Gia per la sisavla giada ha il fond cultural Eliette von Karajan surdat premis a Grischunas ed a Grischuns che lavuran sin il champ cultural. Distinguidas vegnan quatter artistas ed artists cun premis d'ina summa da mintgamai 30'000 francs. Duas ulteriuras artistas survegnan premis da promoziun d'ina summa da mintgamai 12'500 francs.

Perquai che la famiglia von Karajan ha prendì domicil en il chantun Grischun avant bunamain 45 onns, ha Eliette von Karajan fundà l'onn 2000 il "fond cultural Eliette von Karajan" per il chantun Grischun. Ils premis che vegnan surdads mintga onn duain dar la pussaivladad a questas persunas da sa sviluppar vinavant sin lur champ e da pudair sa deditgar en moda anc pli intensiva a lur lavur culturala. Ultra dal sustegn finanzial èn ils premis er ina stima ed ina conferma da la lavur prestada fin ussa.
Quest onn vegnan distinguidas sis Grischunas u Grischuns cun premis d'ina valur totala da 145'000 francs. Las persunas che survegnan l'onn 2006 il premi da mintgamai 30'000 francs èn: Felix Benesch, Berlina (teater, reschia), Manfred Ferrari, Malans (teater, reschia), Kurt Grünenfelder, Turitg (teater, actur) sco er Ursina Lardi, Berlina (teater, actura). Premis da promoziun en la summa da mintgamai 12'500 francs survegnan: Ingrid Alexandre, Bienna (chant) e Madleina Collenberg, Cuira (flauta).

Gremi: departament d'educaziun, cultura e protecziun da l'ambient
Funtauna: rg uffizi da cultura