Il servetsch social per dumondas da dependenza (SSD) porscha ina cussegliaziun professiunala per umans cun problems da dependenza e per lur confamigliaras e confamigliars. Cun quatter cussegliadras e cussegliaders sustegna il SSD actualmain 175 persunas.
La gronda prontezza da dependenza e la problematica che resulta da quai han caracterisà essenzialmain la politica durant ils ultims onns ed han chaschunà che la politica da dependenza e da drogas è daventada finanzialmain pli chara ed administrativamain pli pretensiusa. La politica da dependenza e da drogas actuala dal chantun e da la confederaziun sa basa sin las quatter pitgas da la repressiun, da la prevenziun, da la cussegliaziun / da la terapia sco er da l'agid da survivenza.
Il servetsch social per dumondas da dependenza (SSD) spezialisà porscha agid tant a persunas ch'èn periclitadas sco er a persunas ch'èn gia malsaunas ed a lur confamigliaras e confamigliars. Persunas dependentas e lur confamigliaras e confamigliars duain vegnir cuntanschidas uschè baud sco pussaivel. Quellas duain s'acquistar l'abilitad da renunziar a lur cumportament, da sviluppar pussaivladads da dumogn raschunaivlas e d'emprender ad agir en atgna responsabladad.
Dapi il 1. da schaner 2006 maina Andrée Schirtz il SSD. En il SSD cusseglian actualmain quatter cussegliadras e cussegliaders 175 persunas en lur situaziuns mintgamai fitg individualas. Fin la fin da l'onn ston vegnir elavurads 220 dossiers. In pau dapli ch'in terz da las clientas e dals clients s'annunzia pervi da problems cun drogas diras (opiats, cocain), in ulteriur terz en connex cun l'alcohol, main ch'in quart inditgan problems cun cannabis, ina pitschna part ha problems cun medicaments u cun autras drogas. Tar la part la pli gronda dals cas vegn la problematica da la dependenza accumpagnada da difficultads en il sectur social (finanzas, lavur, abitaziun).

Aut grad da professiunalisaziun
Il SSD è sa sviluppà da l'anteriur post da cussegliaziun per giuvenils e per dumondas da drogas ch'è vegnì serrà il schaner 2004. Per adattar la lavur da cussegliaziun als basegns actuals è la cussegliaziun per giuvenils vegnida surdada al servetsch social regiunal da Cuira e la cussegliaziun per dumondas da dependenza al servetsch social per dumondas da dependenza. Quel è actualmain ina cumponenta impurtanta da tut la lavur chantunala cunter la dependenza e cunter drogas. Igl è spezialmain impurtant che las colliaziuns funcziuneschian tar questa lavur per pudair metter a disposiziun ina purschida cumplessiva e professiunala da cussegliaziun e da tractament. En quest connex s'orientescha il SSD primarmain vi da la lavur cun ils umans e cun lur problems da dependenza e main vi dals meds specifics che chaschunan ina dependenza.

Garanzia da qualitad
L'experientscha ha mussà che indrizs ambulants èn il meglier en cas da reagir sin las difficultads cumplexas da persunas che pateschan d'ina dependenza, e quai en moda flexibla e sistematica cun porscher in tractament adequat. Perquai che qua na vegn betg mo collavurà en moda interdisciplinara, mabain er fatga - cun ina tenuta da basa senza pregiudizis - la tscherna optimala tar las metodas da cussegliar e da tractar.
Per garantir en moda persistenta la professiunalitad e la qualitad da las purschidas da la cussegliaziun per dumondas da dependenza che vegnan fatgas en ils servetschs socials chantunals repassa l'uffizi dal servetsch social ses concept da cussegliaziun, e quai tenor la norma da qualitad dal sistem da referenza "QuaTheDa" che vegn lantschà e dirigì da l'uffizi federal da sanadad publica.

Gremi: servetsch social per dumondas da dependenza
Funtauna: rg servetsch social per dumondas da dependenza