Il chantun Grischun vul rinforzar la protecziun d'uffants confidads.
La regenza ha en quest connex l'intenziun da reglar da nov las
cundiziuns generalas per la recepziun d'uffants confidads e da
suttametter l'intermediaziun d'uffants a plazzas da tgira ad
in'obligaziun da dumandar ina permissiun. La regenza ha deliberà per la
consultaziun il sboz correspundent per relaschar ina lescha davart la
recepziun d'uffants e da giuvenils per la tgira e per l'assistenza sco
er per l'adopziun posteriura.
Il motiv per las adattaziuns planisadas èn d'ina vart las revisiuns
da la legislaziun federala. Da l'autra vart fixescha la nova
constituziun chantunala che tut las disposiziuns impurtantas ston vegnir
relaschadas dal cussegl grond en furma d'ina lescha. Ina novaziun
essenziala da quest sboz da lescha è - per la protecziun dals uffants e
dals giuvenils - che l'intermediaziun tras persunas privatas a plazzas
da tgira u da plazzas da tgira per uffants e per giuvenils è da nov
suttamessa a l'obligaziun da dumandar ina permissiun.
La recepziun durant main che trais mais d'uffants e da giuvenils per
la tgira e per l'educaziun è medemamain suttamessa a l'obligaziun da
dumandar ina permissiun.
Ultra da quai prevesa il sboz che l'obligaziun existenta da dumandar
ina permissiun per la tgira e per l'assistenza d'uffants e da giuvenils
vegnia extendida dal 15avel onn da vegliadetgna al 18avel onn da
vegliadetgna. L'uffizi chantunal dal servetsch social vegn numnà sco
suletta autoritad da surveglianza per l'entir sectur da la tgira en
famiglia, da la tgira dal di e da la tgira en chasas. Medemamain è
l'uffizi dal servetsch social sco suletta autoritad centrala cumpetent
per la surveglianza da l'intermediaziun sco er per la recepziun
d'uffants e da giuvenils per l'adopziun posteriura. La finala vegnan
concretisads secturs che la confederaziun ha laschà averts en sia
ordinaziun, sco per exempel la cunfinaziun da la tgira en famiglia e da
la tgira en chasas.
La consultaziun dura fin ils 15 da settember 2006. Dals documents
pon ins prender invista sut www.jpsd.gr.ch.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun