Ils edifizis da la scola auta da pedagogia dal Grischun a Cuira (SAPGR) duain vegnir engrondids. I duain vegnir construids dus novs auditoris per mintgamai 80 fin 100 studentas e students sco er ina mediateca. A medem temp duai vegnir sanà l'implant da sport al liber. La regenza grischuna ha approvà il program da construcziun correspundent. I vegn fatg quint cun custs da construcziun da 4.7 milliuns francs. Per ils edifizis supplementars duai vegnir publitgada ina concurrenza da planisaziun. Suenter vegn suttamessa ina missiva da construcziun al cussegl grond. Quel vegn probablamain a decider il december 2007 davart il project.
Actualmain ha la scola auta da pedagogia dal Grischun circa 250 studentas e students. Per onn da studi èn ils dumbers sa stabilisads sin in nivel da mintgamai 85 studentas e students. Igl è necessari da construir ils novs auditoris, per che la SAPGR possia satisfar als basegns d'ina scola auta. Tras la construcziun da quests dus auditoris pon vegnir spetgads respargns tar ils custs da gestiun. Ils locals existents n'èn betg adattads per vegnir duvrads per in auter intent. A medem temp duai la construcziun provisorica da la mediateca vegnir integrada en il nov project da construcziun. Plinavant duain vegnir sanads ils implants da sport al liber che sa chattan en in stadi manglus.
Sch'i vegniss desistì da questas mesiras architectonicas, vegniss Cuira mess en dumonda a vista mesauna fin a lunga vista sco lieu da scolaziun. En l'interess dal chantun pretenda la trilinguitad da la scolaziun da las persunas d'instrucziun ch'il Grischun vegnia mantegnì sco lieu da scolaziun.

Il Grischun sustegna la plattafurma agrara per commerzialisar products d'alp e da muntogna
La regenza grischuna ha concludì da sustegnair il project "plattafurma agrara Grischun, Glaruna, Uri". Per sias activitads per commerzialisar products d'alp e da muntogna vegn l'uniun cun il num "project surregiunal per commerzialisar ils products d'alp e da muntogna" sustegnida cun ina contribuziun da 1'075'000 francs, e quai repartì sin ils onns 2007 fin 2011.
La plattafurma agrara vegn purtada da federaziuns professiunalas e da federaziuns da branschas sco er d'interpresas da l'agricultura, dal mastergn, da l'industria e dal commerzi, dal turissem e da las prestaziuns da servetsch, plinavant d'instituziuns publicas e d'autras corporaziuns da dretg public dals chantuns Grischun, Glaruna ed Uri. La finamira principala è quella da segirar e d'augmentar la valur agiuntada regiunala en ils territoris da muntogna. A partir dal schaner 2007 vegn endrizzà in post da gestiun. Tar las prestaziuns da servetsch da la plattafurma agrara tutgan in post da consultaziun e da coordinaziun per promover la vendita sco er ina plattafurma da commerzialisaziun per avrir e per rinforzar chanals da vendita existents en Svizra ed a l'exteriur.

La regenza refusa la petiziun per proteger la val Urden e la val Farur
La regenza grischuna refusa la petiziun per proteger la val Urden e la val Farur. Questa petiziun era vegnida lantschada da la PS dal circul da Churwalden e suttascritta da ca. 4000 persunas. En la petiziun vegn la regenza supplitgada d'adattar il plan directiv chantunal (PDChant) uschia, ch'ina colliaziun dals territoris da skis da Lai, d'Arosa e da Tschiertschen na fiss betg pli pussaivla. Sco che la regenza menziunescha en sia resposta, è la colliaziun dals territoris da skis ina part integrala dal PDChant ch'era vegnì concludì il november 2002 da la regenza ed approvà il settember 2003 dal cussegl federal. Avant che integrar quest project en il plan directiv chantunal han gì lieu vastas lavurs da basa ed ina consideraziun cumplessiva dals interess e dals giavischs ch'èn pertutgads.
La regenza menziunescha che la situaziun dals fatgs e dal dretg n'è betg sa midada dapi ch'il plan directiv chantunal è vegnì relaschà areguard la colliaziun dals territoris da skis en dumonda. Tar tut il respect da l'instrument da la petiziun n'haja la regenza perquai betg il dretg d'adattar gia suenter stgars trais onns il plan directiv en il senn da las petiziunarias e dals petiziunaris. La regenza garantescha dentant ch'ella vegnia a sa stentar en il rom da sias cumpetenzas d'optimar il project uschenavant sco pussaivel a chaschun dal proxim svilup dal plan directiv, e quai betg sco ultim er sut l'aspect da la protecziun da la cuntrada e da la natira.

