La regenza ha refusà in recurs cunter la revisiun parziala da la lescha da construcziun da San Murezzan ed ha approvà l'extensiun da l'obligaziun da contingentaziun sin la zona da construcziun speziala Serletta. En il rom d'ina revisiun parziala da la lescha da construcziun aveva il suveran da San Murezzan concludì ils 27 da november 2005 tranter auter d'extender l'applitgabladad da l'ordinaziun per contingentar la construcziun d'abitaziuns secundaras dals 20 d'october 2005 sin tut il territori da construcziun da San Murezzan, pia er sin la zona da construcziun speziala Serletta. Cunter quai ha ina proprietaria da bains immobigliars pertutgada fatg recurs da planisaziun tar la regenza. Ella temeva che ses project per construir in'ulteriura residenza cun pliras abitaziuns secundaras en il territori da l'edifizi actual da la posta e da la swisscom en la via Serlas vegnia retardà per onns pervia da la contingentaziun. Cun refusar il recurs è la regenza suandada la ponderaziun dals interess da la vischnanca da San Murezzan: Che l'iniziativa cirquitala per contingentar la construcziun d'abitaziuns secundaras en Engiadin'ota vegnia realisada cun uschè paucas restricziuns sco pussaivel è per ella pli impurtant che l'interess privat da realisar abitaziuns secundaras uschè svelt sco pussaivel.

Deliberà ina nova incarica da prestaziun en il sectur da la promoziun da la sanadad e da la prevenziun
La regenza grischuna ha approvà l'incarica da prestaziun dal chantun Grischun al chantun Son Gagl en il sectur da la promoziun da la sanadad e da la prevenziun. Questa incarica circumscriva las prestaziuns che ston vegnir furnidas dal post spezialisà per la promoziun da la sanadad e per la prevenziun (ZEPRA) sco er sia indemnisaziun tras il chantun Grischun. La collavuraziun cun il chantun Son Gagl en il sectur da la promoziun da la sanadad e da la prevenziun è sa mussada sco cunvegnenta. Il post spezialisà ZEPRA Grischun vegn pia manà vinavant. A medem temp vegn extendida la purschida per vischnancas e per scolas. La finamira è da sustegnair las vischnancas tar la realisaziun da structuras professiunalas e d'intensivar la promoziun persistenta da la sanadad e la prevenziun persistenta.

Consultaziun davart l'adattaziun da la lescha federala davart la concurrenza illoiala
La regenza grischuna sustegna per part l'adattaziun da la lescha federala davart la concurrenza illoiala (LCI) ch'è planisada da la confederaziun. Tras la revisiun da la lescha duai vegnir cumbattì il marketing illoial dad "ambush"(er numnà marketing da parasit) e vegnir stgaffida ina nova disposiziun davart l'agid uffizial e davart l'assistenza giudiziala. La regenza grischuna refusa la nova regulaziun cunter il marketing illoial dad "ambush", e quai cun la motivaziun che la segirezza giuridica na vegnia betg meglierada fundamentalmain e che la concurrenza vegnia ultra da quai restrenschida. La regenza sustegna dentant l'introducziun da las novas disposiziuns davart l'agid uffizial e davart l'assistenza giudiziala. Uschia vegn serrada ina largia impurtanta en la lescha existenta. Las novas disposiziuns permettan da collavurar en moda pli effizienta en il cumbat cunter praticas da fatschenta transcunfinalas ed illoialas. Il motiv direct per las midadas da la LCI che vegnan proponidas è la realisaziun dal campiunadi europeic da ballape 2008 respectivamain ina intervenziun correspundenta da l'uniun da las associaziuns europeicas da ballape (UEFA).

