Il secretariat da stadi per l'economia (SECO) sustegna la realisaziun da la refurma dal turissem grischun cun 1 milliun francs. En ses rapport d'examinaziun scriva il SECO ch'el saja spezialmain persvadì da la profunditad e da la transparenza dal project. La partiziun da la lavur ch'è planisada en il turissem grischun saja ina refurma da structura empermettenta che possia chaschunar a vista mesauna ch'i dettia dapli pernottaziuns e plazzas da lavur segiras.

L'uffizi per economia e turissem dal Grischun aveva dumandà il SECO da sustegnair il project da refurma. Il project prevesa che las tschintg destinaziuns principalas San Murezzan / Engiadina, Tavau-Claustra, Arosa-Lai, Flem-Laax e Scuol-Samignun surpiglian l'iniziativa da fundar organisaziuns per la gestiun da destinaziuns (OGD). Ils lieus pli pitschens duain fundar organisaziuns turisticas futuras (OTF) regiunalas per pudair s'associar ad ina OGD u a Grischun vacanzas. Tschintg iniziativas sco la plattafurma turistica electronica grischuna, l'introducziun da l'instrument da direcziun e da controlla "balanced scorecard" (BSC) u la tgira da la marca graubünden accumpognan il process. Ils proxims sis onns investescha il chantun Grischun - ultra da resursas da persunal considerablas - 18 milliuns francs per stgaffir structuras cumpetitivas en il turissem grischun. La nova structura da las destinaziuns duai fermar il regress da las dumondas che ha custà al Grischun passa 2'600 plazzas da lavur dapi l'onn 1990.

Caracter da model internaziunal
La contribuziun dal SECO dad 1 milliun francs sa basa sin la lescha federala per promover l'innovaziun e la cooperaziun en il turissem (innotour). Il project da refurma dal Grischun haja caracter da model tant per il turissem svizzer sco er per il turissem internaziunal, stima il SECO en ses rapport. Il project saja progredì bain ed haja in grond grad da concretisaziun. El saja organisà en moda surmanaschiala cun integrar las organisaziuns localas da turissem, las purtadras ed ils purtaders da prestaziuns, las vischnancas, Grischun vacanzas sco er l'uffizi per economia e turissem e tegnia plainamain quint da l'idea da cooperaziun e da qualitad. La cooperaziun da las acturas e dals acturs dal turissem grischun che vegn planisada da nov è tenor il SECO "dapli ch'ina soluziun da consens tradiziunala" e chaschuna ch'ina communitad dinamica possia s'etablir. "Quest project grond è senza dubi ina innovaziun structurala e correspunda a las finamiras dad innotour" giuditgescha il SECO.

Il chantun è cuntent da la renconuschientscha
Il departament da l'intern e da l'economia publica dal chantun Grischun sa mussa cuntent da la decisiun positiva da Berna. Il sustegn dal SECO saja ina gronda motivaziun per l'entir turissem grischun che haja gia cumenzà a relisar quest process. Las OGD e las OTF han ussa temp fin la primavaira 2007 d'annunziar lur projects tar l'uffizi per economia e turissem. Alura giuditgescha il chantun ils projects e suenter ston ils plans da fatschenta vegnir inoltrads fin la fin da settember 2007. Perquai che la votaziun en Engiadin'ota ha gì in resultat positiv, cumenza la OGD San Murezzan/Engiadina gia la primavaira che vegn cun sias activitads.

Gremi: departament da l'intern e da l'economia publica
Funtauna: rg uffizi per economia e turissem