La regenza grischuna ha approvà da princip la cumplettaziun da la
planisaziun locala che las votantas e ch'ils votants dad Arosa han
concludì. Cun questa cumplettaziun da la planisaziun locala è vegnida
stgaffida la premissa planisatorica per in hotel da quatter stailas cun
in resort da wellness en il territori da Prätschli. Il medem mument ha
la regenza refusà ils recurs da proprietarias e da proprietaris da bains
immobigliars vischins ch'èn vegnids fatgs cunter quest project e tractà
las posiziuns da las organisaziuns da l'ambient.
En vista a la situaziun dal territori da project ch'è - en
cumparegliaziun cun il territori d'abitadi sco tal dad Arosa - perifera
ed exponida sco er resguardond las valurs da la cuntrada e dals
potenzials da la protecziun da la natira en il territori pertutgà n'ha
la regenza dentant betg pudì far auter che da colliar l'approvaziun da
la planisaziun cun differentas prescripziuns e cundiziuns. Uschia sto la
construcziun da l'hotel nov satisfar ad autas pretensiuns tant da la
concepziun sco er da l'architectura e l'arranschament dals cubus sco
ch'el è previs en la planisaziun actuala sto - or dal puntg da vista da
la cuntrada - vegnir optimà en l'interess d'ina meglra integraziun en la
structura architectonica existenta da l'abitadi da Prätschli. Plinavant
stoi vegnir prendì en mira da schanegiar anc pli fitg la palì planiva
"Riedboden" che sa chatta en la vischinanza, ed i ston vegnir prendidas
las mesiras substitutivas necessarias. Per garantir la realisaziun da
questas directivas sto la vischnanca concepir il plan da quartier sco
plan d'areal. Quel è stà previs en mintga cas ed è suttamess a
l'approvaziun tras la regenza.
Tenor la regenza è il project da Prätschli d'in interess public
considerabel. Ils ultims onns ha Arosa stuì acceptar - per differents
motivs - in regress marcant e precar dal dumber da letgs da hotel
tradiziunals. Projects sco il hotel da wellness en discussiun èn
adattads da fermar quest trend negativ e da dar novs impuls al turissem.
L'interess public che pleda per la nova construcziun da l'hotel è -
tenor l'opiniun da la regenza - tut en tut pli grond ch'ils giavischs da
la protecziun da la cuntrada che s'opponan a tala, premess che las
prescripziuns e che las cundiziuns menziunadas vegnian resguardadas en
l'ulteriur svilup dal project.
Il Grischun sustegna l'armonisaziun da la scola obligatorica e da la
scolaziun speziala
Cun dus concordats planisescha la conferenza svizra da las
directuras e dals directurs chantunals da l'educaziun publica (CDEP)
d'armonisar meglier la scola obligatorica e la scolaziun speziala. La
regenza grischuna resguarda il sboz da la cunvegna interchantunala
davart l'armonisaziun da la scola obligatorica (concordat da HarmoS) sco
basa solida per il svilup dal sistem svizzer da scola. La qualitad e la
permeabilitad dal sistem da scola duain vegnir garantidas en l'entira
Svizra ed impediments da mobilitad duain vegnir reducids. Il concordat
definescha las datas da basa las pli impurtantas, sco l'entrada en scola
e la durada dals stgalims da scola, e fixescha las finamiras
surordinadas. L'atun 2007 duai il concordat da HarmoS vegnir deliberà
per la ratificaziun en ils chantuns.
Cun tscherner questa direcziun hajan pudì vegnir instradadas
meglieraziuns qualitativas ha la regenza constatà en sia consultaziun.
Il concordat garanteschia che giavischs centrals da la scola vegnian
fundads bain e vegnian sviluppads vinavant communablamain. Beneventada
vegn la fixaziun da standards da furmaziun sco er l'armonisaziun dals
plans d'instrucziun e dals meds d'instrucziun. Areguard las linguas
estras pretenda la regenza ch'il chantun Grischun sco chantun triling
possia realisar soluziuns che divergeschan da las regulaziuns generalas.
Plinavant beneventa la regenza il sboz da consultaziun da la CDEP
concernent la cunvegna interchantunala davart la collavuraziun en il
sectur da la pedagogia speziala. Quella cuntegna princips unifitgads e
regulaziuns unifitgadas per il sectur da la scolaziun speziala. Uschia
avria la CDEP la via per garantir in tractament cumparegliabel en il
sectur da la scola speziala dals uffants e dals giuvenils cun
dischavantatgs u cun impediments en ils differents chantuns,
constatescha la regenza.