Da vischnancas e regiuns
- Arosa: Il plan da zonas e plan general da furmaziun 1:1'000 dals 18 d'avrigl 2006 vegn approvà.
- Ramosch: La constituziun dal circul da Ramosch dals 21 da matg 2006 vegn approvada.
- Morissen: La revisiun parziala da la constituziun communala, ch'è vegnida concludida ils 9 da zercladur 2006, vegn approvada.
- Sumvitg: La midada dal plan da zonas 1:1'000 dals 26 da matg 2006 vegn approvada cun differentas ordinaziuns.
- Seewis: Il plan da zonas parzial 1:1'000 vegn approvà.
- Lumbrein: Il plan da zonas 1:2'000, ch'è vegnì concludì ils 4 da zercladur 2004, vegn approvà.
- Seglias: La revisiun parziala da la constituziun communala, ch'è vegnida concludida ils 27 da zercladur 2006, vegn approvada.
- Scuol - Sent: Ils plans dal cunfin da vischnanca Scuol - Sent, part 1, e Scuol - Sent, part 2, vegnan approvads.
- San Murezzan: La planisaziun d'utilisaziun "edifizi dal stadion", che sa referescha al project e ch'è vegnida concludida ils 12 da favrer 2006, en spezial la revisiun parziala da las prescripziuns tar il plan general da furmaziun "parc Kulm", sco er il plan general da furmaziun 1:1'000 "parc Kulm" (revisiun parziala en il territori dal "edifizi dal stadion") vegnan approvads cun ina resalva e cun ina cundiziun.
- Schluein: Il reglament per las zonas da protecziun ed il plan da las zonas da protecziun a la scala 1:5'000 vegnan approvads.
- Trimmis e Says: A las vischnancas da Trimmis e da Says vegn concedida ina contribuziun da 677'500 francs als custs cun dretg da contribuziun per augmentar la capacitad da la serenera.
- Mon: A la vischnanca da Mon vegn garantida ina contribuziun pauschala da 66'200 francs als custs cun dretg da contribuziun per engrondir il provediment d'aua.
- Tenna: A la vischnanca da Tenna vegnan concedids 357'000 francs als custs cun dretg da contribuziun per renovar e per engrondir il stabiliment dal provediment d'aua.
- Cuira, Haldenstein, Vaz sut, Zizers: Cun resalva da la garanzia da subvenziun tras la confederaziun vegnan concedids 837'000 francs per dustanzas dal Rain.
- Churwalden: Il project per dustanzas da la Rabiosa, dal Riedbach e dal Salezerbächli sin il territori da la vischnanca da Churwalden vegn approvà cun cundiziuns e cun ina contribuziun da maximalmain 875'000 francs als custs.
- Fläsch: La 2. etappa da subvenziun dal project per la dustanza da la Lochrüfe sin il territori da la vischnanca da Fläsch vegn approvada cun ina contribuziun da 124'000 francs als custs.
- Favugn: Il project per ovras da protecziun "Favugn" da la vischnanca da Favugn vegn approvà. Als custs cun dretg da subvenziun vegn garantida ina contribuziun da 24'200 francs.
- Vaz: A Lai sin la Voa Gravas vegn fixada la sveltezza maximala a 30 km/h ed introducida ina "zona da tempo 30".
- Pasqual: En il vitg da Pasqual vegn fixada la sveltezza maximala a 30 km/h ed introducida ina "zona da tempo 30", e quai integrond la via chantunala. Tar l'entrada dal vitg nà dal nord vegn a medem temp spustada la limita generala da 50 km/h e remplazzada tras la sveltezza da 60 km/h.
- Mustér: A Mustér vegn fixada la sveltezza maximala a 30 km/h ed introducida ina "zona da tempo 30", e quai integrond la via sursilvana, la via Alpsu e la via dal Lucmagn.

Contribuziuns chantunalas a differentas instituziuns
- Malauras 2005: Las lavurs da reparaziun da las malauras 2005, regiun Engiadina e Bravuogn sin il territori da las vischnancas da Lavin, da Samignun, da Susch e da Bravuogn, vegnan approvadas cun ina contribuziun da 260'000 francs als custs.

Projects da vias
La regenza ha approvà var 10'000'000 francs per construir e per sanar ils suandants trajects da via:
- via naziunala A13: tunnel dal San Bernardin
- via naziunala A13: tunnel Isla Bella
- via naziunala A13: punt dal Rain posteriur a La Punt
- via naziunala A28: sviament da Saas, Trun - Pagrüeg
- via da l'Engiadina: Nairs - access Scuol vest

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun