En il Grischun duain famiglias vegnir distgargiadas pli fitg tar las
premias da la cassa da malsauns. La regenza grischuna ha deliberà per
quest intent la missiva tar ina revisiun parziala da la lescha davart
l'assicuranza da malsauns e la reducziun da las premias. Il cussegl
grond vegn a tractar la fatschenta en la sessiun d'avust.
Tenor las prescripziuns da la legislaziun federala ston ils chantuns
- a partir da l'onn 2007 - reducir per almain 50 pertschient las premias
per uffants e per persunas giuvnas creschidas en scolaziun cun entradas
pitschnas e mesaunas. Sco mesira da la politica da famiglia prevesa la
revisiun parziala ussa da reducir questas premias per 100 pertschient
fin ad entradas imputablas da 65'000 francs e sur quai, fin ad entradas
imputablas dad 80'000 francs, cun ina procentuala graduada en moda
degressiva. Sco ulteriura mesira da la politica sociala reducescha la
lescha la tariffa maximala da la resalva persunala a 10 pertschient.
Per finanziar ils custs supplementars da circa 19 milliuns francs
che resultan da quai vegn resguardada - sco basa per la reducziun da las
premias - l'autezza da las premias da furmas d'assicuranza che han ina
pussaivladad restrenschida da tscherner la furnitura ed il furnitur da
prestaziuns. Retschavidras e retschaviders da la reducziun da las
premias pon mitigiar la reducziun da las premias ch'èn decisivas per
questa reducziun cun midar per exempel ad in model d'assicuranza cun ina
media u cun in medi da famiglia. Uschia sa laschan spargnar circa diesch
pertschient da las premias da la cassa da malsauns. Plinavant vegn la
part da la facultad suttamessa a la taglia che vegn resguardada tar la
calculaziun dal dretg sin reducziun da las premias sper las entradas
dauzada per ventg pertschient.
Per finir cuntegna la revisiun parziala ina regulaziun per evitar
che la reducziun da las premias vegnia duvrada per auters intents. En
cas d'in retard da pajament da trais premias mensilas na vegn la
reducziun da las premias betg pli pajada a la persuna assicurada, mabain
a l'assicuranza, e quai fin che la persuna negligenta ha pajà tut las
premias e las participaziuns als custs.
La regenza sustegna la fusiun da las vischnancas
da St. Antönien e da St. Antönien-Ascharina
La regenza grischuna ha approvà la cunvegna davart la fusiun da las
duas vischnancas St. Antönien e St. Antönien-Ascharina a la vischnanca
nova St. Antönien e propona al cussegl grond da metter en vigur la
fusiun per il 1. da schaner 2007. Quai resorta da la missiva
correspundenta da la regenza al parlament. Il cussegl grond vegn a
tractar il project l'avust.
Las duas vischnancas che tutgan tar il circul da Luzein avevan
concludì la fusiun ils 23 da favrer 2006. Tenor l'artitgel 64 da la
constituziun dal chantun Grischun promova il chantun la fusiun da
vischnancas per garantir che lur incumbensas vegnian ademplidas en moda
cunvegnenta ed economica. La nova vischnanca survegn dal chantun ina
contribuziun da promoziun en l'autezza da totalmain 715'000 francs.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun