Cun la finamira d'adattar ils effectivs da selvaschina a lur quartiers d'enviern è vegnida realisada la chatscha d'atun da tschiervs en grondas parts dal chantun. Las relaziuns extraordinarias da l'aura e da la vegetaziun han difficultà questa chatscha. Tuttina èn ils plans vegnids ademplids per passa 90%.

Dapi il settember datti in record da temperatura suenter l'auter. L'effect è stà ch'ils tschiervs èn restads anc fin il december en lur spazis da viver da stad e ch'els han pudì fugir uschia da la chatscha. Malgrà quai ha pudì vegnir cuntanschì in resultat relativamain bun cumpareglià cun la planisaziun e cun la media da blers onns. En tut mancan stgars 400 animals (9%) per ademplir il plan da prelevaziun en l'entir chantun. Ils deficits areguard il plan da prelevaziun sa repartan sin quasi tut las regiuns.
1'373 chatschadras e chatschaders èn sa participads a la chatscha d'atun. La chatscha d'atun contribuescha 900 animals al resultat final da 3'750 tschiervs schluppettads. Il resultat da la chatscha da tschiervs 2006 sa chatta in zic sut la media da blers onns, demussa dentant tut en tut ina gronda constanza. Per l'emprima giada han pudì vegnir schluppettads dus portgs selvadis durant questa chatscha.
La reducziun consequenta dals effectivs da tschiervs ha per consequenza ch'ils quartiers d'enviern na vegnan betg surexplotads. Ella gida ad evitar grondas perditas durant l'enviern e reducescha uschia la quota da selvaschina disgraziada. Uschia vegnan però er sminuids resp. impedids donns vi dal guaud e vi da culturas agriculas.

Gremi: uffizi da chatscha e pestga
Funtauna: rg uffizi da chatscha e pestga