uschiglio saja la lavur constructiva ch'è vegnida prestada sur onns tar ils servetschs d'avaria periclitada vastamain. Tar ils purtaders da las basas provocass ina reducziun senza dubi ponderaziuns fundamentalas areguard ils custs per la segirezza dal traffic sin las vias naziunalas.

Il concept da la confederaziun per plazzas d'atterrament da muntogna chatta acceptanza
La regenza grischuna è da princip d'accord cun il concept da la confederaziun per plazzas d'atterrament da muntogna. Ch'il concept resguardia essenzialmain ils cuntegns dal plan directiv grischun 2000, scriva la regenza en sia consultaziun tar il plan secturial "infrastructura da l'aviatica", part plazzas d'atterrament da muntogna.
En il Grischun existan oz otg plazzas d'atterrament da muntogna ed in'ulteriura plazza sa chatta sin il territori dal glatscher dal Vorab mo gist da l'autra vart dal cunfin chantunal sin il territori dal chantun Glaruna. Il chantun da muntogna e da turissem è, a l'avis da la regenza, dependent d'ina infrastructura d'aviatica bain equipada. Las plazzas d'atterrament da muntogna servan en emprima lingia ad intents da scolaziun e d'exercizi e pir en segunda lingia ad intents commerzials sco per exempel al heliskiing. Per cumplettar la rait existenta pretenda la regenza d'integrar en il concept opziuns per ina plazza d'atterrament da muntogna en il circul da Tavau sco er per cumpettaziuns punctualas al sid da las Alps, en las Vals Mesauc e Calanca.

Ils projects da votaziun dals 26 da november 2006 èn fixads
La regenza grischuna ha prendì enconuschientscha dal fatg che dumengia ils 26 da november 2006, vegnan suttamess a la votaziun dal pievel sco projects federals la lescha federala dals 24 da mars 2006 davart la collavuraziun cun ils stadis da l'Europa da l'ost e la lescha federala dals 24 da mars 2006 davart ils supplements da famiglia (lescha davart ils supplements da famiglia). Dumengia, ils 26 da november 2006 vegni votà plinavant davart la revisiun parziala da la constituziun chantunala (art. 21 al. 1 e 3, art. 51 a ed art. 55 al. 2; refurma da la giustia) sco project chantunal.

L'iniziativa dal pievel "Cussegl grond: 80 bastan" è reussida
La regenza ha controllà las suttascripziuns da l'iniziativa dal pievel "Cussegl grond: 80 bastan" ch'èn vegnidas inoltradas ils 25 da settember 2006. Ella ha constatà che l'iniziativa è reussida cun 4'163 suttascripziuns valaivlas.

La regenza beneventa la refurma da structura tar la prevenziun professiunala
La refurma da structura che la confederaziun propona per la prevenziun professiunala vegn beneventada da la regenza grischuna. Che las cundiziuns da basa giuridicas ed economicas che daventan pli e pli cumplexas hajan adina puspè augmentà las pretensiuns visavi ina surveglianza efficazia en la prevenziun professiunala, scriva la regenza en sia resposta a la confederaziun tar la consultaziun davart la refurma da structura. La refurma ha la finamira da rinforzar la surveglianza directa dal sectur da la LPP tras regiunalisaziuns. Ultra da quai duai vegnir creada ina cumissiun da surveglianza suprema. La finala prevesa la refurma d'introducir mesiras per facilitar che lavurantas e lavurants pli vegls restian en il martgà da lavur.
La via previsa vers ina regiunalisaziun e vers in rinforz da la surveglianza directa tras ils chantuns sto vegnir sustegnida cleramain, a l'avis da la regenza. Ch'il chantun Grischun sa chattia sin la via dal project. La sessiun d'avust ha il cussegl grond acceptà la participaziun dal chantun al concordat da la surveglianza da la LPP da la Svizra da l'ost per il 1. da schaner 2008. Tenor l'opiniun da la regenza ston vegnir sustegnidas er las stentas per ina surveglianza suprema pli intensiva sin plaun federal. D'ina autoritad da surveglianza suprema cumpetenta e che reagescha svelt resulta in sistem omogen che satisfa a las pretensiuns.

Il post da stab per dumondas d'egualitad sa cloma da nov "post da stab per l'egualitad da las schanzas"
Il post da stab per dumondas d'egualitad dal chantun Grischun mida num per il 1. da schaner 2007 en "post da stab per l'egualitad da las schanzas". L'applicaziun da la noziun "egualitad da las schanzas" en connex cun "dumondas d'egualitad" è ina precisaziun dal cuntegn da la lavur d'egualitad. A la regenza para perquai la midada da num raschunaivla e giustifitgada.

Da vischnancas e da regiuns
- Claustra-Serneus: Il project singul "Malauras 2005 Claustra", part reparaziun dals stabiliments d'avertura, da la vischnanca da Claustra-Serneus vegn approvà. Als custs cun dretg da subvenziun da 2'641'000 francs vegn garantida ina contribuziun chantunala da 19 pertschient u da maximalmain 501'790 francs.
- Lüen: La revisiun parziala da la constituziun communala da la vischnanca da Lüen, concludida da la radunanza communala il 1. da december 2005, vegn approvada.
- Maladers: La midada da la constituziun communala da la vischnanca da Maladers, concludida da la radunanza communala ils 27 da zercladur 2006, vegn approvada.
- Tschlin: Ils statuts da la vischnanca burgaisa da Tschlin dals 15 da december 2005 vegnan approvads.
- Favugn: La revisiun parziala dals statuts, ch'è vegnida concludida da la radunanza da la vischnanca burgaisa da Favugn ils 4 da matg 2006, vegn approvada.
- Wiesen: La revisiun parziala da la lescha davart las taxas da cura da la vischnanca da Wiesen dals 10 da favrer 2006 vegn approvada.
- Laax: A Laax vegn fixada la sveltezza maximala sin 30 km/h per differentas vias communalas resp. chantunalas ed i vegnan introducidas duas "zonas da tempo 30".

Contribuziuns chantunalas a differentas instituziuns
- Promoziun da la cultura: La regenza grischuna ha concedì contribuziuns da totalmain 144'500 francs per promover 16 occurrenzas ed ovras culturalas.
- Uniun da las ludotecas dal Grischun: Per l'onn da gestiun 2006 survegn l'uniun da las ludotecas dal Grischun ina contribuziun da sustegn da 20'000 francs.
- Fundaziun svizra "acziuns en favur da l'ambient": La fundaziun svizra "acziuns en favur da l'ambient" che celebrescha l'onn 2006 ses giubileum da 30 onns e che ha furnì durant quest temp circa in terz da sias prestaziuns en il chantun Grischun survegn ina contribuziun da 20'000 francs.
- Inventari digital d'eveniments e da maletgs da privels da la natira en il Grischun: Il project "inventari digital d'eveniments e da maletgs da privels da la natira en il Grischun" vegn sustegnì cun ina contribuziun unica da 10'000 francs.
- Uniun dal persunal chantunal grischun: A l'uniun dal persunal chantunal grischun vegn empermessa ina contribuziun unica da 10'000 francs per las activitads da giubileum e per la festa dals 4 da matg 2007 a Domat a chaschun dal giubileum da 100 onns.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun