Tar l'alloschi da giasts cunter pajament duai valair l'obligaziun
d'annunzia mo pli tar l'alloschi da persunas da l'exteriur. La regenza
grischuna ha deliberà per la consultaziun in sboz per la midada
correspundenta da las disposiziuns executivas tar la lescha d'ustaria.
Fin ussa valeva la disposiziun che, tgi che dat alloschi a persunas
cunter pajament, saja obligà d'annunziar tut las alloschadras e tut ils
alloschaders a la polizia. Da nov duai quai mo pli valair, sch'i vegn dà
alloschi cunter pajament a persunas da l'exteriur. Uschia duain las
disposiziuns chantunalas profitar da las libertads dal dretg surordinà
che prevesa mo ina obligaziun d'annunzia tar l'alloschi da persunas da
l'exteriur. Ultra da quai duai vegnir abolida l'obligaziun vertenta da
trametter il formular d'annunzia entaifer 24 uras al post da la polizia
chantunala ch'è cumpetent al lieu. Persunas che dattan alloschi duain
dentant tegnair en salv ils formulars d'annunzia durant in onn ed als
metter a disposiziun a la polizia chantunala sin dumonda.
Per las incumbensas turisticas ch'il formular d'annunzia ademplescha
ultra da quai en tscherts cas a medem temp stattan a disposiziun
alternativas. Dal puntg da vista da la regenza n'exista pia nagin motiv
d'insister vinavant a l'obligaziun d'annunzia vertenta per giasts
svizzers. Ultra da quai contribuescha la soluziun proponida da nov a
distgargiar la lavur administrativa d'interpresas pitschnas e mesaunas.
La consultaziun dura fin ils 18 d'avust 2006. Dals documents da
consultaziun pon ins prender invista en l'internet sut www.div.gr.ch
(Mitteilungen und Projekte).
La regenza refusa la nova lescha federala davart ils fatgs da guidas
e da guids da muntogna e davart la purschida d'activitads ristgadas
Tenor il puntg da vista da la regenza grischuna n'èsi betg necessari
da relaschar ina nova lescha davart ils fatgs da guidas e da guids da
muntogna e davart la purschida d'activitads ristgadas. Il sboz
preliminar regla la purschida da turas en muntogna manadas cunter
pajament, da descendas da skis manadas ordaifer las pistas marcadas e da
tschertas activitads ristgadas sco per exempel il canyoning, il
river-rafting ed il bungee jumping. El prevesa in'obligaziun da dumandar
ina permissiun per guids e per guidas da muntogna e sut tschertas
cundiziuns per persunas d'instrucziun per il sport da naiv sco er per
persunas che porschan las activitads ristgadas numnadas en la lescha.
Questas proceduras da permissiun planisadas e la certificaziun tenor il
sboz preliminar èn pli charas e pli cumplitgadas che la regulaziun
chantunala vertenta, scriva la regenza a la confederaziun en sia
resposta da consultaziun. La soluziun previsa da la confederaziun
purtass - cumpareglià cun la soluziun chantunala -dapli dischavantatgs
che avantatgs. Pervia da quai refusa la regenza il sboz preliminar ord
ponderaziuns da princip.
Il chantun Grischun ha reglà las activitads professiunalas da las
giudas e dals guids da muntogna e da las persunas d'instrucziun per il
sport da naiv dapi ils onns 1920. Dapi l'onn 2000 succeda quai cun la
lescha davart il sport da muntogna e da naiv. Per pratitgar la
professiun da guid u da guida da muntogna u da persuna d'instrucziun per
il sport da naiv dovri tenor questa lescha ina scolaziun renconuschida
ed in'assicuranza da responsabladad. Il river-rafting è reglà en il
chantun Grischun en il rom da la legislaziun executiva tar la lescha
federala davart la navigaziun interna. Dal puntg da vista da la regenza
n'exista perquai actualmain nagin basegn da remplazzar las regulaziuns
vertentas che funcziunan bain.
La regenza beneventescha l'iniziativa parlamentara "la rolla dal
cussegl federal en connex cun votaziuns dal pievel"
La regenza grischuna beneventescha l'iniziativa parlamentara "la
rolla dal cussegl federal en connex cun votaziuns dal pievel". Sco quai
ch'ella constatescha en sia resposta da consultaziun, po ella approvar
la cumplettaziun proponida da la lescha federala davart ils dretgs
politics, cun la quala il cussegl federal duai vegnir obligà d'infurmar
cumplessivamain davart ils projects tar las votaziuns federalas dal
pievel e cun la quala i duain vegnir francadas tschertas saivs
directivas areguard l'infurmaziun da las autoritads. Ella approvescha
questa cumplettaziun dentant cun la resalva che l'observaziun dals
princips d'infurmaziun statuids tras il cussegl federal stoppia esser
accessibla per in'examinaziun dal tribunal federal.
Da vischnancas e regiuns
- Beiva: Il project per la dustanza da l'aual da Valletta e da la
Gelgia sin il territori da la vischnanca da Beiva vegn approvà. Cun la
resalva da la garanzia da subvenziun da la confederaziun vegn concedida
ina contribuziun chantunala da totalmain 447'500 francs als custs
calculads da 1'790'000.- francs.
- Langwies: Il project per la dustanza da l'aual da Platz sin il
territori da la vischnanca da Langwies vegn approvà. Cun la resalva da
la garanzia da subvenziun da la confederaziun vegn concedida ina
contribuziun chantunala da totalmain 362'500 francs als custs calculads
da 1'450'000.- francs.
- Susch: Il project da protecziun cunter crudada da crappa
"Sassella" da la viafier retica e da l'uffizi chantunal da construcziun
bassa sin il territori da la vischnanca da Susch vegn approvà Als custs
cun dretg da subvenziun dad 1'000'000 francs vegn garantida ina
contribuziun chantunala da 150'000 francs.
- Ladir e Falera: La regenza ha approvà il project "donns da malaura
tar la via da guaud da Cafegns" da las vischnancas da Ladir e da Falera.
Als custs cun dretg da subvenziun da 200'000 francs vegn garantida ina
contribuziun chantunala da maximalmain 48'000 francs.
- Rueun: La regenza ha approvà il project "magasin da stalizzas" da
la vischnanca da Rueun. Als custs cun dretg da subvenziun dad 81'500
francs garantescha ella ina contribuziun chantunala da maximalmain
20'375 francs.
- Puntraschigna: La revisiun parziala da la lescha da construcziun
da la vischnanca da Puntraschigna, concludida ils 4 da fanadur 2005,
vegn approvada. Medemamain vegn approvada la lescha davart l'etappaziun
e davart la contingentaziun da la construcziun d'abitaziuns dals 4 da
fanadur 2005.
- Flem: Il plan da zonas 1:500 midada Tull dals 21 da matg 2006 da
la vischnanca da Flem vegn approvà.
- Sagogn e Schluein: Il plan da zonas e plan general da furmaziun
1:5'000 da las vischnancas da Sagogn e da Schluein, cumplettaziun da la
zona da golf, dals 19 d'avrigl respectivamain dals 26 d'avrigl 2006 vegn
approvà.
- Lon - Ziràn-Reschen: Il plan dal cunfin da vischnanca Lon -
Ziràn-Reschen vegn approvà.
Contribuziuns chantunalas a differentas instituziuns
- Uniun "Parc Ela": A l'uniun "Parc Ela", Savognin, vegn garantida
per ils onns 2006 fin 2008 ina contribuziun da gestiun da totalmain
150'000 francs che vegn pajada en parts annualas da mintgamai 50'000
francs.
- Claustra Son Jon a Müstair: Als custs cun dretg da subvenziun per
l'etappa 2006 da la restauraziun currenta da la claustra da Son Jon a
Müstair vegn pajada ina contribuziun da maximalmain 141'460 francs.
- Project d'intermediar la cultura "DA GARBALD": Il project
d'intermediar la cultura "DA GARBALD" vegn sustegnì cun ina contribuziun
unica da 10'000 francs.
- Uniun dal lavuratori da litografia e da gravura dal chastè da
Haldenstein: L'uniun dal lavuratori da litografia e da gravura dal
chastè da Haldenstein survegn ina contribuziun da gestiun unica da
10'000 francs per l'onn 2006.
- Club da ballape da Sedrun: Al club da ballape da Sedrun vegn
concedida ina contribuziun da 48'000 francs or dal fond da sport per la
construcziun nova d'ina plazza da ballape per tutt'aura.
- Club da tennis da Sedrun: Il club da tennis da Sedrun survegn ina
contribuziun da 38'500 francs or dal fond da sport per la construcziun
nova da trais plazzas da tennis e d'ina paraid da tennis.
- Club da pistolas da Claustra: Per la midada da construcziun e per
l'engrondiment da l'implant da tir cun pistolas da 25 e da 50 m survegn
il club da pistolas da Claustra ina contribuziun da 31'600 francs or dal
fond da sport.
- Associaziun grischuna da ballape: Per fundar ina squadra da
giuventetgna U14 survegn l'associaziun grischuna da ballape ina
contribuziun da 15'700 francs or dal fond da sport.
Projects da vias
La regenza ha approvà totalmain 2'460'000 francs per construir e per
sanar ils suandants trajects da via:
- via naziunala A13: Soazza - San Bernardin
- via tudestga e via da Trimmis
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun