Il project da construcziun che vegn proponì d'in team general da planisaziun per sanar ils implants da sport al liber da la scola chantunala al Sand a Cuira è vegnì approvà da la regenza. Medemamain ha la regenza approvà il preventiv da 5.5 milliuns francs. Cur ch'il team general da planisaziun ha elavurà il project da concurrenza, èsi sa mussà che la soluziun proponida pli baud - numnadamain da spustar la pista radunda (pista da trenament da 250 m) sin l'implant superiur avant il bogn cuvert - n'è betg optimala. Empè da quai vegn planisada la pista radunda giusut al lieu actual, e quai cun in meglier radius da storta, per ch'ella satisfetschia a las pretensiuns tecnicas dal sport.
Cur ch'ins ha cumenzà da nov cun la planisaziun da la sanaziun architectonica da la scola chantunala, è la sanaziun dals implants da sport al liber (senza la halla da sport tripla) vegnida integrada sco project urgent en il program da construcziun e suttamessa al cussegl grond en in'atgna missiva da preventiv. Il cussegl grond ha approvà il december 2005 in credit d'impegn da 5.5 milliuns francs che vegn repartì sin ils onns 2006 e 2007.

L'ordinaziun davart la tgira da dents en scola va en consultaziun
La regenza ha tramess en consultaziun in sboz per la revisiun da l'ordinaziun davart la tgira da dents en scola. Per ils uffants duai questa revisiun garantir ina profilaxa efficazia cunter caries, e quai durant lur temp da scola obligatoric. Questa adattaziun è necessaria, perquai che la societad grischuna da dentistas e da dentists ha elavurà in concept nov per garantir la profilaxa cunter caries en las scolas. La realisaziun premetta che l'ordinaziun vertenta davart la tgira da dents en scola vegnia adattada. A medem temp vegn profità da la revisiun per adattar correspundentamain las noziuns ch'èn sa midadas ils ultims onns e per realisar las directivas davart l'essenzialisaziun e davart la flexibilisaziun da la legislaziun e da l'applicaziun dal dretg. Ils documents da consultaziun pon vegnir consultads en l'internet sut www.jpsd.gr.ch. La consultaziun dura fin ils 5 da zercladur 2006.

Las taxas per utilisar las datas da basa da la mesiraziun uffiziala vegnan reducidas
L'utilisaziun da las datas da basa da la mesiraziun uffiziala duai daventar pli bunmartgada. Plinavant èsi planisà da stabilir in center da geodatas cun la participaziun dal chantun. Per quest intent ha la regenza grischuna relaschà la revisiun totala da l'ordinaziun davart las taxas per retrair extracts e valitaziuns da la mesiraziun uffiziala che entra en vigur il 1. da matg 2006. La finamira è da meglierar considerablamain la valur agiuntada da la resursa "geodatas", ina resursa per part anc nunutilisada. Per che questas geodatas vegnian er utilisadas, ston vegnir reducidas las taxas d'extracts e d'evaluaziuns da la mesiraziun uffiziala e vegnir stgaffidas bunas cundiziuns per la clientella gronda.

Revisiun parziala da l'ordinaziun tar la lescha davart las finanzas
La regenza ha approvà la revisiun parziala da l'ordinaziun tar la lescha davart las finanzas. Uschia po la regenza dumandar il cussegl grond credits d'impegn che n'èn betg suttamess al referendum da finanzas, e quai cun agid da la missiva da preventiv e da nov er cun la missiva dal quint dal chantun. Il medem vala per dumandar credits supplementars respectivamain per augmentar l'import da credits d'impegn permess. Questas dumondas vegnan tractadas da la cumissiun da gestiun (CdG) dal cussegl grond sco er dal cussegl grond sez en il rom da l'examinaziun ordinaria respectivamain da la deliberaziun dal preventiv e dal quint dal chantun. Plinavant survegn la regenza la pussaivladad da dumandar la CdG per mauns dal cussegl grond en cas urgents in credit supplementar che n'è betg suttamess al referendum da finanzas, e quai tras in conclus simpel da la regenza. Sche la CdG è da l'avis che quai saja inditgà, suttametta ella questa dumonda al cussegl grond en la proxima sessiun per al laschar decider.

