La procedura da taxaziun en il sectur da las ustarias duai vegnir simplifitgada. La regenza grischuna ha dà en consultaziun il sboz per ina revisiun parziala da la lescha d'ustaria. Il motiv principal per la revisiun parziala da la lescha d'ustaria èn las stentas che vegnan fatgas per deregular respectivamain per distgargiar administrativamain interpresas pli pitschnas e mesaunas.
En spezial duai vegnir simplifitgada la procedura da taxaziun dal commerzi en detagl cun bavrondas destilladas. Da nov duai la taxa pauschala vegnir incassada annualmain tenor las differentas gruppas da svieuta. Plinavant vegn fatga la taxaziun d'ina gruppa da svieuta da nov - empè da en in interval da dus onns - en in interval da tschintg onns. Ultra da quai duai er vegnir sminuida la lavur da las autoritads cumpetentas.
En la revisiun parziala vegnan las premissas per la permissiun da pratitgar activitads d'ustaria formuladas da nov e cumplettadas per part. Quai duai segirar che mo quellas persunas survegnan ina permissiun che pon garantir ina gestiun dal manaschi irreproschabla e senza reclamaziuns da la polizia sco er il pajament da las taxas che vegnan prescrittas. Perquai vegni pretendì ussa che la petenta u ch'il petent inoltreschia in extract actual dal register penal. La finala hai num d'adattar la lescha d'ustaria als svilups da la legislaziun federala.
Ils documents da consultaziun pudais Vus consultar e chargiar sin Voss computer da la homepage dal departament da l'intern e da l'economia publica cun l'adressa www.div.gr.ch (a partir dal 1. da schaner 2007: www.dvs.gr.ch). La consultaziun dura fin la fin da favrer 2007.

Las disposiziuns per il sustegn da persunas basegnusas vegnan adattadas
En il Grischun vegnan adattads intgins puncts da las disposiziuns per il sustegn da persunas basegnusas tenor las experientschas e tenor las constataziuns ch'èn vegnidas fatgas quest onn, e quai per il 1. da schaner 2007. La regenza grischuna ha concludì la revisiun parziala correspundenta da las disposiziuns executivas tar la lescha chantunala davart il sustegn da persunas basegnusas.
Las disposiziuns èn entradas en vigur - sin fundament da las directivas da la conferenza svizra da l'agid social (COSAS) - il 1. da schaner 2006. Ina novaziun essenziala è che a persunas ch'educheschan sulettas sto vegnir pajada ina contribuziun d'integraziun da 200 francs per mais, e quai fin che l'uffant il pli giuven ha accumplì ses terz onn da vegliadetgna. Uschia vegn realisada ina mesira dal rapport grischun da famiglia. Quai ha per consequenza ch'i resultan per il chantun custs supplementars dad 80'000 francs, per las vischnancas da 120'000 francs. Per meglierar las schanzas d'integraziun vegn previs in import d'entrada liber da taglia gia per in'activitad da gudogn da 10 pertschient. Fin ussa vegnivan concedids imports d'entrada libers da taglia pir tar in'activitad da gudogn da 20 pertschient.
I vegn er concretisà en quals cas ch'i vegnan fatgas stentas d'integraziun nunsuffizientas. La disposiziun correspundenta constatescha da nov expressivamain ch'i sto vegnir reducì obligatoricamain il sustegn dal basegn fundamental per ils custs da viver, sch'ina persuna na fa betg la lavur ch'è vegnida attribuida ad ella da la vischnanca e che po vegnir pretendida dad ella u sch'ella na sa participescha betg ad in program d'occupaziun e da furmaziun supplementara. La finala vegnan integradas las prestaziuns da sustegn ch'il chantun dat a persunas che sa chattan en ina procedura d'asil u da las qualas la dumonda d'asil è vegnida refusada sco er a persunas cun ina decisiun da betg entrar en chaussa. Questas prestaziuns n'èran fin ussa betg regladas en in relasch.

La revisun parziala da la lescha davart l'assicuranza da malsauns e la reducziun da las premias entra en vigur il 1. da schaner 2007
La revisiun parziala da la lescha davart l'assicuranza da malsauns e la reducziun da las premias ch'è vegnida concludida il 1. da settember 2006 vegn messa en vigur per il 1. da schaner 2007. Quai ha concludì la regenza grischuna. Il medem mument ha ella concludì la revisiun parziala necessaria da las disposiziuns executivas tar la lescha davart l'assicuranza da malsauns e la reducziun da las premias. Questas adattaziuns pertutgan en emprima lingia ils process tar l'institut d'assicuranza sociala dal chantun Grischun ch'è responsabel per la reducziun da las premias. La revisiun parziala da la lescha davart l'assicuranza da malsauns e la reducziun da las premias ha en emprima lingia la finamira, da distgargiar pli fitg las famiglias tar las premias da la cassa da malsauns.

La lescha davart las stimaziuns uffizialas entra en vigur il 1. da schaner 2007
La lescha davart las stimaziuns uffizialas dals 30 d'avust 2006 vegn messa en vigur per il 1. da schaner 2007. Quai ha concludì la regenza grischuna. A medem temp ha ella relaschà in'ordinaziun davart las stimaziuns uffizialas. Da nov vegnan ils trais relaschs executivs vertents resumads en in'unica ordinaziun da la regenza. La nova ordinaziun davart las stimaziuns fixescha tranter auter las reglas generalas da la stimaziun, la divisiun dals districts da stimaziun, las modalitads per realisar las stimaziuns uffizialas, las valurs che ston vegnir stimadas sco er ils objects spezials da stimaziun. Ultra da quai fixescha ella las tariffas decisivas da las taxas da stimaziun.

Ina conclusiun positiva davart la sessiun a Flem
La regenza grischuna ha prendì enconuschientscha dal rapport final da l'organisaziun grischuna dal project davart la realisaziun da la sessiun d'atun da las chombras federalas a Flem Laax Falera. La regenza approvescha la bilantscha positiva che vegn tratga en il rapport final ed engrazia l'organisaziun dal project per la realisaziun da la sessiun encorunada da success.
Las finamiras e las aspectativas che la regenza ha tschentà en la sessiun d'atun èn vegnidas cuntanschìdas dal tuttafatg. Las commembras ed ils commembers da las chombras federalas han pudì salvar ina sessiun da lavur intensiva en il Grischun. L'infrastructura dal Park Hotel Waldhaus ha ademplì cumplettamain ils giavischs areguard il confort da lavurar e d'alloschar. Er il program accumpagnant ch'era organisà en moda rigurusa cun sias en total tschintg occurrenzas ha pudì cuntentar las aspectativas da las commembras e dals commembers dal parlament d'emprender d'enconuscher anc meglier il chantun Grischun en sia varietad. Medemamain è vegnida cuntanschida la finamira da preschentar la lingua e la cultura rumantscha sco part essenziala da la particularitad grischuna. La qualitad da las occurrenzas, la cordialitad dals inscunters ed er la preschientscha activa da la lingua rumantscha - bain er grazia a l'engaschament da las voluntarias e dals voluntaris rumantschs sin l'areal da la sessiun - han creà gronda simpatia per il Grischun, a l'avis da la regenza. Il chantun Grischun e Grischun vacanzas, la regiun Surselva, las vischnancas da la sessiun d'atun Flem Laax Falera e las organisaziuns turisticas sco er il Park Hotel Waldhaus han profità da l'occasiun per sa profilar sco center da congress cun ina purschida d'emprima classa.
La regenza ha medemamain prendì enconuschientscha dal quint final pertutgant il diever da la part dal chantun a la realisaziun da la sessiun. Il preventiv da l'organisaziun dal project ch'è vegnì adattà il settember ha pudì vegnir resguardà. Las expensas totalas da tut las partenarias e da tut ils partenaris da l'organisaziun grischuna dal project importan 1'790'708 francs (preventiv 1'850'000 francs). La part dals custs dal chantun importa 357'025 francs empè dals 473'700 francs budgettads. Quests respargns tar la part dals custs dal chantun ston cunzunt vegnir attribuids al fatg ch'ils custs da segirezza èn stads bler pli pitschens che budgetads.

La regenza è per concentrar la "promoziun Svizra"
La regenza grischuna sustegna da princip la reorganisaziun cumplessiva da la "promoziun Svizra" e da las structuras da l'economia estra che la confederaziun ha previs. Las instituziuns da la confederaziun che lavuran cun incaricas da communicaziun legalas a l'exteriur duain vegnir resumadas en in'unica organisaziun interdisciplinara. Per quest intent duain vegnir transferidas las uniuns "preschientscha Svizra", "Svizra turissem" e "LOCATION Switzerland" en in institut federal da dretg public che sto vegnir fundà da nov. Cun la "promoziun Svizra" duai vegnir creada in'organisaziun che posseda la grondezza necessaria ed ils meds suffizients per communitgar cun cleras finamiras ils avantatgs da la Svizra a l'exteriur.
En sia consultaziun tar il sboz d'ina lescha federala davart "promoziun Svizra" refusescha la regenza dentant la fusiun da "LOCATION Switzerland" cun "Svizra turissem" e cun "preschientscha Svizra". La "LOCATION Switzerland" che stat per la Svizra sco lieu d'interpresas stoppia plitost vegnir incorporada en la societad per l'economia estra. Beneventada vegn perencunter la fusiun da "Svizra turissem" e da "preschientscha Svizra". Sur las duas pitgas: economia estra e "promoziun Svizra" basegni in tetg communabel per garantir che la marca vegnia administrada liantamain e per che la cooperaziun vegnia approfundada. A medem temp pretenda la regenza ch'ils meds duajan star a disposiziun per il turissem er en il futur en la medema dimensiun sco oz. La finamira primara da la reorganisaziun na dastga betg esser quella da spargnar, mabain da promover la Svizra en moda uschè effizienta ed uschè effectiva sco pussaivel.

La regenza prenda posiziun davart ils passaports biometrics previs
La regenza grischuna ha prendì enconuschientscha che la participaziun a las cunvegnas da Schengen pretendan ch'i vegnian introducids definitivamain documents da viadi biometrics. Sco quai che la regenza scriva en sia consultaziun a la confederaziun, è il project da pilot passaport 06 (passaport biometric) productiv pir dapi il cumenzament da settember 2006. Avant che trair decisiuns davart la moda da l'introducziun definitiva, sto dentant esser avant maun - a l'avis da la regenza - in'analisa conscienziusa da quest project da pilot.
Sco quai che la regenza constatescha vinavant, tracta il rapport da la confederaziun mo insuffizentamain las consequenzas impurtantas che resultan cun introducir il passaport biometric per ils chantuns e per las vischnancas. Ella pretenda perquai dapli infurmaziuns davart ils custs, davart il persunal necessari, davart las infrastructuras e davart ils centers regiunals da registraziun. Il chantun stoppia numnadamain avair temp avunda per sa preparar, per sa procurar ils meds e per metter a disposiziun las infrastructuras necessarias.

La regenza sustegna l'iniziativa parlamentara per promover la pressa cun agid d'ina partizipaziun als custs da repartiziun
Ord vista da la regenza grischuna è la midada da la lescha da posta - che vegn proponida d'ina iniziativa parlamentara che prevesa da cuntinuar cun las taxas da posta pli bunmartgadas - fitg raschunaivla. Gist in chantun da muntogna extendì e pauc populà sco il Grischun pudess profitar ferm, sch'i vegnissan mantegnids ils pretschs privilegiads ed independents da la distanza per spedir gasettas e revistas abunnadas, scriva la regenza en sia consultaziun tar l'iniziativa parlamentara. Plinavant pari positiv a la regenza ch'ina part da las subvenziuns da 20 milliuns francs na duain betg vegnir pajadas tenor il princip da repartiziun eguala, mabain ch'els van cun cleras finamiras en favur dals titels da pitschna ediziun da la pressa regiunala e locala.
La regenza considerescha l'iniziativa parlamentara davart la liberaziun da la taglia per il minimum d'existenza sco nunnecessaria
La regenza refusa l'iniziativa parlamentara concernent liberar da la taglia il minimum d'existenza en la lescha federala d'armonisaziun da taglia. Ella considerescha l'iniziativa sco nunnecessaria perquai ch'il minimum d'existenza na vegn gia oz betg suttamess a la taglia pervia da la concepziun da las tariffas fiscalas, pervia da la taxaziun nulla ch'è pussaivla gia oz per pitschnas entradas e pervia dal relasch da taglia. A l'avis da la confederaziun na duess la reglamentaziun proponida betg surpassar il dretg actual. Il text da lescha che vegn proponì è dentant formulà en ina moda fitg generala e nunprecisa. La regenza exprima perquai la resalva che las dretgiras divergeschan da la voluntad dal legislatur e ch'ellas pon deducir dal text da lescha ina liberaziun bler pli extendida dal minimum d'existenza. Per il cas che la confederaziun duess vulair mantegnair la liberaziun dal minimun d'existenza, vegn proponida ina nova formulaziun pli precisa da la disposiziun contestada.
Generalmain propona la regenza da midar l'artitgel da lescha ch'è oz en vigur e che vegn giuditgà dal tribunal federal sco anticonstituziunal, uschia ch'ils chantuns survegnan la pussaivladad da suttametter a la taglia ils conjugals cun uffants en cumparegliaziun cun las persunas che educheschan sulettas e cun ils pèrs en concubinat cun uffants.

Da vischnancas e da regiuns
- Claustra: Per la segunda part da las lavurs da reparaziun malauras 2005 en la regiun da Claustra vegn concedida ina contribuziun chantunala da 281'000 francs.
- Corporaziun regiunala "pro Engiadina bassa": La revisiun dals statuts da la corporaziun regiunala "pro Engiadina bassa" vegn approvada.
- Scanvetg: Il plan directiv regiunal "traffic betg motorisà / vias spezialas dal Scanvetg" ch'è vegnì deliberà da la pro Scanvetg vegn approvà.
- Casti-Vargistagn: La revisiun totala da la lescha da taglia da la vischnanca da Casti-Vargistagn dals 24 d'avust 2005 vegn approvada.
- Cauco: La revisiun parziala da la planisaziun locala da la vischnanca da Cauco dals 12 da december 2004 vegn approvada.

Contribuziuns chantunalas a differentas instituziuns
- Viafier Matterhorn Gottard: La regenza ha acceptà la dumonda da finanziaziun da la viafier Matterhorn Gottard (VMG) per la segunda etappa dal project "sortida dal vitg da Brig" ed ha concedì la part dal chantun Grischun da 641'456 francs.
- Promoziun da la cultura: La regenza grischuna ha concedì contribuziuns da totalmain 339'500 francs per promover 19 occurrenzas ed ovras culturalas.
- Teater Cuira: Per l'emprima part da la stagiun 2006/2007 survegn il teater Cuira ina contribuziun chantunala en la summa da 100'000 francs.
- Procap Grischun: A chaschun dal 75avel giubileum da procap Grischun vegn plazzada ina statua da bronz tar l'edifizi dal cussegl grond. Quai vegn fatg per attrair l'attenziun da la publicitad sin ils umans cun impediments. Vid ils custs da questa statua vegn pajada ina contribuziun da 45'000 francs.
- Project PORTFOLIO: Per elavurar la basa dal project PORTFOLIO che vul crear in center d'infurmaziun per la lavur sin il champ cultural grischun vegn garantida ina contribuziun unica da 10'000 francs.
- Project "Alpter": Il chantun Grischun sa participescha cun in import total da 60'000 francs al project internaziunal "Alpter" che s'occupa da la problematica da terrassar surfatschas utilisadas da l'agricultura en l'entir artg alpin.
- "Schulheim" Cuira: La sanaziun exteriura dal tract cun la halla da gimnastica dal "Schulheim" Cuira vegn approvada. La contribuziun da construcziun chantunala importa ca. 55'000 francs.

Per la fin da l'onn:
La regenza grischuna ha gì 43 sesidas durant l'onn 2006. A chaschun da quellas ha ella prendì 1459 conclus (l'onn precedent: 1582). Il presidi da la regenza passa il 1. da schaner 2007 a Martin Schmid, il schef dal departament da giustia, polizia e sanitad (nov a partir da 2007: departament da giustia, segirezza e sanadad). Vicepresident daventa Stefan Engler, schef dal departament da construcziun, traffic e selvicultura. La regenza giavischa a tut las conburgaisas ed a tut ils conburgais tut il bun per la fin da l'onn, fidanza e bainstar.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun