Navigation

Inhaltsbereich

  • Erste Mitteilung
  • Neuen Beitrag einfügen
La regenza ha approvà il project per construir da nov la chasa da scola da l'institut per furmaziun supplementara professiunala (IFSP) sper la staziun da Cuira. A instituziun purtadra vegn empermessa ina contribuziun da construcziun chantunala da 4'957'000 francs. Quest import correspunda a 50 pertschient dals custs d'investiziun imputabels da 9'914'688 francs. Questa garanzia vegn fatga cun la resalva che l'uffizi federal da furmaziun professiunala e da tecnologia subvenziuneschia er quest project da construcziun. Tenor il preventiv dals custs fa l'instituziun purtadra quint cun custs da construcziun en l'autezza da totalmain 17'700'000 francs.
Quest project duai meglierar la valur ed il posiziunament dal IFSP sco scola professiunala superiura. En quest connex sa mussa il lieu sper la staziun sco optimal per il IFSP che sa chatta actualmain a la Ringstrasse a Cuira.

Da vischnancas e regiuns
- St. Antönien: La regenza ha approvà la cunvegna dals 23 da favrer 2006 da las vischnancas da St. Antönien e da St. Antönien-Ascharina concernent la fusiun da questas duas vischnancas a la nova vischnanca da St. Antönien.
- Tschlin: Il plan da zonas parzial 1:2'000 Val Gronda da la vischnanca da Tschlin dals 9 da november 2005 vegn approvà.
- Soglio: La revisiun parziala da la planisaziun locala, concludida ils 7 d'october 2005 da la vischnanca da Soglio, vegn approvada.
- Mesauc: La revisiun parziala da la planisaziun locala, concludida ils 19 d'october 2005 da la vischnanca da Mesauc, vegn approvada.
- Samedan: La contribuziun a la vischnanca da Samedan per revitalisar la zona umida da Cristansains vegn augmentada per 22'400.- francs da 76'800.- francs sin 99'200.- francs. Quai correspunda ad ina part da 16 pertschient dals custs totals da 620'000.- francs.
- 1. maraton da velos d'Engiadina: A l'organisaziun dal "1. maraton da velos d'Engiadina" ha la regenza concedì la permissiun d'utilisar las rutas previsas tenor il plan da traject en il chantun Grischun dumengia, ils 16 da fanadur 2006.
- 13. giro da velo da trais pajais/race across the Alps: A l'organisaziun dal "13avel giro da velo da trais pajais" e dal "race across the Alps" vegn concedida la permissiun d'utilisar las rutas previsas tenor il plan da traject en il chantun Grischun per lur cursas da dumengia, ils 25 da zercladur 2006, sco er da venderdi, ils 7, e da sonda, ils 8 da fanadur 2006.

Contribuziuns chantunalas a differentas instituziuns
- Agid d'investiziun: Per il center regiunal puntoBregaglia vegnan garantids a la puntoBregaglia SA a Vicosoprano ina contribuziun chantunala da maximalmain 67'336 francs sco er in credit d'agid d'investiziun senza tschains da 400'000 francs da la confederaziun.
- Festa da lutga da la Svizra dal nordost: Il chantun Grischun regala il 1. premi da la festa da lutga da la Svizra dal nordost 2007 a Cazas, in taur dal bain puril dal stabiliment chantunal da Realta d'ina valur da 5000 francs.

Projects da vias
La regenza ha approvà totalmain 4'600'000 francs per construir e per sanar divers trajects da via:
- via d'Avras: Calantgil - Cröt
- a la via sursilvana, via da Tavanasa: punt sur il Rain anteriur avant Tavanasa
- via dal Malögia: traject da Silvaplauna
- via da l'Engiadina: Islas - Arvins

Chaussas persunalas
- Claus Platten, domicilià a Schaffusa, è vegnì elegì sco medi superiur a l'ospital chantunal da dunnas Fontana a Cuira.

Chanzlia chantunala dal Grischun

Gremi: Regenza
Funtauna: rg chanzlia chantunala dal Grischun
Neuer Artikel