La cumissiun dal cussegl grond per giustia e segirezza ha tractà la missiva da la regenza concernent l'adattaziun dal dretg chantunal a la lescha federala davart il partenadi registrà da pèrs da la medema schlattaina. La cumissiun ch'è vegnida manada per questa fatschenta da vicepresident Ernst Sax propona al cussegl grond d'entrar en il project.
A partir dal 1. da schaner 2007 vegnan pèrs da la medema schlattaina ad avair la pussaivladad da laschar registrar lur partenadi en il register dal stadi civil. Tar quest project sa tracti unicamain da realisar il dretg federal sin plaun chantunal. Correspudentamain cumpiglia il project l'adattaziun da diversas leschas chantunalas e da differentas ordinaziuns dal cussegl grond. Ultra da la lescha dal dretg da burgais dal chantun Grischun, da la lescha davart ils dretgs politics en il chantun Grischun, da la lescha davart la cassa da pensiun chantunala dal Grischun, da la lescha introductiva tar il cudesch civil svizzer, da la lescha davart il notariat, da la lescha constituziunala da las dretgiras, da la procedura civila e da la lescha da submissiun ston er anc quatter ordinaziuns dal cussegl grond vegnir adattadas correspundentamain.
La cumissiun ha deliberà il project en il senn da las propostas da la regenza per mauns dal cussegl grond che vegn a tractar la fatschenta en la sessiun da december.

Gremi: cumissiun per giustia e segirezza
Funtauna: rg cumissiun per giustia e segirezza