Cun l'emprima conferenza d'avegnir dals 5 da fanadur 2006 sin il pass dal Gottard vegn lantschà il project davart il svilup dal territori dal Gottard PREGO. A questa conferenza discuteschan represchentantas e represchentants dals chantuns Uri, Vallais, Tessin e Grischun visiuns, ideas e projects sco er ils ulteriurs pass sin la via ad in "territori dal futur dal Gottard".

In traject da muntogna sin il Gottard, Sasso San Gottardo, loipas a Goms, la Porta Alpina, parcs natirals e parcs naziunals, vias da traffic istoricas, la chombra d'aua da l'Europa, il center da cumpetenza per dumondas d'energia: quai èn elements pussaivels per il project davart il svilup dal territori dal Gottard PREGO. Cun quest project vulan ils quatter chantuns dal Gottard Uri, Vallais, Tessin e Grischun dar la direcziun al svilup territorial, economic e turistic dal territori dal Gottard.
Emprims resultats ed intenziuns èn gia fixads en il rapport "concept dal territori per il Gottard" u duain ussa vegnir concretisads. En quel ha il chantun Grischun - en collavuraziun cun ils auters chantuns - mussà e giuditgà las lingias pussaivlas per in svilup persistent en il territori dal Gottard.
Fin la mesadad da l'onn 2011 duai vegnir stabilì sin quella basa in process che vegn purtà cuminaivlamain. En l'emprima etappa vali da stabilir novas furmas da la collavuraziun tranter acturas ed acturs da la politica, da l'administraziun e da l'economia privata e da sviluppar ensemen projects e concepts transcunfinals. La mesadad da l'onn 2007 vegn il cussegl federal infurmà davart il stadi da quest process.

In'emprima conferenza d'avegnir per l'avertura
Il process vegn lantschà ils 5 da fanadur 2006 cun l'emprima conferenza d'avegnir en in lieu cun ina gronda simbolica, numnadamain sin il pass dal Gottard. En quest connex furman ils quatter chantuns dal Gottard in forum per barattar infurmaziuns, per metter en discussiun visiuns, ideas e projects, per furmar opiniuns e per elavurar ils ulteriurs pass sin la via vers in "territori dal futur dal Gottard". Cun ideas cuminaivlas, cun iniziativa e cun in spiert d'interprendider duai vegnir garantì il futur per il territori d'economia sco er dal spazi da viver da la regiun dal Gottard. L'atun e la proxima primavaira duain seguir duas ulteriuras conferenzas d'avegnir.
Il program prevesa la damaun differents referats e diversas occurrenzas da discussiun. Per il program dal suentermezdi èn previs lavuratoris per las differentas gruppas da lavur. A la conferenza d'avegnir en il museo ospizio ch'è publica sa participeschan represchentantas e represchentants dals chantuns, da las regiuns, da las vischnancas e da l'economia privata. Cun ils cussegliers guvernativs Isidor Baumann (Uri), Marco Borradori (Tessin), Jean-Michel Cina (Vallais) e Stefan Engler (Grischun) èn er represchentadas las regenzas dals quatter chantuns dal Gottard.

Gremi: departament da construcziun, traffic e selvicultura dal Grischun
Funtauna: rg departament da construcziun, traffic e selvicultura dal Grischun