La cuminanza da lavur da las regiuns alpinas (ARGE ALP) publitgescha ses premi 2007 cun il tema "giuven, cool ed engaschà". Tschertgads vegnan bunas ideas e novs impuls per gudagnar umans giuvens per uffizis d'onur e per activitads voluntaras. Sco summa totala dals premis stattan a disposiziun 15'000 euros.

Il premi da la ARGE ALP è in premi da renconuschientscha e da promoziun, cun il qual la ARGE ALP vul promover contribuziuns persistentas per in svilup prospectiv dal territori alpin e cunzunt cumpetenzas per il futur sco er chaussas visiunaras e nunusitadas.
Il premi ch'è publitgà per l'onn 2007 sa drizza en spezial a citads, a vischnancas, ad uniuns ed a scolas (cun scolaras e cun scolars a partir da 10 onns) dals pajais ch'èn commembers da la ARGE ALP. Quai èn ils chantuns Grischun, Son Gagl e Tessin, ils stadis federativs Tirol, Salzburg e Vorarlberg, las provinzas autonomas Trento e Bulsan-Tirol dal sid, la regiun Lumbardia ed il stadi liber da la Baviera. Las participantas ed ils participants èn envidads da preschentar ideas e projects innovativs che han l'intent da gudagnar umans giuvens per engaschaments en in uffizi d'onur. Admess èn projects realisads (a partir da l'onn 2004) sco er ideas e concepts per il futur.
Il termin d'annunzia dura fin ils 31 da mars 2007. Cumissiuns regiunalas dals pajais commembers tschernan alura las meglras inoltraziuns da lur territori e tramettan vinavant maximalmain tschintg projects ad ina giuria internaziunala per la decisiun finala. Sco summa totala dals premis stattan a disposiziun 15'000 euros. La surdada dals premis ha lieu il zercladur 2007 a Bregenz a chaschun da la conferenza da las scheffas e dals schefs da las regenzas.
Ils documents detagliads davart la concurrenza ed ulteriuras infurmaziuns stattan a disposiziun en l'internet sut www.argealp.org. Contribuziuns or dal chantun Grischun ston vegnir tramessas a la chanzlia chantunala dal Grischun, servetsch da medias, Reichsgasse 35, 7001 Cuira.

Flyer

Gremi: ARGE ALP, sutgruppa per la lavur da publicitad
Funtauna: rg chanzlia chantunala dal Grischun