Il project grischun d'intervenziun cunter violenza a chasa edescha in manual per lavurantas socialas e per lavurants socials che vegnan confruntads cun violenza a chasa en lur lavur da cussegliaziun.
Co duain ins reagir, sch'i vegn menziunà il tema violenza a chasa en l'ura da cussegliaziun? Tge pussaivladads d'agir han lavurantas socialas e lavurants socials en quests cas? Tge pretenda la lescha? Tge instituziuns èn cumpetentas? Cura ston ins clamar la polizia? Las spezialistas ed ils spezialists dal champ social èn savens confruntads cun talas dumondas. Per ch'ellas e per ch'els dumognian en moda cumpetenta questa situaziun, ha il project grischun d'intervenziun cunter violenza a chasa elavurà in manual che accumpogna las persunas spezialisadas en lur lavur quotidiana. Il nov manual "Violenza en relaziuns da partenadi" cuntegna infurmaziuns e renviaments impurtants e dat impuls per agir che sustegnan il contact cun las victimas da la violenza a chasa e che duain professiunalisar la lavur. El sa basa tranter auter sin il concept d'intervenziun DOTIP ch'è vegnì creà a l'institut per la medischina sociala e preventiva a Losanna. Quest manual sa drizza a las spezialistas ed als spezialists dal champ social en il chantun Grischun. Il concept è vegnì adattà e cumplettà per il chantun Grischun en il rom dal project d'intervenziun cun l'accumpagnament professiunal d'ina gruppa da lavur da la maisa radunda. Uschia realisescha il project grischun d'intervenziun cunter violenza a chasa ina da sias finamiras, numnadamain quella d'optimar la collavuraziun tranter tut las instituziuns ch'èn involvidas en quests cas sco er da meglierar il contact professiunal e la protecziun da las victimas da violenza a chasa en il Grischun. Ils 18 da matg 2006 ha lieu a Cuira ina dieta da spezialistas e da spezialists per lavurantas socialas e per lavurants socials davart il tema violenza a chasa. Il manual vegn preschentà a chaschun da questa occurrenza. Il manual "Violenza en relaziuns da partenadi" po vegnir empustà da spezialistas e da spezialists tar il post da stab per dumondas d'egualitad dal chantun Grischun. tel. 081 257 35 70 u info@gleichstellung.gr.ch.

Persuna che dat infurmaziuns:
Susanna Mazzetta, manadra da project tar il project grischun d'intervenziun cunter violenza a chasa, collavuratura giuridica dal post da stab per dumondas d'egualitad, tel. 079 483 74 01

Infurmaziun: Il manual po vegnir consultà - a partir da mesemna, ils 17 da matg 2006 - tar il post da stab.

Gremi: post da stab per dumondas d'egualitad
Funtauna: rg post da stab per dumondas d'egualitad