Navigation

Inhaltsbereich

  • Erste Mitteilung
  • Neuen Beitrag einfügen
LAS LAVURS EN CONNEX CUN IL PROGRAM FUNDAMENTAL CUNTINUESCHAN

Il departament d'educaziun evaluescha ussa las radund 650 intimaziuns e dumondas en connex cul "program fundamental scola grischuna 2010". Ils resuns entrads e divers projects sin plaun chantunal e federal dan la tempra a la concretisaziun ventura als projects da refurma.

Dapi la mitad da mars analisescha e reflectescha il departament d'educaziun las intimaziuns e las novas ideas relativas als projects dal "program fundamental scola grischuna 2010". Latiers na vaja betg mo per la dumonda, sche las reacziuns sin il program fundamental èn generalmain positivas u negativas. I va en emprima lingia per la quintessenza, per las indicaziuns fundamentalas dals resuns. Questa analisa qualitativa e la classificaziun da mintga singul resun cuntinueschan actualmain. Totalmain ha il departament d'educaziun retschet plirs tschients da resuns sin cartinas, da questiunaris sco era dad opiniuns expressas sur l'internet e da posiziuns individualas. Pir cura che quest'analisa vegn ad esser finida san vegnir concretisads ils singuls intents entaifer ils projects prioritars "dapli produndadad che vastadad", "integraziun", "duas linguas estras en scola primara" e "rinforzament dal stgalim superriur da la scola populara" en tala maniera da pudair vegnir suttamess a las instanzas cumpetentas da prender ina decisiun.

Program fundamental entretschà stretgamain
Già oz esi dentant cler che il project prioritar "rinforzament dal stgalim superiur da la scola populara" vegn tractà cun prioritad; numnadamain en connex cun la sanaziun da la scola chantunala a Cuira e cun la moda e maniera che la regenza vul proceder en connex cun la dumonda dal numerus clausus en las scolas medias grischunas, èn pendentas diversas decisiuns importantas. Avant che trair decisiuns en connex cun quest project prioritar èn previs ulteriurs colloquis cun ils represchentants da la scolas medias privatas.

Intant progredeschan las lavurs dal departament d'educaziun en connex cun il project prioritar "dapli profundidad che vastadad" parallelamain al project "HarmoS" da la conferenza svizra dals directurs chantunals da l'educaziun publica (CDEP). Il program dal CDEP per armonsiar sin basa interchantunala las finamiras, ils cuntegns e las structuras da la furmaziun, prevesa tranter auter la scolina obligatoria sco era standards obligatoris per tut la Svizra e plans d'instrucziun linguistic-regiunals.

Program fundamental vul esser effizient
Il project prioritar "integraziun" prenda resguard era en questa fasa sin las indicaziuns dal project federal per la "gulivaziun da finanzas e da las incumbensas tranter la confederaziun ed ils chantuns" NGF: la gulivaziun da las differenzas tranter ils chantuns e l'augment da l'effizienza. Il departament d'educaziun ha ultra da quai l'incumbensa da suttametter al parlament fin la fin dal 2007 las propostas per la realisaziun dal project prioritar "duas linguas estras en scola primara".

Las infurmaziuns da basa davart il "program fundamental scola grischuna 2010" sco era davart ils projects "HarmoS" e "NGF" pon ins prender invista en l'internet: www.kernprogramm.gr.ch, www.edk.ch, www.nfa.ch.

Gremi: departament d'educaziun, cultura e protecziun da l'ambient
Funtauna: rg uffizi per la scola propulara ed il sport
Neuer Artikel