Ina delegaziun da l'Allgäu visita il Grischun gievgia, ils 9 da
november 2006. Manada vegn ella da l'associaziun da las presidentas e
dals presidents da la citad sco er da l'uffizi d'agricultura e da
selvicultura a Kempten. Tar la delegaziun da 67 persunas tutgan
commembras e commembers dals gremis da decisiun da las quatter gruppas
d'acziun LEADER da l'Allgäu, represchentantas e represchentants dals
districts e da las citads independentas, represchentantas e
represchentants da l'uniun turistica Allgäu/Bayerisch-Schwaben,
represchentantas e represchentants da la "iniziativa Allgäu", da la
chombra d'industria e da commerzi sco er insaquantas represchentantas ed
insaquants represchentants da las medias. Questa delegaziun vegn
beneventada da cusseglier guvernativ Hansjörg Trachsel, schef dal
departament da l'intern e da l'economia publica. Suenter il bainvegni
dals giasts al Plantahof a Landquart han lieu l'avantmezdi differents
referats davart il concept directiv per l'economia 2010, davart il
svilup regiunal, davart las structuras turisticas, davart la planisaziun
directiva, davart la marca "Grischun", davart la laina e davart
l'agricultura. Il suentermezdi visita la delegaziun - en il rom d'in tur
da manaschi - il e-tower a Cuira.
En l'Allgäu vegn preparada l'ulteriura concepziun dals concepts che
concernan il svilup regiunal da la proxima perioda da promoziun a partir
da l'onn 2007. Perquai vuless la delegaziun da l'Allgäu survegnir impuls
dal vischin svizzer. Per la delegaziun da l'Allgäu è la direcziun
strategica dal concept directiv per l'economia 2010 da grond interess
sco er il concept ch'è drizzà vers ina persistenza, perquai ch'el duai
manar davent d'in agir che s'orientescha vi da las periodas da
legislatura. Er en l'Allgäu vegn reflectà davart ina marca cuminaivla.
La promoziun da l'aviez è gia ussa in project che ha in bun success per
la valur agiuntada da la regiun. La realisaziun d'in marketing dal
turissem cuminaivel e la creaziun da structuras turisticas cuminaivlas
stattan sisum la glista da prioritads da quels da l'Allgäu. Cun grond
interess vegnan en quest connex persequitads il svilup da la marca
"Grischun" sco er il svilup regiunal en il chantun Grischun.
Gremi: uffizi per economia e turissem
Funtauna: rg uffizi per economia e turissem