La cumissiun predeliberanta dal cussegl grond ha tractà la missiva da la regenza concernent la participaziun dal chantun Grischun a la surveglianza da la LPP e da las fundaziuns da la Svizra orientala. A la sesida da la cumissiun - ch'è vegnida manada dal president Peter Wettstein - è er sa participada la cussegliera guvernativa Eveline Widmer-Schlumpf.
Sco ch'ins sa leger en la missiva da la regenza èn creschidas considerablamain ils ultims onns las pretensiuns visavi la surveglianza da las instituziuns da la prevenziun professiunala, e quai tant areguard la qualitad sco er areguard la quantitad (autezza da las facultads survegliadas). Tant ils problems sco er las regulaziuns legalas èn vegnids bler pli cumplexs. En quest senn aveva il cussegl federal installà ina cumissiun d'expertas e d'experts per "optimar la surveglianza en la prevenziun professiunala". En ses rapport ha la cumissiun pledà per ina soluziun decentrala cun autoritads regiunalas da surveglianza ch'èn legalmain, finanzialmain ed administrativamain independentas. Latiers duain ils chantuns s'unir a regiuns da surveglianza sin basa da concordats respectivamain da cunvegnas interchantunalas.
Sa basond sin las lavurs d'ina gruppa da project communabla preschentan las regenzas dals chantuns Glaruna, Appenzell dador, Appenzell dadens, Son Gagl, Grischun e Turgovia il sboz d'ina cunvegna interchantunala, en il qual la surveglianza da las instituziuns da prevenziun duai vegnir confidada ad in institut da dretg public che vegn purtà communablamain dals chantuns da cunvegna e che ha sia sedia a Son Gagl. Da la pussaivladad da confidar supplementarmain er la surveglianza davart las fundaziuns classicas a la surveglianza da la LPP e da las fundaziuns da la Svizra orientala na fa il chantun Grischun - cuntrari als chantuns Son Gagl e Turgovia e forsa anc Glaruna - ad interim anc betg diever pervi dal bun clima per fundaziuns e pervi dal grond dumber.
La cumissiun predeliberanta e la regenza èn persvadidas ch'ins po - cun concepir in center regiunal da cumpetenza - concentrar optimalmain las enconuschientschas professiunalas fermamain spezialisadas da l'economia da manaschi, da la giurisdicziun e da la prevenziun e ch'ins po tegnair quint qua tras da las pretensiuns che s'augmentan tar l'activitad da surveglianza. Uschia spetga er la cumissiun predeliberanta che la professiunalitad e la qualitad professiunala da la surveglianza vegnia augmentada e che betg l'ultim la ristga da responsabladad saja qua tras pli pitschna.
En ils chantuns da la Svizra orientala Glaruna, Schaffusa, Appenzell dadens, Appenzell dador, Son Gagl, Grischun e Turgovia vegnan (di da referenza: 31 da december 2004) la fin finala survegliadas 890 instituziuns da prevenziun cun ina facultad da 33.142 milliardas francs. Il chantun Grischun aveva ils 31 da december 2004 110 instituziuns da la prevenziun professiunala cun ina facultad totala da 3.3 milliardas francs sco er 300 fundaziuns classicas cun in volumen d'ina milliarda francs. Il cumenzament da l'activitad commerziala da la surveglianza da la LPP e da las fundaziuns da la Svizra orientala è planisà per il 1. da schaner 2008.
Suenter che l'examinaziun d'alternativas na ha betg demussà meglras soluziuns, va la cumissiun predeliberanta unanimamain d'accord cun il project da la regenza e deliberescha questa fatschenta per mauns da la sessiun d'avust 2006 dal cussegl grond.

Gremi: cumissiun predeliberanta davart la participaziun dal chantun Grischun a la surveglianza da la LPP e da las fundaziuns da la Svizra orientala
Funtauna: rg cumissiun predeliberanta davart la participaziun dal chantun Grischun a la surveglianza da la LPP e da las fundaziuns da la Svizra orientala