L'iniziativa per in fond d'innovaziun per il Grischun è reussida
La regenza ha controllà las suttascripziuns da l'iniziativa dal pievel per in fond d'innovaziun per il Grischun ch'èn vegnidas inoltradas ils 27 da mars 2006. Ella ha constatà che l'iniziativa è reussida cun 3'219 suttascripziuns valaivlas.

L'adattaziun da la tariffa da conversiun minimala en la prevenziun professiunala vegn beneventada
La regenza grischuna va d'accord cun ils plans da la confederaziun d'adattar la tariffa da conversiun minimala en la prevenziun professiunala. Cun adattar en etappas la tariffa da conversiun dad oz 6.8 a nov 6.4 pertschient fin l'onn 2011 possia vegnir evità che las instituziuns da prevenziun vegnian sfurzadas en l'avegnir da pajar rentas ch'èn finanziadas nunsuffizientamain e che la stabilitad finanziala da la prevenziun professiunala vegnia periclitada, scriva la regenza en sia consultaziun a la confederaziun. Tenor l'avis da la regenza stoppian ins metter en dumonda da fixar la tariffa en la lescha. Quai stoppia puspè vegnir suttamess a la cumpetenza dal cussegl federal.

La regenza sustegna in proceder activ cunter la discriminaziun da dunnas
La regenza grischuna sustegna il fatg che la Svizra suttascriva il protocol facultativ dals 6 d'october 1999 tar la convenziun dals 18 da december 1979 davart l'eliminaziun da mintga furma da la discriminaziun da dunnas. L'introducziun da la procedura da communicaziun individuala per dunnas e per gruppas da persunas sco er l'introducziun da la procedura d'inquisiziun cunter stadis contrahents sajan instruments concrets per realisar in proceder activ cunter grevas discriminaziuns da dunnas, menziunescha la regenza en sia consultaziun.

Il sboz per ina lescha davart il stadi ospitant vegn beneventà
La regenza grischuna dat in parairi positiv davart il sboz da la confederaziun per ina lescha davart il stadi ospitant. La regenza sustegna l'intenziun dal cussegl federal da codifitgar la pratica en il sectur da la politica dal stadi ospitant e da reglar ils meds ils pli impurtants da la politica dal stadi ospitant en in'atgna lescha. En sia consultaziun tar il sboz per ina lescha federala davart ils privilegis, las immunitads, las facilitaziuns e las contribuziuns finanzialas che la Svizra conceda sco stadi ospitant (lescha davart il stadi ospitant) propona la regenza dentant che la confederaziun duaja indemnisar ils chantuns per incumbensas supplementaras.

