Dudesch festivals da cultura e museums excellents dal Grischun sa preschentan en l'avegnir communablamain sut il label "grischunCULTURA". Tras quai vulan els d'ina vart render attent - tant en Svizra tudestga sco er en ils pajais vischins - in public che s'interessa per la cultura als festivals ed als museums ch'èn mo pauc enconuschents sur las regiuns or, e da l'autra vart gudagnar giasts per il Grischun.

GrischunCULTURA sa preschenta entaifer la marca "grischun" e la cumplettescha per in sectur impurtant. I vegn intermediada la missiva ch'il Grischun dispona - ultra d'ina cuntrada alpina unica e d'ina infrastructura turistica excellenta - er d'ina purschida culturala attractiva cun bleras fassettas. Uschia duai il maletg dal Grischun vegnir rinforzà a lunga vista. La tscherna da las instituziuns partenarias è vegnida reducida sapientivamain, cunquai ch'i vegnan en dumonda mo instituziuns culturalas cun ina purschida da fitg buna qualitad che han - saja quai grazia al tema, ad impuls innovativs, a nischas ch'èn anc pauc occupadas u a lieus da preschentaziun attractivs - qualitads da vendita exclusiva. Plinavant sa tracti da quels festivals e da quels museums che han il potenzial d'attracziun surregiunal il pli grond e che han tras quai ina relevanza per la marca.

Las represchentantas ed ils represchentants da las dudesch instituziuns - nov festivals e trais museums resp. chasas d'exposiziun - èn sa scuntrads dacurt a Grüsch cun represchentantas e cun represchentants da l'uffizi da cultura e da la marca "grischun" per barattar opiniuns e per discutar las mesiras da communicaziun che vegnan prendidas en mira. L'uniun lucca stat sut il motto "communablamain essan nus pli ferms". Igl è numnadamain difficil per las instituziuns partenarias sulettas da survegnir ina preschientscha en las medias u er tar il public en mira ordaifer il chantun Grischun. Tar las instituziuns partenarias da grischunCULTURA tutgan ils festivals da musica "Flims Klang" e "Davos Festival", il festival cultural Origen, il "Ope(r)n Air" ad Arosa, il festival da musica "Snow and Symphony", l'opera dal chastè da Haldenstein sco er il festival "Uncool" a Puschlav. Participads èn plinavant il teater da Cuira cun ses festival "Churer Herbst", il festival d'umor ad Arosa, il museum d'art dal Grischun a Cuira, il museum da Segantini a San Murezzan sco er la "chasa melna" a Flem.

Sco emprim med da communicaziun vegn preparada ina broschura che purtretescha ils dudesch festivals e museums, che porscha dentant er spazi ad autras occurrenzas culturalas sco infurmaziuns davart in'architectura nova ed excellenta en il Grischun u sco la plattafurma d'internet http://www.grischuncultura.ch. La broschura cumpara quest enviern per render attent ina gruppa impurtanta - ils giasts d'enviern en il Grischun - a las purschidas attractivas da stad. La broschura vegn exponida en ils biros da turissem, en hotels ed als lieus d'occurrenza da las instituziuns partenarias. La gruppa principala da las persunas ch'èn interessadas a la cultura en Svizra tudestga ed en ils pajais vischins duai dentant vegnir pledentada en emprima lingia en sia regiun d'origin, uschia per exempel en teaters, en salas da concert ed en museums. Per esser preschent en quels lieus revegn ins a la vasta rait da las persunas ch'èn responsablas per ils festivals e per ils museums. La broschura vegn ultra da quai distribuida sur ils chanals da Grischun vacanzas. En collavuraziun cun las organisaziuns da tetg dal turissem grischun èsi previs da sa participar als inserats da pliras paginas successivas en la pressa svizra da la dumengia. Per infurmaziuns actualas duai ultra da quai vegnir nizzegià l'internet en moda intensiva.

Gremi: uffizi da cultura
Funtauna: rg uffizi da cultura