La regenza ha approvà la planisaziun d'utilisaziun che la vischnanca da Domat aveva concludì ils 27 da november 2005 per realisar ina resgia da la firma Stallinger sin l'areal visavi la Ems-Chemie. A medem temp ha ella concedì la permissiun da runcar il guaud da tieu che sto vegnir allontanà. Las organisaziuns per la protecziun da l'ambient avevan formulà tschertas cundiziuns per salvar lur dretg da recurs. En ses conclus tegna la regenza ussa per gronda part quint da talas. Tranter auter ordinescha ella d'installar ina cumissiun d'accumpagnament ecologic, en la quala èn represchentadas er las organisaziuns per la protecziun da l'ambient. Sia incumbensa è da planisar e da realisar en detagl las differentas mesiras substitutivas ecologicas per la perdita dal guaud da tieu e dals prads sitgs. Ultra da quai è ina posiziun dal departament da construcziun, traffic e selvicultura vegnida declerada sco part integrativa impegnativa dal conclus d'approvaziun. En quella èn formuladas las directivas co che la politica chantunala forestala duai sa sviluppar en connex cun la construcziun da la resgia e cun tge mesiras che las consequenzas dal manaschi da la resgia duain vegnir mitigiadas per il guaud e per l'ambient. Cun questa approvaziun da la regenza han la vischnanca da Domat ed il chantun Grischun fatg in pass impurtant en connex cun lur stentas da domiciliar ina resgia en il Grischun che arriva da cumpeter cun la concurrenza internaziunala. La procedura per la permissiun da construcziun da vart da la vischnanca sto anc vegnir fatga. Cun l'inoltraziun da la dumonda da construcziun per ils stabiliments d'avertura e per la resgia sco tala tras la firma Stallinger ston ins far quint anc questa primavaira.

Persuna che dat infurmaziuns:
cusseglier guvernativ Hansjörg Trachsel, schef dal departement da l'intern e da l'economia publica, tel. 081 257 23 01

Gremi: regenza
Funtauna: rg chanzlia chantunala dal Grischun