Il chantun Grischun vul rinforzar la protecziun dals uffants confidads. La regenza grischuna ha deliberà la missiva per ina lescha davart ils uffants confidads. Questa lescha vegn a reglar da nov las cundiziuns generalas per la recepziun d'uffants confidads ed a suttametter l'intermediaziun d'uffants e da plazzas da tgira a l'obligaziun da dumandar ina permissiun. Il cussegl grond vegn a tractar la fatschenta en la sessiun da december 2007.
Il motiv per las adattaziuns planisadas èn d'ina vart las revisiuns da la legislaziun federala. Da l'autra vart fixescha la nova constituziun chantunala che tut las disposiziuns impurtantas ston vegnir relaschadas dal cussegl grond en furma d'ina lescha. Ina novaziun essenziala da quest sboz da lescha è - per la protecziun dals uffants e dals giuvenils - che l'intermediaziun tras persunas privatas a plazzas da tgira sco er l'intermediaziun da plazzas da tgira per uffants e per giuvenils èn da nov suttamessas a l'obligaziun da dumandar ina permissiun. La recepziun d'uffants e da giuvenils per la tgira e per l'educaziun durant dapli ch'in mais è medemamain suttamessa a l'obligaziun da dumandar ina permissiun. Ultra da quai prevesa il sboz che l'obligaziun existenta da dumandar ina permissiun per la tgira e per l'assistenza d'uffants e da giuvenils vegnia extendida dal 15avel onn da vegliadetgna al 18avel onn da vegliadetgna. L'uffizi chantunal dal servetsch social vegn numnà sco suletta autoritad da surveglianza per l'entir sectur da la tgira en famiglia, da la tgira dal di e da la tgira en chasas. Medemamain è l'uffizi dal servetsch social sco suletta autoritad centrala cumpetent per la surveglianza da l'intermediaziun sco er per la recepziun d'uffants e da giuvenils per l'adopziun posteriura. La finala vegnan concretisads secturs, sco per exempel la cunfinaziun da la tgira en famiglia e da la tgira en chasas.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun