Per la candidatura da la UNESCO "La viafier retica en la cuntrada da cultura Alvra / Bernina" cumenza la fasa principala: Il dossier definitiv repassà banduna ils 19 da december 2006 il Grischun en direcziun da Paris. El vegn accumpagnà da scolaras e da scolars da Puschlav. Las duas classas vegnan a surdar il dossier al center dal patrimoni mundial da la UNESCO ils 21 da december 2006, e quai ensemen cun represchentantas e cun represchentants da la viafier retica (VR), dal chantun e da la confederaziun. Uschia decida ussa il comité dal patrimoni mundial da la UNESCO davart la candidatura. La regenza grischuna e la viafier retica èn persvadidas che la candidatura da questa transversala da las Alps cun la viafier è unica ed ha bunas schanzas.

Candidata uffiziala
Il project "viafier retica e cuntrada da cultura Alvra / Bernina" è punctual: Il dossier ch'è vegnì inoltrà il settember 2006 per l'examinaziun preliminara è vegnì adattà levamain sin fundament da las reacziuns. En spezial il chapitel concernent la "cumparegliaziun cun las viafiers da renum mundial" è vegnì approfundà cun consultar ils experts internaziunals sco Günter Dinhobl, Hans-Peter Bärtschi u Colin Divall. Cun quai è il project vegnì madir per il dossier e la candidatura "viafier retica en la cuntrada da cultura Alvra/Bernina" ha ussa il stadi uffizial. Il dossier cumpiglia 700 paginas (senza agiuntas), il plan da manaschament ch'è vegnì elavurà tenor las prescripziuns da la UNESCO cuntegna 80 paginas.

L'onn 2007 vegnan ils gremis da la UNESCO a laschar examinar il project al lieu tras expertas ed experts. Las recumandaziuns da questas expertas e da quests experts vegnan a furnir ulteriurs criteris per la sesida decisiva dal comité dal patrimoni mundial che vegn ad avair lieu la stad 2008.

Surdada inscenada
Ils 19 da december vegnan las duas classas da Puschlav, ensemen cun represchentantas e cun represchentants dal chantun e da la VR a manar il dossier a Paris ed ils 21 da december 2006, en preschientscha dals delegads permanents da la Svizra e da l'Italia, ils ambassadurs Ernst Iten e Giuseppe Moscato, a surdar il dossier a la UNESCO. L'accumpagnament tras las classas da Puschlav ha dapli che mo in caracter simbolic. Las scolaras ed ils scolars èn s'occupads ordavant intensivamain dal project da patrimoni mundial, e quai en il senn da promover la conscienza per las valurs culturalas - ina gesta che vegn a chattar in'attenziun speziala tar la UNESCO.

Gremi: organisaziun dal project per la candidatura per il patrimoni mundial da la UNESCO 2008
Funtauna: rg organisaziun dal project per la candidatura per il patrimoni mundial da la UNESCO 2008