Las emprimas lavurs da construcziun en il rom da las investiziuns preliminaras da la Porta Alpina han cumenzà. Il culp da partenza è vegnì dà glindesdi, ils 23 d'october 2006, tras l'emprima siglientada. Las lavurs da construcziun ch'èn vegnidas concludidas da la confederaziun, dal chantun Grischun e da l'AlpTransit Gottard SA vegnan exequidas da la cuminanza da lavur TRANSCO. La TRANSCO è gia incumbensada al lieu cun la construcziun da l'etappa dal tunnel da basa dal Gottard a Sedrun. Las lavurs da construcziun cumpiglian l'exchavaziun da quatter grondas hallas da spetga sin il nivel dal tunnel. Questas lavurs vegnan fatgas ussa, per ch'i na dettia pli tard nagins impediments, retards e custs supplementars per las lavurs da construcziun dal tunnel da basa dal Gottard.

Il project da la Porta Alpina prevesa da nizzegiar sco fermada il post multifuncziunal da Sedrun ch'è planisà en il tunnel da basa dal Gottard. Da là davent duain las passagieras ed ils passagiers cuntanscher - tras galarias e tras in ascensur - il vitg da Sedrun ch'è situà 800 meters pli ad aut sco er la regiun dal Gottard. Grazia a la meglra cuntanschibladad spetgan ins ch'il svilup economic-turistic da questa regiun vegnia rinforzà.

La cuminanza da lavur TRANSCO fa las lavurs da construcziun per quatter hallas da spetga
La fin d'avust 2006 han la confederaziun, il chantun Grischun e l'AlpTransit Gottard SA dà il culp da partenza definitiv a las lavurs da construcziun per las investiziuns preliminaras da la Porta Alpina ed han suttascrit ina cunvegna correspundenta per questa emprima fasa. Ussa han cumenzà las emprimas lavurs da construcziun. Cun in act da siglientada per la halla da spetga al nord ha gì lieu glindesdi, ils 23 d'october 2006, en il tunnel la "festa iniziala per la Porta Alpina". Il culp da partenza ha gì lieu en preschientscha da cusseglier guvernativ Stefan Engler, schef dal departament da construcziun, traffic e selvicultura dal Grischun, da Pancrazi Berther, president communal da Tujetsch, da Luzi Gruber, CEO da la TRANSCO, sco er dad Alfred Seiler, schefdirectur da construcziun da l'AlpTransit Gottard SA.
Las lavurs da construcziun vegnan exequidas da la cuminanza da lavur TRANSCO ch'è gia incumbensada al lieu cun la construcziun da l'etappa dal tunnel da basa dal Gottard a Sedrun. Las lavurs da construcziun cumpiglian l'exchavaziun da las quatter grondas hallas da spetga sin il nivel dal tunnel. Questas hallas da spetga porschan plazza a mintgamai 240 persunas. Duas hallas sa chattan al nord en il tunnel da l'ost e duas al sid en il tunnel dal vest. Ellas han ina lunghezza da 38 meters, ina ladezza da ca. 10 meters ed in'autezza da 5,5 meters.

Premissa impurtanta per ina realisaziun posteriura
Questas investiziuns preliminaras èn ina premissa impurtanta per pudair realisar pli tard la staziun sutterrana da la Porta Alpina. Las lavurs èn vegnidas surdadas sco incarica supplementara da l'etappa da construcziun dal tunnel a Sedrun per in pretsch global da 12,6 milliuns francs (basa da pretsch: contract d'execuziun da lavurs da l'onn 2001). Sch'i vegn calculà cun pretschs actuals, importa l'incarica da construcziun - inclusiv las reservas, la chareschia e la taglia sin la plivalur - 15,8 milliuns francs.
Tras las investiziuns preliminaras vegni garantì che la Porta Alpina possia vegnir realisada pli tard cun custs raschunaivels. Las lavurs da stgavament ston vegnir fatgas ussa ed èn coordinadas cun il program da construcziun dal tunnel da basa dal Gottard, per ch'i na dettia pli tard, cur ch'il tunnel vegn mess en funcziun, nagins impediments nunnecessaris.
En la sessiun d'enviern 2005 han las chombras federalas concedì ina contribuziun federala da 50 pertschient, dentant da maximalmain 7,5 milliuns francs, als custs per questas investiziuns preliminaras. Ils ulteriurs 50 pertschient vegnan pajads dal chantun Grischun, da la regiun Surselva e da la vischnanca da Tujetsch sco vischnanca da staziunament.

La realisabladad è vegnida confermada
Per las ulteriuras lavurs ha il chantun Grischun inoltrà il cumenzament d'october a l'uffizi federal da traffic la dumonda per far la procedura d'approvaziun dal plan per las investiziuns principalas (project d'exposiziun 2). La dumonda dal project d'exposiziun 2 cumpiglia l'entir stabiliment da la Porta Alpina Sedrun e concerna mo las mesiras architectonicas e tecnicas en il sectur da las fermadas (ur dals perruns) en il tunnel da basa dal Gottard fin a l'avantzona dal portal Las Rueras. La dumonda da concessiun per metter en funcziun la Porta Alpina e la dumonda per l'avertura sur terra vegnan inoltradas pli tard en ina procedura posteriura.
La procedura d'approvaziun dal plan ch'è vegnida introducida conferma il cuntegn dals studis da realisabladad, numnadamain ch'il manaschi dal tunnel da basa dal Gottard saja cumpatibel cun la fermada da la Porta Alpina. Cun las gestiunarias dal tunnel da basa dal Gottard sto vegnir tschertgà en in proxim pass da coordinar ils manaschis - inclusiv ils uraris - uschia, ch'els cumpletteschan in l'auter.

Gremi: departament da construcziun, traffic e selvicultura dal Grischun
Funtauna: rg departament da construcziun, traffic e selvicultura dal Grischun