Da vischnancas e regiuns
- Laax: Cun resalva d'ina contribuziun federala da 48 pertschient vegn garantida ina contribuziun chantunala da 33.6 pertschient als custs imputabels da la meglieraziun generala da Laax da 7'974'000 francs, quai che correspunda a 2'679'264 francs.
- Morissen: Als custs per construir e per sanar il rempar da l'aual da la Val Nulens en la vischnanca da Morissen vegn garantida ina contribuziun chantunala da 237'160 francs.
- Preaz: Per renovar il provediment d'aua - che vegn cumbinà cun l'utilisaziun d'energia - vegn concedida e deliberada a la vischnanca da Preaz ina contribuziun da 381'579 francs als custs cun dretg da contribuziun.
- Sched: Cun resalva che la confederaziun paja la contribuziun garantida als custs imputabels per engrondir la via da colliaziun da Sched a Veulden, traject da Sched sura a Plazza, vegn garantida a l'associaziun da meglieraziun da Sched ina contribuziun chantunala da maximalmain 328'104 francs.
- Val S. Pieder: Il project per reparar il rempar da lavinas "Hora" en la vischnanca da Val S. Pieder vegn approvà. Als custs cun dretg da subvenziun dad 1'295'000 francs vegn garantida ina contribuziun chantunala da 13 pertschient u da maximalmain 168'350 francs.
- Ziràn-Andeer: La regenza ha approvà il project dals trajects 2 e 3 da la nova via da velos da Ziràn ad Andeer cun ina lunghezza totala da 1796 meters sin il territori da las vischnancas da Ziràn, da Pignieu e da Donat. Als custs paja il chantun ina contribuziun maximala da 400'000 francs.
- San Vittore: Il plan general d'avertura 1:5'000 "Access a la A13 / avertura da la zona d'industria" dal 1. da mars 2004 da la vischnanca da San Vittore vegn approvà cun ina resalva.
- Arosa: Il plan da zonas 1:1'000 "zona d'abitar per persunas indigenas / Florentinum", concludì da la vischnanca d'Arosa ils 5 da zercladur 2005, sco er il plan da zonas 1:1'000 "zona per edifizis e stabiliments publics (serenera)" vegnan approvads.
- Arvigo: La revisiun parziala da la planisaziun locala, concludida ils 4 da zercladur 2004 da la vischnanca d'Arvigo, vegn approvada.
- San Murezzan: La revisiun parziala da la lescha da construcziun da la vischnanca da San Murezzan, ch'era vegnida concludida ils 27 da november 2005, vegn approvada. L'approvaziun da la revisiun parziala da l'artitgel 68 (extensiun da la regulaziun dal contingent sin la zona speziala Serletta) succeda pli tard en in conclus da la regenza separà.

Contribuziuns chantunalas a differentas instituziuns
- Pendicularas Breil - Vuorz - Andiast SA: Per remplazzar la sutgera Vuorz - Alp Dado vegnan garantids a las pendicularas Breil - Vuorz - Andiast SA ina contribuziun chantunala da maximalmain 286'177 francs sco er in credit d'agid d'investiziun senza tschains da 1'700'000 francs da la confederaziun.
- Uniun "lain grischun": A l'uniun "lain grischun" vegn garantida per l'onn 2006 ina contribuziun da 300'000 francs per las finamiras fixadas en il rom dal project da promoziun "lain grischun".
- Ediziun dal "Necrologium Curiense": Per reproducir e per edir sco facsimile il "Necrologium Curiense" (annuaris da la catedrala da Cuira) dal 11avel fin il 15avel tschientaner vegn sustegnì l'archiv dal stadi dal Grischun cun ina contribuziun da 35'000 francs.
- Festival da teater: Il festival da teater dals 19/20 da november 2006 - che vegn organisà da la federaziun svizra dal teater per uffants e per giuvenils (ASTEJ) a chaschun dal di da l'uffant en la Svizra taliana ed en l'Italia dal nord - vegn sustegnì cun ina garanzia da deficit da maximalmain 10'000 francs.

Projects da vias
La regenza ha approvà totalmain 17'800'000 francs per construir e per sanar divers trajects da via:
- via d'Engiadina: Vinadi - cunfin dal pajais
- via dal pass dal Fuorn: Valplaun - Votas
- via da Surin: Caplutta - Schenaus
- via d'Engiadina: sviament d'Ardez
- via da Fideris: Nü Gaden - Platz
- via da Lunden: Hinterlunden
- via da Tarasp: Scuol - Tarasp
- via naziunala A13c: traject da mantegniment dal guaud da Cassana
- via naziunala A13c: Pian San Giacomo - Malabarba
- via naziunala A13c: rampa d'access Rofla
- via naziunala A13c: sviament da Roveredo
- via dal Flüela: correcziun da la via tar il passadi dal Höfjibach
- via dal Malögia: Stampa, en il vitg
- via dal Schin: punt a spunda Freihof
- via da Breil: punt a spunda Crusch
- via taliana: Ponte Moesa - Croce Bianca

Chanzlia chantunala dal Grischun
Gremi: regenza
Funtauna: rg chanzlia chantunala dal Grischun