La regenza beneventa l'iniziativa parlamentara per proteger la
populaziun e l'economia cunter il fimar passiv
La regenza grischuna beneventa la revisiun parziala da la lescha
federala davart la lavur en l'industria, en il mastergn ed en il
commerzi ch'è vegnida proponida e che prevesa in scumond da fimar a
plazzas da lavur. Sco che la regenza constatescha en sia resposta da
consultaziun davart l'iniziativa parlamentara per proteger la populaziun
e l'economia cunter il fimar passiv, na vegnan uschia betg mo protegids
las lavurantas ed ils lavurants cunter las consequenzas nuschaivlas
ch'il fimar passiv ha per la sanadad, mabain er ina gronda part da la
populaziun.
La regenza renviescha en quest connex er al sboz per ina revisiun
parziala da la lescha davart ils fatgs da sanadad dal chantun Grischun.
Per proteger las nunfimadras ed ils nunfimaders cunter il fimar passiv
prevesa quella da scumandar il fimar en localitads serradas ch'èn
accessiblas al public, e quai cun excepziun da localitads separadas per
fimadras e per fimaders.
Permetter ils servetschs d'instrucziun da l'armada a l'exteriur mo
en moda restrictiva
La regenza grischuna è da l'opiniun che la realisaziun da servetschs
d'instrucziun obligatorics da l'armada a l'exteriur duai vegnir
restrenschida mo a tscherts paucs secturs e geners d'armas. Da talas
instrucziuns duai per exempel profitar l'aviaziun militara che ha gia
pudì utilisar plazzas aviaticas e territoris d'exercizi a l'exteriur ils
onns passads sin basa da cunvegnas bilateralas. La revisiun da
l'organisaziun da l'armada qua avant maun prevesa che las appartegnentas
e ch'ils appartegnents da l'armada da milissa duain da nov pudair vegnir
obligads da far in servetsch d'instrucziun a l'exteriur. Quai pertutga
las appartegnentas ed ils appartegnents da las truppas da chars armads,
da l'artigliaria sco er da las truppas aviaticas e da las truppas da
defensiun cunter aviuns.
Tenor la regenza s'impona ina realisaziun uschè restrictiva sco
pussaivel da tals servetschs d'instrucziun oravant tut, perquai che
l'economia supportass anc main in'absenza da sis fin otg emnas da las
persunas ch'èn obligadas da far servetsch militar. Sco ch'i vegn declerà
vinavant en la resposta da consultaziun sajan da princip avant maun en
Svizra avunda plazzas da tir. Ultra da quai na pudessan las cundiziuns
spezialas da la Svizra per regla betg vegnir trenadas a l'exteriur, u
almain betg meglier ch'èn Svizra sezza.
Da vischnancas e da regiuns
- Pignia: La regenza ha approvà il project concernent la sanaziun
dal rempar da lavinas Vallatscha e Tgapadeals da la vischnanca da
Pignia. Als custs cun dretg da subvenziun da 280'000 francs vegn
garantida ina contribuziun chantunala da maximalmain 42'000 francs.
- Roveredo: La revisiun parziala da la constituziun communala da la
vischnanca da Roveredo, concludida da la radunanza communala dals 24 da
settember 2006, vegn approvada.
- Versomi: La revisiun parziala da la constituziun communala da la
vischnanca da Versomi, concludida da la radunanza communala dals 22 da
zercladur 2006, vegn approvada.
Contribuziuns chantunalas a differentas instituziuns
- Gruppa da lingua taliana per il material d'instrucziun: Il chantun
Grischun paja mintga onn maximalmain 5'000 francs als custs restants che
na vegnan betg cuvrids tras autras contribuziuns da la gruppa da lingua
taliana per il material d'instrucziun (GLIMI) per ils onns 2007 fin
2011. La GLIMI sustegna la realisaziun d'agids didactics per
l'instrucziun ch'èn adattads per l'instrucziun a scolas professiunalas.
- Publicaziun "Bizanz a Mustér": Per edir l'emprim tom da la
publicaziun "Bizanz a Mustér" vegn pajada ina contribuziun da 10'000
francs.
- Almanacco Mesolcina-Calanca 2007: L'ediziun dal "almanacco
Mesolcina-Calanca 2007" vegn sustegnida cun ina contribuziun da 6'000
francs.
- Occurrenza da sport: La regenza ha deliberà 8'300 francs dal fond
da sport per il turnier da hockey sin glatsch da la ARGE ALP che ha lieu
dals 2 fin ils 4 da schaner 2007 a Bellinzona.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun