Ils 10 da matg ha lieu en la Klibühni a Cuira la festa da finiziun per las dudesch absolventas dal curs da basa grischun da la cuminanza da lavur da las bibliotecas svizras da lectura publica (CLP). La cumissiun chantunala da bibliotecas ha organisà quest curs per la tschintgavla giada.
Dal settember 2005 fin l'avrigl 2006 han dudesch dunnas interessadas absolvì durant 27 dis da curs la scolaziun fundamentala vasta e basada sin la pratica en divers secturs bibliotecars. Questa scolaziun supplementara qualifitgescha las participantas dal curs da surpigliar tut las lavurs che resultan en ina biblioteca da scola u da vischnanca. L'engaschament è sa cumprovà. La cumissiun da bibliotecas dal Grischun sa legra che tut las absolventas han reussì l'examen cun success e che tuttas survegnan il certificat da la CLP.
L'onn 1993 ha leger.GR - Giuventetgna e medias Grischun (da lez temp cuminanza da lavur grischuna da cudeschs per la giuventetgna, BAJ) organisà l'emprim curs fundamental. Dapi l'onn 2000 ha il chantun Grischun in nov concept da scolaziun. La scolaziun da bibliotecaras vegn purschida da la cumissiun chantunala da bibliotecas. Il curs fundamental CLP cumenza mintgamai il settember e terminescha il matg cun in examen final.
In certificat survegnan:
Rahel Antoniazzi, Niederurnen; Vera Bay-Sachs, Schiers; Denise Bürgmann, Jenaz; Nahid Koochekzadeh, Cuira; Karin Maron, Flem; Daniela Meier, Valbella; Claudia Michel, Tavau Monstein; Gaby Monigatti, Favugn; Loni Patt Engel, Langwies; Patrizia Pavone Garaguso, Cuira; Marianne Spichtig, Haslen; Claudia Tinner, Igis.

Gremi: biblioteca chantunala dal Grischun
Funtauna: rg biblioteca chantunala dal Grischun