En il rom da l'examinaziun da las structuras e da las prestaziuns per sanar las finanzas dal chantun ha il cussegl grond concludì da limitar ils dumbers d'admissiun a las scolas medias fin la fin da l'onn da scola 2007/2008. Ils 20 ed ils 21 da mars 2006 han gì lieu ils examens d'admissiun a la 3. classa dal gimnasi ed a las 1. classas da la scola media professiunala e commerziala.
Ils examens - che han gì lieu en tut las scolas medias grischunas en moda unitara ed il medem mument - han pudì vegnir manads tras cun success. Las dumondas dals examens èn vegnidas preparadas communablamain da represchentantas e da represchentants da las scolas secundaras e da las scolas medias. Sco gia l'onn passà han persunas d'instrucziun da tut las scolas medias grischunas curregì tut las lavurs d'examen en moda centrala a Cuira.
Tar ils examens d'admissiun a la 3. classa dal gimnasi èn cumparids 363 candidatas e candidats, per ils examens d'admissiun a las 1. classas da la scola media professiunala e commerziala èn quai stads 189 candidatas e candidats. Confurm a las prescripziuns dal cussegl grond vegnan admess quest onn maximalmain 211 candidatas e candidats a la 3. classa dal gimnasi e 156 a las 1. classas da la scola media professiunala e commerziala. Quai correspunda ad ina quota da success da 58 pertschient (3. classa dal gimnasi) respectivamain dad 82 pertschient (1. classas da la scola media professiunala e commerziala).

Gremi: uffizi per la furmaziun media-superiura
Funtauna: rg uffizi per la furmaziun media-superiura