Navigation

Inhaltsbereich

  • Erste Mitteilung
  • Neuen Beitrag einfügen
Il chantun Grischun vul distgargiar la lavur administrativa d'interpresas pitschnas e mesaunas (IPM). La regenza grischuna ha prendì enconuschientscha dal rapport correspundent dal departament da l'intern e da l'economia publica cun il titel "Distgargia administrativa per las IPM en il chantun Grischun" ed ha surdà las incumbensas ch'èn necessarias per realisar la strategia generala che vegn proponida en il rapport.
La strategia s'orientescha a duas varts. Per l'ina duain las chargias administrativas existentas vegnir reducidas en moda reactiva, per l'autra duain chargias supplementaras vegnir evitadas en moda preventiva. Sco mesira preventiva concreta ha la regenza concludì d'introducir ina valitaziun da las consequenzas da la regulaziun (VCR) per novs relaschs chantunals. Tar la VCR sa tracti da mussar las consequenzas per l'economia, en cas ch'ina lescha vegn elavurada u revedida. En cas spezials respectivamain tar projects da lescha cun consequenzas spezialas per las IPM duai plinavant vegnir fatg in test dad IPM. Ultra da quai vegn stgaffì in "gremi da coordinaziun per la politica da las IPM" che duai garantir la colliaziun cun l'economia.
Las mesiras reactivas sa concentreschan sin la distgargia administrativa dals process centrals da las IPM. Latiers tutgan tranter auter ils secturs: fundaziun d'ina interpresa, permissiuns e taglias. Sco mesira accumpagnanta èsi previs d'applitgar dapli il e-government sco er da crear in post central d'infurmaziun e da coordinaziun en l'administraziun. Las incumbensas vegnan ussa elavuradas vinavant en differents projects parzials. Suenter trais onns duai vegnir decidì sin fundament d'in giudicament davart la cuntinuaziun e davart la concepziun definitiva.

Il numerus clausus vegn abolì
La regenza grischuna ha abolì las disposiziuns davart il numerus clausus. Ella ha concludì ina revisiun parziala correspundenta da l'ordinaziun davart ils examens d'admissiun a las scolas medias grischunas. La regenza è vegnida a la conclusiun che en il chantun Grischun - gist tuttina sco en il chantun Glaruna - manchia la basa legala necessaria per il numerus clausus. Ultra da quai è l'ordinaziun vegnida cumplettada cun ina nova disposiziun, tenor la quala ils examens d'admissiun 2006 per la 2. classa dal gimnasi inferiur e per la 6. classa dal gimnasi n'han betg lieu.
La revisiun parziala vegn messa en vigur retroactivamain per il 1. da mars 2006. Uschia na vegn la regulaziun da princip er betg pli applitgada per ils examens d'admissiun ch'èn vegnids exequids ils 20 ed ils 21 da mars da quest onn per la 3. classa dal gimnasi respectivamain per la 1. classa da la scola media professiunala e da la scola media commerziala. La gruppa directiva per ils examens d'admissiun a las scolas medias grischunas che fixescha la scala da notas e da puncts e che prenda las decisiuns d'admissiun è vegnida incumbensada da far ina nova valitaziun dals examens d'admissiun da quest onn. Quai pertutga quellas candidatas e quels candidats che n'èn betg rangads sin ina plazza che permetta da frequentar ina scola media grischuna. Las novas decisiuns d'admissiun en chaussa vegnan tramessas a las persunas pertutgadas. Tenor l'avis da la regenza na vegn ina nova valitaziun dals examens anteriurs betg en dumonda.

Da vischnancas e regiuns
- Tour de Suisse en il Grischun: La regenza ha permess las rutas per las trais etappas dal tour de Suisse 2006 en il chantun Grischun. I sa tracta da la 6avla etappa da Fiesch a La Punt (gievgia, ils 15 da zercladur 2006), da la 7avla etappa da San Murezzan ad Ascona (venderdi, ils 16 da zercladur 2006) sco er da la 8avla etappa dad Ambri sur ils pass Lucmagn ed Alpsu ad Ambri (sonda, ils 17 da zercladur 2006).
- Küblis: Il plan da zonas e plan general da furmaziun 1:2'000 dals 15 d'avrigl 2005 da la vischnanca da Küblis vegn approvà cun differentas cundiziuns. Il plan general da furmaziun 1:2'000 dals 15 d'avrigl 2005 vegn approvà.
- Laax: Il plan da zonas e plan general da furmaziun 1:2'000 "midadas e cumplettaziuns" dals 16 da december 2005 da la vischnanca da Laax vegn approvà areguard las determinaziuns sistidas en connex cun la midada da la zona da privel en il territori da Murschetg.
- Partenz: La regenza ha approvà il plan directiv regiunal "territoris per plazzas da lavur" concludì da la radunanza da delegadas e da delegads da la corporaziun regiunala Pro Partenz ils 10 da november 2005 e l'ha declerà sco liant per las autoritads dal chantun Grischun.
- Alvagni: La regenza ha approvà il project da rempars cunter crudada da crappa "Crap digls Noms" da la vischnanca dad Alvagni. Als custs cun dretg da subvenziun dad 1'250'000 francs vegn garantida ina contribuziun chantunala da 15 pertschient u da maximalmain 187'500 francs.

Contribuziuns chantunalas a differentas instituziuns
- Agids d'investiziun: La regenza ha empermess a la vischnanca da Puschlav per il stabiliment nov da la patinera artifiziala a Le Prese sco er a la vischnanca da Roveredo per il Centro Regionale dei Servizi contribuziuns chantunalas da circa 510'000 francs ed emprests d'agids d'investiziun da la confederaziun da 2'400'000 francs.
- Collecta dal di da rogaziun: Il retgav da la collecta dal di da rogaziun va quest onn en favur - mintgamai per in terz - da la fundaziun per umans cun disturbis da percepziun en il Grischun, da l'uniun "il maun offert"/pastoraziun al telefon da la Svizra orientala e da la fundaziun "Gott hilft".
- Agid umanitar: A la caritas vegn pajada ina contribuziun da 10'000 francs per l'acziun d'agid en favur da las unfrendas da las inundaziuns en l'Europa da l'ost.
- Societad da musica da Vignogn: A la societad da musica da Vignogn vegn concedida ina contribuziun maximala da 6'000 francs per ina instrumentaziun parziala.
- Societad da musica da Tavau: A la societad da musica da Tavau vegn concedida ina contribuziun maximala da 7'200 francs per in'unifurmaziun nova.
- Club da hockey da Tavau: Il club da hockey da Tavau survegn 7'200 francs dal fond da sport per l'acquisiziun da material da goli.

Projects da vias
La regenza ha approvà totalmain 4'200'000 francs per construir e per sanar divers trajects da via:
- via dal Bernina: Diavolezza - Ospiz dal Bernina
- via sursilvana: sviament da Flem
- via dal Schin: Punt da Solas - tunnel d'Alvaschagn
- via dal Malögia: Plaun dal Crot - Malögia

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun
Neuer Artikel