Navigation

Inhaltsbereich

  • Erste Mitteilung
  • Neuen Beitrag einfügen
Dapi ils 20 da favrer 2006 sto il giaglinom da niz puspè vegnir tegnì en uigls serrads e la populaziun indigena d'utschels selvadis vegn survegliada. En il fratemp è arrivà il virus H5N1 en Svizra. Igl è impurtant ch'ins possia impedir che la grippa d'utschels sa derasia sin il giaglinom da niz. Ina tala derasaziun dal virus da la populaziun d'utschels selvadis sin in effectiv da giaglinom da niz po vegnir evitada, sch'in contact da giaglinom da niz cun utschels selvadis è exclus en moda fidada. Cun mesiras igienicas adattadas sto ultra da quai vegnir garantì ch'ina derasaziun dal virus en il giagliner na saja betg pussaivla tras la possessura u tras il possessur sez.

Scleriment da mortoris extraordinaris tar utschels selvadis
Per constatar, sche la populaziun grischuna d'utschels selvadis è eventualmain infectada cun il virus H5N1, collavura l'uffizi per la segirezza da victualias e per la sanadad d'animals stretgamain cun ils guardiaselvaschinas. Tgi che observa mortoris extraordinaris tar utschels selvadis, duai annunziar quai al guardiaselvaschina.
Ils guardiaselvaschinas mettan ils utschels selvadis morts en segirezza, sche entaifer 24 uras vegnan chattads al medem lieu pli che dus utschels d'aua u da preda u pli che tschintg auters utschels selvadis morts. Tals cas suspects sco er singuls cigns chattads morts vegnan examinads, sch'els han la grippa d'utschels. Singuls utschels chantadurs u corvs e.u.v. chattads morts pon vegnir allontanads senza autras retschertgas.

Impedir che utschels selvadis entrian en uigls da giaglinas ed ierts d'enviern
Ils uigls da giaglinas dentant er ils "ierts d'enviern" e las volieras ston avair in tetg serrà e lur paraids ston esser isoladas cun raits u cun giatters uschia, ch'i na pon entrar nagins utschels selvadis, cunzunt er nagins paslers, d'ordaifer. Possessuras e possessurs da giaglinom, dals quals ils giagliners u las volieras na correspundan betg a questas pretensiuns, ston equipar correspundentamain lur tratgas.

Rinforzar las mesiras igienicas
Ultra da quai ston vegnir rinforzadas las mesiras igienicas en ed enturn l'uigl da giaglinas. Uschia ston ins per exempel lavar e dischinfectar ils mauns avant che cumenzar cun la lavur en il giagliner. Per la lavur en il giagliner ston ins trair en stivals e vestgids suren che vegnan duvrads mo per l'uigl. Ils giagliners ston vegnir segirads correspundentamain cunter l'access da persunas nunautorisadas e d'animals da chasa (chauns, giats) che n'han insumma pers nagut en l'uigl da giaglinas.
Plinavant sto vegnir dada fitg gronda attenziun a l'igiena dal manaschi ed ils chartuns dad ovs sco er auters emballadis duain vegnir duvrads mo ina giada, perquai che scherms infectus pon arrivar er sin questa via en ils uigls.
Cun observar consequentamain questas mesiras pon tut las possessuras e tut ils possessurs da giaglinas gidar ad impedir ch'il virus H5N1 sa derasia sin il giaglinom da niz.

Gremi: uffizi per la segirezza da victualias e per la sanadad d'animals
Funtauna: rg uffizi per la segirezza da victualias e per la sanadad d'animals
Neuer Artikel