En sia responsabladad sco represchentanta da l'acziunari principal è
la regenza s'occupada da la renovaziun dal cussegl administrativ da la
viafier retica. Cun quai vul ella garantir la cuntinuitad tar la gestiun
da l'interpresa. Per quest motiv è ella sa decidida da preparar ina
renovaziun dal cussegl administrativ en etappas. En quest connex ha la
regenza acceptà la proposta da dr. Aluis Maissen e da Lorenz Zinsli -
ch'èn stads durant blers onns commembers dal cussegl administrativ - da
renunziar ad in'ulteriura reelecziun per garantir la cuntinuitad da
gestiun. Tant dr. Aluis Maissen, dals onns 1991 fin 1998 commember dal
cussegl administrativ ed a partir dal schaner 2000 president dal cussegl
administrativ, sco er Lorenz Zinsli, dapi l'onn 1982 vicepresident dal
cussegl administrativ, han influenzà decisivamain il svilup da la
viafier retica. Domadus èn s'identifitgads fermamain cun la viafier
retica e s'engaschads meritaivlamain per ses svilup. Lur via è stada
caracterisada da differents terms impurtants per l'interpresa. En
spezial sajan numnads qua:
l'engrondiment dal traject da la viafier retica cun construir il
tunnel dal Veraina, l'installaziun d'ina contabilitad e d'ina controlla
che lavuran tenor princips moderns, la renovaziun da la direcziun,
l'acquisiziun da nov material rullant, la finanziaziun restanta da la
cassa da pensiun, il svilup d'ina strategia, l'introducziun d'in
risk-management sco er la conclusiun d'in contract da lavur da firma.
Per lur engaschament a favur da la viafier retica - in engaschament
durant blers onns ch'è stà curunà da success - engrazia la regenza als
commembers dal cussegl administrativ che demissiuneschan, signur dr.
Aluis Maissen e signur Lorenz Zinsli.
La regenza è sa decidida da remplazzar ils commembers dal cussegl
administrativ partents tras signur Benno Burtscher, advocat, Valbella, e
tras signur Heinz Dudli, insch. dipl. SPF, Zizers. Grazia a lur
experientschas professiunalas adempleschan domadus las pretensiuns che
la regenza fa per commembras e per commembers dal cussegl administrativ
e cumpletteschan uschia excellentamain ils commembers dal cussegl
administrativ che vegnan proponids per la reelecziun.
Ultra da quai recumonda la regenza al cussegl administrativ cumponì
da nov d'eleger signur Hans-Jürg Spillmann, consulting group da las
viafiers federalas, Berna, sco president dal cussegl administrativ.
Signur Spillmann posseda - grazia a sia scolaziun e pervi da sias
activitads professiunalas - tut las premissas per mantegnair la qualitad
directiva a la testa dal cussegl administrativ da la viafier retica. Sco
econom da manaschi ha el pudì rimnar vastas experientschas en il
top-management da las viafiers federalas. El è tranter auter stà
responsabel che la viafier 2000 è vegnida messa en funcziun a temp per
ils 12-12-2004. Hans-Jürg Spillmann, annada 1945, è maridà e bab da dus
uffants creschids. El discurra quatter linguas ed è dapi l'onn 2004
commember dal cussegl administrativ da la viafier retica.
La regenza recumonda al cussegl administrativ d'eleger signur Heinz
Dudli sco vicepresident da la viafier retica.
Persuna che dat infurmaziuns:
president da la regenza Claudio Lardi, schef dal departament
d'educaziun, cultura e protecziun da l'ambient, tel. 081 257 27 01
Gremi: regenza
Funtauna: rg chanzlia chantunala dal Grischun