Navigation

Inhaltsbereich

  • Erste Mitteilung
  • Neuen Beitrag einfügen
La lescha da taglia vertenta duai vegnir revedida. Ils puncts principals da la revisiun parziala èn distgargias fiscalas per las persunas giuridicas, per ils conjugals e per las famiglias sco er la liberaziun da la taglia sin l'ierta per la descendenza directa.
La regenza grischuna ha deliberà la missiva per ina revisiun parziala cumplessiva da la lescha chantunala da taglia. Il cussegl grond vegn a tractar il project en la sessiun d'october. En il center dal project stattan investiziuns en il Grischun sco lieu fiscal e distgargias fiscalas per conjugals e per famiglias.
La grevezza fiscala da las persunas giuridicas (societads anonimas e.u.v.) - ch'è la pli gronda da l'entira Svizra - duai vegnir reducida considerablamain. Il maximum da la taglia sin il gudogn vegn smesà e fixà da nov a 7.5 pertschient, la taxa speziala sin il chapital vegn abolida. Questas correcturas èn necessarias per mantegnair plazzas da lavur existentas en il Grischun e per facilitar investiziuns novas e na duain betg forsa instigar vinavant la concurrenza fiscala interchantunala, mabain mo cumpensar in dischavantatg da concurrenza existent.
Er a las persunas natiralas pon vegnir concedidas distgargias fiscalas cumplessivas. Ultra dals conjugals e da pajataglias cun uffants duain vegnir distgargiadas cunzunt er persunas cun entradas fitg pitschnas. Il splitting parzial cun in divisur dad 1.9 chaschuna ina distgargia adequata dals conjugals en cumparegliaziun cun las persunas che vivan sulettas. Tras quai po la deducziun da famiglia vegnir stritgada e la deducziun per conjugals cun in'activitad da gudogn dubla po vegnir reducida considerablamain.
Pajataglias cun uffants vegnan distgargiads tras in augment considerabel da las deducziuns per uffants. Las deducziuns per uffants dad actualmain 3'400 francs vegnan augmentadas sin 5'000 francs per uffants da la vegliadetgna prescolara e sin 8'000 francs per uffants pli vegls. Per uffants che vivan durant l'emna en in lieu da scolaziun d'ordaifer importa la deducziun per uffants da nov 14'000 francs. Plinavant vegn la deducziun per ils custs effectivs da la tgira d'uffants augmentada e fixada sin maximalmain 6'000 francs.
Cun stritgar la taxa speziala sin la facultad sco er cun liberar la descendenza directa da la taglia sin l'ierta e da la taglia sin donaziuns pon vegnir eliminads dischavantatgs dal Grischun en cumparegliaziun cun ils auters chantuns. Tras quai duai vegnir evità che pajataglias bainstants bandunan il chantun.
Areguard ils custs per il mantegniment da l'immobiglia duain las pajataglias ed ils pajataglias pudair tscherner da nov per mintga perioda fiscala e per mintga immobiglia tranter la deducziun dals custs effectivs e tranter ina deducziun pauschala (l'uschenumnada pauschala alternanta).
La valur da l'atgna locaziun po chaschunar problems da liquiditad là, nua che ses import è fitg grond en relaziun cun las entradas en daner blut. Pertutgadas da quai èn cunzunt persunas pensiunadas che vivan en ina gronda atgna chasa e che han mo paucas entradas. Per quests cas duai vegnir limitada l'autezza da la valur da l'atgna locaziun.
Las differentas mesiras vegnan a chaschunar entradas pli pitschnas per il chantun, per las vischnancas e per las baselgias, e quai en ina dimensiun da circa 87 milliuns francs per il chantun e da circa 58 milliuns francs per las vischnancas (incl. ils cumins-baselgia). La regenza è persvadida che questa revisiun parziala è necessaria, sch'il Grischun vul - cumpareglià cun ils auters chantuns - puspè daventar cumpetitiv sco plazza economica ed er sco lieu d'abitar.

Persuna che dat infurmaziuns:
cussegliera guvernativa dr. Eveline Widmer-Schlumpf, scheffa dal departament da finanzas e militar, telefon 081 257 32 01

Gremi: regenza
Funtauna: rg chanzlia chantunala dal Grischun
Neuer Artikel