La regenza beneventa ils plans per introducir la carta da persunas assicuradas
La regenza grischuna beneventa ils plans da la confederaziun per introducir la carta da persunas assicuradas tar l'assicuranza obligatorica per la tgira da malsauns. Sco che la regenza menziunescha en sia resposta da consultaziun a la confederaziun, sustegna ella da princip la revisiun parziala da l'ordinaziun davart l'assicuranza da malsauns sco er da l'ordinaziun davart la carta da persunas assicuradas tar l'assicuranza obligatorica per la tgira da malsauns. Beneventà vegn cunzunt che la confederaziun sa fida d'ina tecnologia prospectiva e ch'ella vuless utilisar in microprocessur per la carta da persunas assicuradas. Quai pussibiliteschia da duvrar la carta sco carta da sanadad en in'emprova da model chantunala u interchantunala. Dal puntg da vista da la regenza hai dentant mo in senn d'integrar datas persunalas sin la carta da persunas assicuradas, sche la persuna assicurada ha la pussaivladad d'incumbensar las furnituras ed ils furniturs da prestaziuns da far quai. Mo uschia cuntegnia la carta da persunas assicuradas ina seria cumpletta da las datas persunalas che portia er in niz a las persunas medicinalas ch'èn responsablas per l'ulteriur tractament.

La regenza è d'accord cun la lescha federala davart ils rapiments internaziunals d'uffants
La regenza grischuna è da princip d'accord cun il sboz per ina lescha federala davart ils rapiments internaziunals d'uffants e davart las convenziuns da Den Haag per la protecziun dals uffants e da las persunas creschidas. La lescha federala cuntegna cunzunt disposiziuns per realisar la convenziun da Den Haag davart ils aspects civils dal rapiment internaziunal d'uffants sco er la convenziun europeica davart la renconuschientscha e l'execuziun da decisiuns areguard il dretg da tgira dals uffants e davart il restabiliment dal dretg da tgira.
Las autoritads respectivas en il Grischun sajan confruntadas fitg darar cun la problematica da rapiments internaziunals davent da l'exteriur en il chantun, remartga la regenza en sia resposta da consultaziun. Pervia da quai na vegnia betg ad esser pussaivel ch'ellas disponian da las enconuschientschas professiunalas necessarias per pudair garantir ch'in rapiment internaziunal d'in uffant vegnia liquidà svelt ed en moda irreproschabla. Perquai stoppia vegnir garantì liantamain che l'autoritad centrala da la confederaziun cusseglia cumplessivamain e sustegnia professiunalmain las autoritads chantunalas e communalas.

Repartì la dieschma d'alcohol 2005
La regenza grischuna ha repartì la dieschma d'alcohol en l'autezza da 637'575 francs per l'onn da gestiun 2005. Quests daners vegnan duvrads per projects da prevenziun, per custs da tractament sco er per projects da perscrutaziun e da furmaziun. Tenor la lescha federala davart las bavrondas destilladas sto la quota dals chantuns dal retgav net da l'administraziun federala d'alcohol vegnir duvrada per cumbatter l'alcoholissem en ses motivs ed en sias consequenzas sco er per cumbatter l'abus da drogas, da narcotics e da medicaments.

Da vischnancas e da regiuns
- Furna: La regenza ha approvà la revisiun parziala da la planisaziun locala da la vischnanca da Furna ch'era vegnida concludida ils 7 d'avrigl 2006 (plan da zonas 1:2'000, zona per il diever da sport e da temp liber tar il lai d'accumulaziun).

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun