Navigation

Inhaltsbereich

  • Erste Mitteilung
  • Neuen Beitrag einfügen
Il Grischun duai sa participar a la cunvegna da basa per la collavuraziun interchantunala cun gulivaziun da las grevezzas (cunvegna da basa, CBI). Quai propona la regenza grischuna al cussegl grond, al qual ella suttametta la missiva correspundenta la sessiun d'avrigl. La CBI è ina basa impurtanta per ina collavuraziun interchantunala cunvegnenta ed effizienta cun ina gulivaziun da las grevezzas correcta. Ella regla en spezial ils princips e las eventualas furmas da la collavuraziun (conpurtaders u cumpra da prestaziuns), la fixaziun da las indemnisaziuns, la posiziun dals parlaments e la procedura en cas da dispitas. La concepziun detagliada - sco la summa concreta dals pajaments da gulivaziun ed ils dretgs da conpurtader concedids persuenter - ston vegnir determinads en singuls contracts specifics per tschertas incumbensas. Per il Grischun è la collavuraziun interchantunala d'ina impurtanza speziala cunzunt en ils secturs da las universitads, da las scolas autas professiunalas, da la medischina da perfecziun, da las instituziuns per l'assistenza da persunas impedidas sco er da l'execuziun da chastis e da mesiras. La CBI vegn ad entrar en vigur per ils chantuns sutsegnads, uschespert che 18 chantuns èn sa participads.

La revisiun parziala da la cunvegna da diploms vegn avant il cussegl grond
La regenza propona al cussegl grond d'acceptar la cunvegna interchantunala da diploms ch'è vegnida revedida e d'adattar il dretg chantunal uschia che la cunvegna interchantunala po vegnir realisada. La missiva davart la cunvegna interchantunala davart la renconuschientscha da certificats da scolaziun (cunvegna da diploms) revedida vegn suttamessa al cussegl grond la sessiun d'avrigl. La revisiun da la cunvegna da diploms ha per consequenza ch'i vegnan fatgas adattaziuns al dretg surordinà e creescha en spezial la basa legala per cuntinuar in register svizzer davart persunas spezialisadas en il sectur da la sanadad e l'uschenumnada glista naira davart persunas d'instrucziun. Questa glista naziunala davart persunas d'instrucziun ch'èn vegnidas privadas da la permissiun d'instruir vegn manada da la conferenza svizra da las directuras e dals directurs chantunals da l'educaziun publica (CDE) dapi l'onn 2004. Sco instrument d'infurmaziun duai ella proteger meglier la societad e particularmain las scolaras ed ils scolars. Sa basond sin il dretg vertent n'ha il Grischun pudì furnir naginas datas a la CDE. Las adattaziuns proponidas dal dretg chantunal creeschan uss la basa per ch'il chantun Grischun possia far las annunzias correspundentas tant per mauns dal register davart persunas spezialisadas dal sectur da la sanadad sco er per mauns da la glista da persunas d'instrucziun senza permissiun d'instruir.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun
Neuer Artikel