La regenza dal Grischun ha l'intenziun da relaschar ina nova lescha
davart la relaziun da lavur da las collavuraturas e dals collavuraturs
dal chantun Grischun (lescha dal persunal). La regenza ha deliberà la
missiva correspundenta per mauns dal cussegl grond. Quel vegn a tractar
la fatschenta en la sessiun da zercladur. Il motiv per relaschar la
lescha dal persunal è la nova constituziun ch'è entrada en vigur il 1.
da schaner 2004. Quella prescriva che tut las disposiziuns impurtantas
stoppian vegnir fixadas sin il stgalim da la lescha. Fin ussa eran las
disposiziuns concernent il dretg da persunal regladas mo en
in'ordinaziun.
Cun il relasch da la lescha dal persunal vegnan fatgas er singulas
adattaziuns da dretg material. Tranter auter vegn acceptada la
prescripziun ch'ils standards minimals dal dretg d'obligaziuns (DO)
stoppian vegnir observads. Collavuraturas e collavuraturs na duain betg
esser en ina mendra situaziun cun il dretg da lavur public che sch'els
èn suttamess al DO. Il temp da cumprova tenor l'ordinaziun dal persunal
vertenta vegn dentant abolì. El n'è betg sa mussà adattà en la pratica
ed ha purtà dischavantatgs per las lavurantas e per ils lavurants sco er
per las patrunas e per ils patruns. Resguardond las disposiziuns davart
la protecziun cunter la desditga duain da nov er vegnir surpigliadas
disposiziuns da sancziun (p.ex. l'obligaziun d'indemnisaziun en cas da
desditga abusiva). Per finir duai puspè vegnir acceptà - en in rom
limità - il scumond da far chauma. Percunter èsi vegnì renunzià da crear
ina cumissiun da recurs dal persunal e d'introducir in contract
collectiv da lavur.
Parallelamain propona la regenza ina revisiun parziala da la
constituziun chantunala. En la sessiun d'avrigl 2005 aveva il cussegl
grond incumbensà la regenza da stgaffir la basa constituziunala per
delegar cumpetenzas legislativas ad instituziuns chantunalas
independentas. En il center stattan en quest connex las regulaziuns en
il sectur dal persunal sco er las regulaziuns en il sectur da las
incumbensas centralas da las instituziuns.
L'organisaziun da la regenza e da l'administraziun vegn reglada da
nov
L'organisaziun da la regenza e da l'administraziun dal chantun
Grischun duai vegnir reglada da nov. La regenza grischuna ha deliberà la
missiva correspundenta per il cussegl grond. Quel vegn a tractar la
fatschenta en la sessiun da zercladur. Da nov duai l'organisaziun da la
regenza e da l'administraziun vegnir reglada en dus relaschs, en ina
lescha davart l'organisaziun da la regenza e da l'administraziun (LORA)
ed en in'ordinaziun davart l'organisaziun da la regenza e da
l'administraziun (OORA).
Il motiv principal per la nova regulaziun intenziunada è la nova
constituziun chantunala ch'è entrada en vigur il 1. da schaner 2004.
Quella prevesa che la regenza possia reglar da nov ils secturs
d'incumbensas dals departaments tras ordinaziun. Questa cumpetenza aveva
fin ussa il cussegl grond. In ulteriur motiv per la nova regulaziun è la
reorganisaziun da l'administraziun chantunala concludida da la regenza
ils 15 da mars 2005. Previs èsi ch'ils champs d'incumbensas vegnian per
part repartids da nov als departaments e che differents uffizis vegnian
correspundentamain a midar departament. Il project da legislaziun qua
survart fa las adattaziuns legalas necessarias.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun