Navigation

Inhaltsbereich

  • Erste Mitteilung
  • Neuen Beitrag einfügen
La disposiziun davart l'examen da lingua per l'admissiun a l'emprima classa gimnasiala vegn adattada en vista als examens d'admissiun 2007. La regenza grischuna ha approvà la revisiun parziala correspundenta da l'ordinaziun davart ils examens d'admissiun a las scolas medias grischunas. Quai succeda sin basa d'in recurs ch'è vegnì approvà dal departament d'educaziun, cultura e protecziun da l'ambient suenter ils examens d'admissiun 2006. La decisiun da recurs aveva constatà ch'il modus vertent possia avair - tenor circumstanzas - dischavantatgs per las scolaras e per ils scolars da lingua rumantscha e da lingua taliana.
Da nov vegni a dar per candidatas e per candidats da lingua rumantscha tar l'examen da tudestg e da rumantsch e per candidatas e per candidats da lingua taliana tar l'examen da tudestg e da talian mintgamai mo pli ina nota per rom d'examen e betg pli duas. Questa regulaziun valeva gia pli baud fin l'onn 2000.
Cun la revisiun parziala da l'admissiun a la terza classa dal gimnasi respectivamain a l'emprima classa da la scola media professiunala e commerziala vegn a medem temp adattada l'eruida da la nota d'admissiun en consequenza da l'introducziun dal model dal stgalim superiur C cun nivels. En quest connex survegn la prestaziun en l'instrucziun d'englais dapli pais.

Engaschament d'ina nova cumissiun spezialisada per la tgira e per l'assistenza
La regenza grischuna ha concludì d'engaschar ina nova cumissiun spezialisada per la tgira e per l'assistenza (CSTA). La nova cumissiun spezialisada che sto vegnir furmada dal departament da giustia, polizia e sanitad vegn a cumpigliar maximalmain otg commembras e commembers e vegn a remplazzar l'anteriura cumissiun chantunala per promover la tgira e l'assistenza a chasa. Perquai che la collavuraziun da las chasas da tgira e da las organisaziuns da spitex daventa pli e pli impurtanta, vegn la cumissiun nova - cuntrari a la cumissiun veglia - a s'occupar er cun la tgira e cun l'assistenza en il sectur staziunar. Tant la federaziun chasas ed ospitals dal Grischun e la federaziun da spitex dal Grischun sco er la cumissiun existenta per promover la tgira ed assistenza a chasa èn stadas d'accord cun quest agir.

Las tariffas per la controlla dals animals da maz e da la charn vegnan midadas
La tariffa d'indemnisaziuns per las controlladras e per ils controlladers da charn e per la controlla dals animals da maz e da la charn vegnan midadas. Quai ha concludì la regenza grischuna. Las tariffas ston tranter auter vegnir adattadas, perquai ch'i sto vegnir fatga a partir dal 1. da schaner 2007 tar tut ils animals da maz - ultra da la controlla da la charn - la controlla dals animals da maz. Questa controlla dals animals da maz vi da l'animal viv, e quai entaifer 24 uras avant che l'animal vegnia mazzà, è pli chara che la controlla da la charn. Per consequenza èn las expensas da las veterinarias uffizialas e dals veterinaris uffizials che ston far las controllas da la charn s'augmentadas per passa il dubel cumpareglià cun pli baud. Cun la tariffa d'indemnisaziun d'ozendi pon questas expensas da la veterinaria u dal veterinari vegnir bunifitgadas mo sut la media. Per il chantun porta la nova tariffa d'indemnisaziun expensas supplementaras da ca. 236'000 francs. Sin fundament da quest svilup ston vegnir augmentadas er las tariffas per la controlla dals animals da maz e da la charn .

Contribuziuns chantunalas a differentas instituziuns
- Stabiliment da sport "Palüzot" a Sent: La regenza ha approvà il project per la constucziun dal stabiliment "Palüzot" a Sent. A la vischnanca da Sent vegn garantida ina contribuziun da construcziun chantunala da 214'000 francs.
- Federaziun grischuna per il sport: La regenza grischuna ha approvà la repartiziun da la contribuziun pauschala 2006 a las federaziuns da sport ed a las organisaziuns ch'èn associadas a la federaziun grischuna per il sport. La contribuziun da 781'300 francs vegn repartida sin totalmain 43 federaziuns da sport ed organisaziuns.
- Federaziun grischuna per il sport: La contribuziun or dal fond da sport a la federaziun grischuna per il sport importa maximalmain 26'000 francs. Quest import vegn duvrà per il premi grischun per il sport, per realisar la radunanza da delegadas e da delegads, per metter a disposiziun ina infurmaziun giuridica e per l'activitad generala da la suprastanza.
- Club da golf d'Arosa: Il club da golf d'Arosa survegn ina contribuziun da 93'000 francs or dal fond da sport per constuir ina nova "golf-driving range" publicaad Arosa .
- Club da hockey da Seglias: Per construir ina patinera artifiziala a Seglias survegn il club da hockey da Seglias ina contribuziun da 52'000 or dal fond da sport.
- Club da nudar da Cuira: Per il project "Schwimmclub Chur 2010" che ha la mira da professiunalisar il manaschi da trenament survegn il club da nudar da Cuira ina contribuziun da 35'200 francs or dal fond da sport.
- "dieHasena": Per las intervenziuns d'art ch'èn planisadas en il Partenz survegn l'uniun "dieHasena" ils onns 2007/2008 in sustegn unic da 30'000 francs.
Chanzlia chantunala dal Grischun

Gremi: regenza
Funtauna: rg chanzlia chantunala dal Grischun
Neuer Artikel