Navigation

Inhaltsbereich

  • Erste Mitteilung
  • Neuen Beitrag einfügen
Il center per prevenziun e promoziun da la sanadad ZEPRA a Cuira extenda sia purschida. Da nov vegn engrondida la purschida en ils secturs da las vischnancas e da las scolas. La finamira è da sustegnair las vischnancas tar la realisaziun da structuras professiunalas e da rinforzar la promoziun da la sanadad e da la prevenziun.

La lescha da sanadad che la regenza ha mess en vigur per il 1. d'avrigl 2006 creescha la basa legala per surdar singulas incumbensas en il sectur da la prevenziun e da la promoziun da la sanadad al post spezialisà ZEPRA e per cuntinuar la collavuraziun interchantunala cun il deparatament da sanadad dal chantun da Son Gagl. Il contract da collavuraziun correspundent è vegnì approvà da la regenza dal chantun Grischun il cumenzament d'avust. Quest contract circumscriva las prestaziuns che ston vegnir furnidas center per prevenziun e promoziun da la sanadad (ZEPRA) sco er sia indemnisaziun tras il chantun Grischun e cuntegna da nov ina purschida per vischnancas e per scolas. La finamira è da sustegnair las vischnancas da realisar structuras professiunalas e d'intensivar la promoziun persistenta da la sanadad e la prevenziun.
Sco consequenza da las novaziuns en la lescha da sanadad è vegnida relaschada er in'ordinaziun tar la lescha da sanadad. L'ordinaziun regla tranter auter la promoziun da la sanadad e la prevenziun tras l'uffizi da sanadad, tras l'uffizi per la scola populara ed il sport sco er tras las vischnancas. Per pussibilitar ina collavuraziun persistenta tranter ils posts chantunals e las vischnancas determineschan las autoritads communalas e las autoritads da scola da nov persunas da contact cumpetentas (incumbensadas ed incumbensads per la promoziun da la sanadad e per la prevenziun, IPS). Questas persunas da contact lavuran cun il ZEPRA - ch'è incumbensà dal chantun - sco er cun auters partenaris e communitgeschan ils interess da la promoziun da la sanadad e da la prevenziun sin plaun communal ed en la scola.
L'extensiun dal ZEPRA per 200 pertschient da plazzas cun purschidas per las vischnancas e per las scolas ha gì per consequenza ch'ins ha stuì far midada en localitads pli grondas. Il post spezialisà sa chatta dapi il fanadur en la Tittwiesenstrasse 27, en vischinanza da la staziun da Cuira. Gaudenz Bavier e Stanislaw Henny lavuran da nov sco cussegliaders da project e Daniel Volken lavura da nov en l'administraziun.

La promoziun da la sanadad è ina chaussa communabla - la vischnanca il lieu ideal
La vischnanca è in spazi, nua ch'igl èn avant maun u nua ch'i vegnan stgaffidas cundiziuns generalas che pon influenzar la sanadad e la qualitad da viver. Las fermezzas, las resursas, las particularitads geograficas e culturalas ed ils basegns da la populaziun pon ins enconuscher e registrar il meglier sin plaun local. Cun las persunas da contact per la promoziun da la sanadad e per la prevenziun po vegnir introducì e stabilì in process da participaziun ch'è adattà als basegns locals e che ha l'intenziun da mantegnair e da meglierar la sanadad en la vischnanca. ZEPRA vul lantschar e realisar acziuns e projects en la vischnanca per e cun las abitantas ed ils abitants, las purtadras ed ils purtaders da decisiuns, las autoritads e l'administraziun. Lur ideas per l'avegnir, lur giavischs e lur propostas vegnan preschentadas e sviluppadas per augmentar directamain l'attractivitad dal spazi da viver.

Modul da scola: Concepir la scola sco lieu d'emprender e da lavurar che promova la sanadad
Cun ina prevenziun e cun ina promoziun da la sanadad extendida vuless il ZEPRA intermediar ina chapientscha integrativ-cumplessiva da la sanadad e trair a niz la promoziun da la sanadad sco basa d'ina furmaziun consequenta da l'instrucziun e da la scola sco spazi da viver. Il concept da la prevenziun e da la promoziun da la sanadad metta en il center la scola sco lieu da lavur e sco spazi da viver. La promoziun da la sanada ha perquai en mira in manaschi ed in svilup da l'atgna scola ch'è orientà al process. Sut quest aspect n'è la promoziun da la sandad betg ina incumbensa supplementara, mabain ella vul sa confruntar cun las cundiziuns existentas e tschertgar e chattar communablamain soluziuns per dumagnar incumbensas dal mintgadi en la scolai sco spazi da viver.

Gremi: center per prevenziun e promoziun da la sanadad ZEPRA
Funtauna: rg center per prevenziun e promoziun da la sanadad ZEPRA
Neuer Artikel