L'aboliziun planisada da la lescha federala davart l'acquist da
bains immobigliars tras persunas a l'exteriur (lex Koller) vegn
beneventada da la regenza grischuna. La limitaziun na correspunda - dal
puntg da vista actual - betg pli als fatgs, sco che la regenza scriva en
sia consultaziun. Per evitar consequenzas negativas che pudessan - tenor
l'avis da la confederaziun - sa manifestar spezialmain tar la
construcziun d'abitaziuns da vacanzas en ils territoris turistics
prevesa la confederaziun mesiras accumpagnantas areguard la planisaziun
dal territori. La revisiun parziala correspundenta da la lescha federala
davart la planisaziun dal territori che vegn proponida vegn refusada
dentant strictamain da la regenza. Tenor la regenza èn ils chantuns sezs
en cas da relaschar e da realisar las mesiras necessarias, e quai
resguardond las relaziuns chantunalas e regiunalas differentas. La
regulaziun planisada da la confederaziun sveglia - ultra da las resalvas
constituziunalas e legislativas - er resalvas areguard il cuntegn. Quai
vala spezialmain per la limita minimala proponida da 30 fin 50
pertschient per abitaziuns secundaras. Tenor la regenza na tegna quella
betg quint da la realitad, surtut perquai ch'ella è gia oz surpassada en
bleras destinaziuns turisticas. Sco nunfundà e nunnecessari
caracterisescha la regenza ultra da quai il stop da construir abitaziuns
secundaras, fin ch'ina regulaziun suffizienta da la planisaziun dal
territori saja relaschada.
Approvaziun per il "greenconnector" cun resalvas
Cun tschertas resalvas ha la regenza da princip ina tenuta positiva
visavi il project "greenconnector", che prevesa da trair ina lingia da
cabel da current cuntinuà d'auta tensiun tras il conduct d'ieli che na
vegn betg pli duvrà da la Oleodotto del Reno SA da Seglias fin en
l'Italia. Ord la vista dal chantun èsi beneventabel ch'il conduct d'ieli
mess ord funcziun po puspè vegnir duvrà per in intent raschunaivel.
Pervi dal martgà d'electricitad liberalisà s'augmentan fitg ils
transports d'electricitad da la regiun da la UE dal nord en Italia che
traversan il chantun Grischun. Per pudair transportar quests novs
currents d'electricitad senza problems tras la Svizra èn necessarias
novas capacitads da rait. En quest reguard dastgassi esser interessant
per il chantun Grischun respectivamain per interpresas da l'economia
d'electricitad da sa participar a quest project innovativ e da rinforzar
uschia la posiziun grischuna en il martgà d'electricitad. Fin a la
procedura d'approvaziun dals plans ston dentant anc vegnir scleridas
tschertas resalvas e vegnir fatgas meglieraziuns dal project. En spezial
ston la dimensiun ed il lieu da l'implant da converter vegnir optimads,
e quai per resguardar la populaziun e la cuntrada.
La revisiun parziala da la lescha davart l'assicuranza da malsauns e
la reducziun da las premias va en consultaziun
La regenza grischuna vuless distgargiar pli fitg las famiglias cun
uffants tar las premias da la cassa da malsauns. En quest connex ha ella
avert la consultaziun davart in sboz tar la revisiun parziala da la
lescha davart l'assicuranza da malsauns e la reducziun da las premias
ch'il departament da giustia, polizia e sanitad ha elavurà. Tenor las
prescripziuns da la legislaziun federala ston ils chantuns - a partir da
l'onn 2007 - reducir per almain 50 pertschient las premias per uffants e
per persunas giuvnas creschidas en scolaziun cun entradas pitschnas e
mesaunas.
Sco mesira da la politica da famiglia prevesa il sboz ussa da
reducir questas premias per 100 pertschient fin ad entradas imputablas
da 65'000 francs e sur quai, fin ad entradas imputablas dad 80'000
francs, cun ina procentuala graduada. Sco ulteriura mesira da la
politica sociala èsi planisà da reducir la tariffa maximala da la
resalva persunala a 10 pertschient. Per finanziar ils custs
supplementars da circa 19 milliuns francs che resultan da quai propona
il sboz da prender - sco basa per la reducziun da las premias -
l'autezza da las premias da furmas d'assicuranza che han ina
pussaivladad restrenschida da tscherner il furnitur da prestaziuns.
