La regenza grischuna trametta en consultaziun ina revisiun totala da la lescha da responsabladad. Ils puncts centrals dal project han l'intenziun d'introducir sin il stgalim da la lescha la responsabladad causala empè da la responsabladad da culpabilitad e d'unifitgar la responsabladad dal stadi sin tut ils plauns statals sco il chantun, ils districts, ils circuls e las vischnancas.
Questa revisiun vegn necessaria perquai che la responsabladad dal stadi è vegnida exprimida da nov en la constituziun chantunala (art. 26). Tenor quella stattan bun il chantun, ils districts, ils circuls e las vischnancas sco er las ulteriuras corporaziuns da dretg public e las instituziuns independentas per donns ch'els han chaschunà illegalmain, er senza ch'i saja avant maun insaqual cas da culpa. Uschia stat la lescha da responsabladad vertenta da l'onn 1944 - che prevesa ina responsabladad da culpabilitad - en contradicziun cun la constituziun chantunala. Cun la revisiun totala vul la regenza il medem mument deliberar la lescha da disposiziuns antiquadas e la formular en moda pli survesaivla e pli orientada a las burgaisas ed als burgais. La consultaziun dura fin la fin d'avrigl 2006. Ils documents da consultaziun pon vegnir retratgs da la pagina d'internet dal departament da finanzas e militar, www.fmd.gr.ch.

La regenza beneventa la permissiun d'acquistar armas per schuldads
Suenter la relaschada dals da obligaziun da far servetsch militar pon els acquistar lur arma sut tschertas premissas. La regenza grischuna è dal tuttafatg d'accord cun la finamira dal departament federal da defensiun, protecziun da la populaziun e sport che vul evitar ch'i vegnia eventualmain fatg diever abusiv dad armas. Quai scriva la regenza en sia consultaziun tar la revisiun da l'ordinaziun concernent l'acquist da l'equipament persunal da las appartegnantas e dals appartegnents da l'armada e da l'ordinaziun davart ils fatgs da tir ordaifer il servetsch. Tenor la regenza po questa finamira vegnir cuntanschida il meglier cun la varianta per introducir ina permissiun d'acquistar armas. La regenza recumonda questa varianta spezialmain perquai che uschia valan per tut las persunas che cumpran armas las medemas premissas.

Daplisas plazzas da scolaziun per polizistas e per polizists dal Grischun
La regenza grischuna vuless mantegnair l'effectiv da persunal da la polizia chantunala dal Grischun. Perquai ha ella auzà il contingent a la scola da polizia ad Amriswil per ils onns 2006/2007 da 15 a 25 aspirantas ed aspirants. Er per ils proxims onns duain star a disposiziun uschè bleras plazzas en la scola, che l'effectiv da persunal possia vegnir mantegnì. Sin fundament dal svilup da l'effectiv dal persunal na pudess betg vegnir mantegnì l'effectiv reglamentar actual da 378.6 unitads da plazzas cun scolar annualmain 15 aspirantas ed aspirants. Il medem temp ha la regenza prendì enconuschientscha dal rapport "PRONUNCIA". En quest rapport dals 14 da favrer 2006 davart la planisaziun da l'effectiv e davart la planisaziun da renunzia mussa la polizia chantunala dal Grischun il svilup da l'effectiv actual sco er la planisaziun da renunzia elavurada e las consequenzas necessarias che resultan da quella. La polizia chantunala dal Grischun vegn incumbensada da realisar la planisaziun da renunzia resguardond ses effectiv per propi.

La scola media professiunala, champ sanadad, a la scola mercantila Surselva vegn renconuschida
La scola mercantila Surselva ha l'intenziun da manar ina scola media professiunala sin il champ da professiun da la sanadad. La regenza grischuna ha approvà l'urari ed ils plans d'instrucziun ed als ha mess en vigur per il 1. d'avust 2006. Il medem temp renconuscha la regenza ils diploms da la scola media professiunala da la scola mercantila Surselva per l'emprima giada la fin da l'onn da scola 2008/2009, resalvà che la scolaziun vegnia approvada da la conferenza svizra dals directurs chantunals da l'educaziun publica. La scola na duai betg manar pli ch'ina classa da la scola media professiunala per annada.

Da vischnancas e regiuns
- Circul da Schiers: La revisiun parziala da la constituziun cirquitala dal circul da Sur Tasna dals 27 da november 2005 vegn approvada.
- Vaz: Ils plans generalas d'avertura e plans generals da furmaziun 1:2'500 da Lai, da Valbella, da Solas, da Sporz e da Lain/Muldain/Zorten "part chanalisaziun e part conducts da la chanalisaziun e conducts per aua da plievgia e naiv", tuts dals 28 da november 2004, vegnan approvads cun resalvas. Il plan general d'avertura ed il plan general da furmaziun 1:1'000 Vaz "part chanalisaziun e part conducts da la chanalisaziun e conducts per aua da plievgia e naiv" dals 28 da november 2004 vegn er approvà. Il plan general d'avertura 1:10'000 cumplettaziun "part aua ed ennavaziun" dals 28 da november 2004 vegn approvà cun resalvas. Plinavant vegn approvà il plan general d'avertura 1:10'000 cumplettaziun "part vias e sendas" dals 28 da november 2004.
- Ziràn-Reschen Il plan da zonas e plan general da furmaziun 1:1'000 da la vischnanca da Ziràn-Reschen dals 4 da november 2005 vegn approvà.
- Zuoz: Il plan da zonas e plan general da furmaziun 1:2'000 Chastlatsch da la vischnanca da Zuoz dals 6 d'avrigl 2005 vegn approvà. Plinavant vegn approvà cun cundiziuns il plan general d'avertura 1:2'000 Chastlatsch dals 6 d'avrigl 2005.
- Falera: La regenza ha approvà il project per la dustanza "Ual da Mulin ed uals laterals" (project consecutiv da las malauras dal november 2002) sin il territori da la vischnanca da Falera. Cun la resalva da la garanzia da subvenziun da la confederaziun vegn concedida ina contribuziun chantunala da maximalmain 328'000 francs dals custs calculads da 1'640'000.- francs.

Contribuziuns chantunalas a differentas instituziuns
- Tgira da monuments: Per restaurar e per sanar il "Roter Turm" a Cuira, la chasa d'abitar "Polagut" a Maiavilla sco er la chasa nr. 80 a Cumbel ha la regenza deliberà circa 250'000 francs.

Projects da vias
- Sviament da Flem: La regenza ha approvà 670'000 francs per construcziuns da metal vi da la via sursilvana tar il sviament da Flem.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun