La regenza grischuna ha relaschà in'ordinaziun executiva tar la
lescha federala davart credits da consum. Quella regla la cumpetenza da
dar la permissiun per conceder u per intermediar credits da consum e
fixescha, tge documents che ston vegnir agiuntads ad ina dumonda da
permissiun. Ella sa basa sin la revisiun da l'ordinaziun federala tar la
lescha davart credits da consum che entra en vigur il 1. da mars 2006.
L'ordinaziun federala circumscriva las premissas da permissiun per
persunas che dattan u che intermedieschan credits. Fin ussa aveva il
chantun spetgà da relaschar prescripziuns executivas chantunalas,
perquai ch'i fascheva grondas difficultads als chantuns d'ademplir las
premissas da permissiun. Uschia n'eran - suenter che la lescha federala
era entrada en vigur - naginas societads d'assicuranza prontas d'offrir
l'assicuranza da responsabladad professiunala pretendida. Da nov ston
las petentas ed ils petents cumprovar ch'ellas e ch'els hajan ubain
in'assicuranza da responsabladad professiunala ubain ina segirezza
equivalenta, sco per exempel ina garanzia, ina decleraziun da garanzia u
in conto bloccà d'ina banca.
Da vischnancas e regiuns
- Cursa da muntogna "Arosa Classic Car": A l'organisaziun da la 2.
cursa internaziunala da muntogna "Arosa Classic Car" - represchentada
dad Arosa turissem - ha la regenza dà la permissiun da percurrer la ruta
prevesida tenor il plan da traject sin la via chantunala tranter
Langwies ed Arosa. La cursa ha lieu sonda e dumengia, ils 2 e 3 da
settember 2006.
- Laax: Il plan da zonas e plan general da furmaziun 1:2'000 da la
vischnanca da Laax dals 16 da december 2005 vegn approvà cun ina
resalva. La procedura d'approvaziun areguard las fixaziuns en connex cun
la midada da las zonas da privel en il territori da Murschetg vegn
sistida, fin ch'il project detaglià sco er l'examinaziun correspundenta
da la cumissiun da privel èn avant maun.
- Via da Disla: Sin la via da Disla, da Mustér (davent da la via
principala) fin Disla, vegnan dauzads il pais maximal permess da 18 sin
28 tonnas e la ladezza maximala da 2.30 sin 2.55 meters.
- Via da Schuders: Sin la via da Schuders, davent da la bifurcaziun
Maria fin Sandeggen, vegn dauzà il pais maximal permess dad 11 sin 18
tonnas.
Contribuziuns chantunalas a differentas instituziuns
- Lexicon istoric da la Svizra: Per stampar il tom 5 dal lexicon
istoric da la Svizra, che cuntegna tranter auter in artitgel cumplessiv
davart il chantun Grischun, vegn pajada ina contribuziun da 30'000
francs.
- Visarte.grischun: Per sustegnair l'atelier "Fernando et Jean-Luc
Lardelli, Canton des Grisons Paris" survegn la visarte.grischun per
l'onn 2006 ina contribuziun da stipendi da 20'000 francs.
- Promoziun da la cultura: La regenza grischuna ha concedì
contribuziuns da totalmain 240'000 francs per promover 20 ovras ed
occurrenzas culturalas.
- Club da bartgas a vela e da surf da Tavau: Per cumprar duas
bartgas a vela avertas cun carena dauzabla survegn il club da bartgas a
vela e da surf da Tavau ina contribuziun da maximalmain 13'100 francs or
dal fond da sport.
- SSS, secziun Cuira: Per cumprar in compressur da sfunsar sco er in
apparat per exercitar il salvament survegn la societad svizra da
salvament (SSS), secziun Cuira, ina contribuziun da maximalmain 5'600
francs or dal fond da sport.
Projects da vias
- Via dal Malögia: Per lavurs d'impressari sin la via dal Malögia en
connex cun la correcziun da la via en il vitg da Stampa ha la regenza
concedì totalmain 3'429'000 francs.
- Via da Stussavgia: Per lavurs da cuvrida sin la via da Stussavgia,
davent da Rüti fin Stussavgia Plaz, ha la regenza concedì 150'000
francs.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun