La regenza vegn a suttametter al cussegl grond en la sessiun d'avust in sboz per relaschar ina lescha chantunala davart las taglias communalas e davart las taglias da baselgia. La cumissiun permanenta per economia, taxas e politica da stadi dal cussegl grond ha tractà preliminarmain la missiva correspundenta da la regenza en sia sesida per mauns dal cussegl grond. Er la cussegliera guvernativa Eveline Widmer-Schlumpf è stada preschenta a quella sesida.

Tenor la constituziun chantunala veglia disponivan ils circuls, las vischnancas sco er las baselgias chantunalas e lur cumins-baselgia d'ina suveranitad fiscala. Cun la nova constituziun chantunala èn ils circuls vegnids privads da lur suveranitad fiscala. Tenor il dretg transitoric pon ils circuls anc incassar taglias fin la fin 2008.

La constituziun chantunala vertenta na cuntegna betg ina regulaziun che po vegnir applitgada directamain e che permetta a las vischnancas ed a las baselgias da far valair ina suveranitad fiscala. La suveranitad fiscala da las vischnancas politicas sco er da las baselgias chantunalas e da lur cumins-baselgia sto perquai vegnir reglada en ina lescha. Tras la nova lescha duai en emprima lingia vegnir stgaffida la basa legala necessaria per che las vischnancas e las baselgias possian incassar las differentas taglias.

Sco quai che la regenza declera en sia missiva, è la finamira da la lescha quella da chattar ina soluziun dal dretg fiscal ch'è optimala tant per las vischnancas sco er per las pajataglias e per ils pajataglias senza restrenscher l'autonomia communala en cumparegliaziun cun il status d'ozendi. Da la vart da las vischnancas duai l'applicaziun dal dretg vegnir simplifitgada cun prender en mira ina pratica chantunala unitara. Da la vart da la pajataglias e dals pajataglias duai la transparenza vegnir augmentada ed uschia er la segirezza giuridica.

La missiva da la regenza n'era per gronda part betg contestada en la cumissiun. La suletta proposta da minoritad pertutga la taglia fracziunala.La regenza prevesa qua che la vischnanca possia delegar l'incassament da las taglias sin las entradas e sin la facultad a las fracziuns ch'èn structuradas sco corporaziuns territorialas per levgiar fusiuns da vischnancas, e quai per ina durada da 10 onns. Fracziuns existentas ch'èn structuradas sco corporaziuns territorialas e che incasseschan ina taglia sin las entradas e sin la facultad duain medemamain pudair cuntinuar cun quai per 10 onns. Questa proposta vegn sustegnida da la maioritad da la cumissiun. La proposta da minoritad pretenda percunter ch'i duai vegnir desistì d'ina limitaziun da temp, perquai che models da fracziun che funcziunan bain ozendi vegnian restrenschids qua tras en il futur nunnecessariamain en lur cumpetenzas.

Dal rest è la cumissiun suandada cumplainamain las propostas da la regenza ed ha la finala deliberà la missiva per mauns dal cussegl grond.

Persuna che dat infurmaziuns:
president da la cumissiun Ernst Nigg, tel. 081 307 36 36

Gremi: cumissiun per economia, taxas e politica da stadi
Funtauna: rg cumissiun per economia, taxas e politica da stadi