Navigation

Inhaltsbereich

  • Erste Mitteilung
  • Neuen Beitrag einfügen
La cumissiun dal cussegl grond per giustia e segirezza ha tractà la missiva da la regenza concernent la revisiun totala da la lescha davart la responsabladad da las autoritads, dals funcziunaris e da las corporaziuns da dretg public. La cumissiun che stat sut il presidi da Christian Rathgeb propona al cussegl grond d'entrar en il project. Er la cussegliera guvernativa Eveline Widmer-Schlumpf è stada preschenta a quella sesida.
Il motiv per la revisiun totala è il fatg che la lescha vertenta davart la responsabladad da las autoritads, dals funcziunaris e da las corporaziuns da dretg public, ch'è concepida sco responsabladad per la culpabilitad, na correspunda betg pli a la nova constituziun chantunala. La constituziun chantunala ch'è en vigur dapi il 1. da schaner 2004 circumscriva la responsabladad da la communitad sco ina responsabladad ch'è independenta da la culpa en il senn d'ina responsabladad causala. Er la differenziaziun da la dimensiun da la responsabladad tut tenor da tge instituziun publica respectivamain da tge autoritad u da tge uffiziantas respectivamain da tge uffiziants d'ina communitad ch'il donn vegn chaschunà è vegnida resguardada sco antiquada. In ulteriur punct impurtant da la revisiun è la midada da la dretgira chantunala a la dretgira administrativa tar la cumpetenza giudiziala per giuditgar dretgs che resultan da la lescha davart la responsabladad dal stadi.
Suenter avair examinà detagliadamain il project ha la cumissiun suandà las propostas da la regenza e las ha deliberadas unanimamain en il senn da la regenza per mauns dal cussegl grond. En la sessiun da december vegn quel ad avair l'occasiun da tractar questa fatschenta.

Gremi: cumissiun per giustia e segirezza
Funtauna: rg cumissiun per giustia e segirezza
Neuer Artikel