Navigation

Inhaltsbereich

  • Erste Mitteilung
  • Neuen Beitrag einfügen
La gievgia ha pudì vegnir betunada l'ultima part da la platta dal vial, uschia ch'il traffic da viadi da stad po passar ussa durant las proximas trais emnas tras il tunnel dal San Bernardin sin tuts dus vials e senza impediments. Dapi il fanadur 2003 è la platta dal vial che ha ina lunghezza da 6'600 meters vegnida remplazzada en etappas emnilas da fin a 90 meters. Malgrà che las lavurs da reparaziun èn vegnidas interruttas durant la bloccada dal Gottard ha pudì vegnir ademplida la finamira da remplazzar tut la platta dal vial fin tar la pausa da stad.

Suenter la pausa da stad, quai vul dir a partir dals 21 d'avust 2006, vegnan fatgas ulteriuras lavurs da sanaziun vi dals arvieuts dal portal dal nord. Ultra da quai vegn montada ina isolaziun, i vegnan installads banchets ed i vegn messa la cuvrida sin il traject restant da 3 km a partir dal portal dal nord. Er questas lavurs chaschunan ch'i stat a disposiziun mo in vial per il traffic. Alura vegn montà l'equipament electro-mecanic. Il proxim onn èsi planisà da montar las plattas da paraid sco er da metter la cuvrida definitiva.

Persunas che dattan infurmaziuns:
Roger Stäubli, schef da la construcziun da vias (tel. 081 257 38 42)
Ruedi Waldburger, manader da la construcziun da las vias naziunalas (tel. 081 257 37 85)

Gremi: uffizi da construcziun bassa dal Grischun
Funtauna: rg uffizi da construcziun bassa dal Grischun
Neuer Artikel