Per la sessiun d'atun 2006 da las chombras federalas a Flem Laax Falera, che ha lieu dals 18 da settember fin ils 6 d'october 2006, ha l'organisaziun chantunala dal project elavurà ina pagina d'internet. Sut l'adressa www.sessiun.ch pon persunas interessadas s'infurmar a partir d'immediat detagliadamain davart la sessiun che ha lieu durant trais emnas en il Park Hotel Waldhaus a Flem.
La pagina d'internet www.sessiun.ch è vegnida elavurada da l'organisaziun chantunala dal project e sa drizza a las commembras ed als commembers dal parlament sco er a tut las persunas interessadas, cunzunt a quellas che vulessan visitar la sessiun d'atun 2006 a Flem Laax Falera. Las infurmaziuns stattan a disposiziun en las quatter linguas rumantsch, tudestg, franzos e talian.
Sin la plattafurma sa chattan tranter auter indicaziuns generalas davart il chantun Grischun, davart la regiun Surselva, davart las vischnancas da Flem Laax Falera sco er davart il Park Hotel Waldhaus. Las infurmaziuns duain permetter in'orientaziun svelta. Links ad autras paginas d'internet dattan la pussaivladad da sa fatschentar pli detagliadamain cun ils differents temas.

Infurmaziuns utilas per visitadras e per visitaders
La pagina d'internet cuntegna er elements multimedials: Uschia pon ins per exempel guardar in film davart il chantun Grischun. Ultra da quai chattan ins in'atgna rubrica cun infurmaziuns davart il manaschi parlamentar e davart l'urari da sessiun. Medemamain vegn inditgada l'adressa da contact per far la preannunzia, sch'ins vul visitar las sesidas dals cussegls cun gruppas da 10 persunas u dapli. En l'internet han persunas interessadas ultra da quai la pussaivladad da reservar directamain in alloschi en la regiun.
Tschertas rubricas vegnan a sa preschentar cumplainamain pir curt avant u durant la sessiun. Uschia vegnan singulas rubricas da la homepage anc a vegnir cumplettadas ed extendidas. Communicaziuns actualas ed infurmaziuns davart la sessiun vegnan publitgadas cuntinuadamain. En il sectur da las medias vegn tranter auter purschida ina revista da pressa. Ina rubrica infurmescha plinavant davart il center da visita ch'è la porta d'entrada a la sessiun e che serva sco center d'infurmaziun, d'eveniments e d'inscunter per tut las visitadras e per tut ils visitaders da la sessiun. En il center da visita - che retschaiva las visitadras ed ils visitaders sin var 600 meters quadrat en la halla da curling sin l'areal dal Park Hotel Waldhaus - sa preschenta il Grischun en moda variada e surprendenta. Temas or dals secturs da l'economia, da la vita, da la cultura sco er dal temp liber e da la recreaziun - temas ch'ins po percepir en moda interactiva - vegnan a render in bun pau pli enconuschent il chantun il pli grond da la Svizra a las visitadras ed als visitaders.

A la fin da la sessiun ina festa populara en l'arena da las Alps
La homepage vegn cumplettada cun infurmaziuns davart las duas occurrenzas publicas durant la sessiun. In dumber limità da visitadras e da visitaders po prender part a la festa d'avertura ils 18 da settember 2006. Cun ina festa populara enturn il Lai grond a Laax vegn serrada la sessiun, e quai la saira dals 5 d'october 2006. Cun questa chaschun duain las commembras ed ils commembers da las chombras federalas giudair anc in giada la varietad e l'ospitalitad dal chantun Grischun.

Las lavurs preparativas procedan tenor plan
En vista a la realisaziun da l'emprima sessiun en il territori linguistic rumantsch procedan las lavurs preparativas ensemen cun ils servetschs dal parlament da la confederaziun tenor plan. En il fratemp èn vegnids elavurads ils concepts detagliads che mancavan anc per ils differents ressorts. Quests ressorts cumpiglian il program accumpagnant uffizial sco er ils secturs infrastructura, logistica e segirezza. Actualmain vegnan prendidas per mauns las mesiras da realisaziun concretas. Mez matg vegn infurmada la publicitad pli detagliadamain davart las purschidas dal center da visita per las visitadras e per ils visitaders. Il cumenzament da zercladur è planisada in'orientaziun a las medias tras ils servetschs dal parlament a Berna cun la participaziun da las ospitantas e dals ospitants dal Grischun.

Persuna che dat infurmaziuns:
dr. Claudio Riesen, chancelier, tel. 081 257 22 21

Gremi: organisaziun dal project
Funtauna: rg chanzlia chantunala dal Grischun