Retschavidras e retschaviders da la reducziun da las premias pon
mitigiar la reducziun da las premias ch'èn decisivas per questa
reducziun cun midar per exempel ad in model d'assicuranza cun ina media
u cun in medi da famiglia. Uschia sa laschan spargnar circa 10
pertschient da las premias da la cassa da malsauns. Per finanziar ils
custs supplementars vegn proponì ultra da quai da dauzar sin 20
pertschient la part da la facultad suttamessa a la taglia che vegn
resguardada - ultra da las entradas imputablas - per calcular il dretg
sin reducziun da las premias. La consultaziun dura fin ils 31 da mars
2006. Dals documents pon ins prender invista sut www.jpsd.gr.ch.
La lescha da taglia revedida mitigescha l'imposiziun economica dubla
La regenza gischuna ha mess en vigur la revisiun parziala da la
lescha da taglia per il 1. da schaner 2006. La revisiun cumpiglia per
l'ina in levgiament da l'imposiziun economica dubla, quai vul dir da la
taxaziun tant dals gudogns en la societad anonima sco er dals gudogns
distribuids a l'acziunaria u a l'acziunari. Questa imposiziun dubla vegn
mitigiada a partir da la perioda fiscala currenta, sche l'acziunaria u
sche l'acziunari è participà al chapital d'aczias cun almain 10
pertschient. Il levgiament ha in effect tant sin la taglia sin las
entradas sco er sin la taglia sin la facultad ed augmenta
l'attractivitad dal chantun Grischun sco plazza economica. Per l'autra
cumpiglia la revisiun in'adattaziun dal dretg chantunal a las
disposiziuns fiscalas da la lescha davart la fusiun.
Nova incarica da prestaziun per l'agid cunter AIDS dal Grischun
La regenza ha approvà ina nova incarica da prestaziun per l'agid
cunter AIDS dal Grischun. Dapi sia fundaziun l'onn 1987 s'engascha
l'agid cunter AIDS dal Grischun en la cussegliaziun da persunas che
tschertgan agid sco er en la prevenziun ed en l'infurmaziun davart HIV e
davart AIDS. Da nov èn ussa er vegnidas integradas en l'incarica da
prestaziun la cussegliaziun e la prevenziun concernent malsognas da la
gruppa da hepatitis ed autras infecziuns ch'èn sexualmain
transmissiblas. Per ademplir quellas incaricas dal chantun survegn
l'agid cunter AIDS dal Grischun da nov ina contribuziun annuala da
totalmain 200'000 francs.
Da vischnancas e regiuns
- Pendiculara "Murtèl - Corvatsch": En sia consultaziun envers
l'uffizi federal da traffic propona la regenza grischuna da dar la
concessiun per la pendiculara "Murtèl - Corvatsch" (implant da
remplazzament) ch'è vegnida projectada da la pendiculara
Surlej-Silvaplana Corvatsch SA. Per la projectaziun detagliada e per la
realisaziun da la construcziun sto la petenta da la concessiun consultar
in accumpagnament ecologic da construcziun.
- Schlarigna: Il plan general d'avertura 1:5'000 "midada" dals 5 da
settember 2005 da la vischnanca da Schlarigna vegn approvà. En quest
connex sto vegnir fatg attenziun en il rom da la projectaziun ch'il
maletg da la planira pertutgada restia mantegnì uschè intact sco
pussaivel. Ultra da quai vegn la vischnanca incumbensada da zavrar la
zona da protecziun per l'aua sutterrana en ina proxima revisiun da la
planisaziun locala.
- Sur (Valragn): La regenza approvescha il plan da zonas 1:1'000
"territori dal vitg" da la vischnanca da Sur (Valragn) dals 20 da matg
2005 cun il renviament ch'ils cunfins dal guaud inscrits en il plan da
zonas survegnan in effect static. Er approvà vegn il plan da zonas
1:10'000 dals 20 da matg 2005.
Contribuziuns chantunalas a differentas instituziuns
- Chasa da dimora e da tgira Villa Sarona a Cuira: La regenza ha
approvà il project per construir da nov e per renovar la chasa da dimora
e da tgira Villa Sarona a Cuira cun custs calculads da 6'595'100 francs.
L'approvaziun vegn dada cun la resalva explicita che l'instituziun
purtadra stoppia garantir la finanziaziun restanta. Als custs imputabels
da maximalmain 5'800'000 francs vegn garantida ina contribuziun da
construcziun chantunala da 50 pertschient, quai vul dir da maximalmain
2'900'000 francs.
- Filarmonia da chombra dal Grischun: La filarmonia da chombra dal
Grischun survegn ina contribuziun chantunala da 96'000 francs per la
stagiun 2006/2007. Il preventiv general da la filarmonia da chombra dal
Grischun importa 527'500 francs. La citad da Cuira paja ina contribuziun
da 50'000 francs.
- Pro musica e cultura: Per la turnea dal first China cello
orchestra cun ventg cellistas e cellists giuvens da la scola auta da
musica da la China e da la Svizra respectivamain per ils concerts dals
28 da fanadur fin il 1. d'avust 2006 a San Murezzan, a Scuol ed a Tavau
survegn la fundaziun "pro musica e cultura" ina garanzia da deficit da
maximalmain 12'000 francs.
Chaussas persunalas
Franco Bontognali, domicilià a Tumein, è vegnì numnà sco manader da
la partiziun "mesiraziun" da l'uffizi d'agricultura, meglieraziun da
structura e mesiraziun dal chantun Grischun.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun