Navigation

Inhaltsbereich

  • Erste Mitteilung
  • Neuen Beitrag einfügen
L'emna passada ha il fittadin dal Lai da Tarasp chattà divers giombers nobels morts en vischinanza da la riva. Ina controlla pli detagliada tras collavuraturas e tras collavuraturs da l'uffizi da chatscha e pestga ha mussà ch'ina gronda part da l'effectiv da giombers dal Lai da Tarasp è crappada. Il motiv da questa muria n'è anc betg enconuschent. Ils effectivs dals peschs e da las conchiglias grondas en il lai n'èn però betg pertutgadas da quai.
Suenter ch'il glatsch sin il Lai da Tarasp è puspè luà, ha il fittadin dal lai, signur Johann Fanzun, constatà che dunsenas da giombers nobels sa chattavan morts en vischinanza da la riva. Immediatamain ha el infurmà la surveglianza chantunala da pestga che ha stuì confermar displaschaivlamain a chaschun d'in emprim gir enturn il lai che tschients da giombers nobels eran crappads. Malgrà ina tschertga intensiva en l'aua bassa n'han pudì vegnir chattads nagins exemplars vivents. Per ulteriurs scleriments èn ina sfunsadra ed in sfunsader ids en il lai la dumengia passada. Sin ina lunghezza da circa 100 meters è la riva dal lai uschia vegnida controllada sistematicamain, sch'i dat giombers vivs. La sfunsadra ed il sfunsader han constatà che tut ils cuvels da giombers eran vids e ch'il funs dal lai davant ils cuvels sumegliava ad in santeri da giombers nobels da tut las grondezzas. Ils giombers nobels morts eran per gronda part gia smarschids fermamain u avevan morsas ed eran magliads per part. Quai è in indizi per il fatg che la muria aveva cumenzà gia avant ditg, ch'ella n'aveva dentant betg pudì vegnir constatada pervi da la cuverta da glatsch. La fin finala ha pudì vegnir chattà mo gist in exemplar viv.
Cun scleriments dal post per examinar peschs da l'ospital d'animals a Berna duain uss vegnir eruids ils motivs pussaivels da questa muria da giombers. Perquai che tant l'effectiv dals peschs sco er tal da las conchiglias grondas en il Lai da Tarasp sa mussa saun e salv, po vegnir exclusa ina mancanza d'oxigen u l'effect d'ina substanza toxica sco raschun da la mort dals giombers. Pli probabel è l'ipotesa d'ina malsogna specifica per giombers ed epidemica, chaschunada da virus, da bacterias u da bulieus.

Gremi: uffizi da chatscha e pestga dal Grischun
Funtauna: rg uffizi da chatscha e pestga dal Grischun
Neuer Artikel