Navigation

Inhaltsbereich

  • Erste Mitteilung
  • Neuen Beitrag einfügen
En il Grischun vegnan intensivadas la collavuraziun e la coordinaziun en l'agid per la giuventetgna. Per quai ha la regenza grischuna relaschà in'ordinaziun davart la collavuraziun e davart la coordinaziun en l'agid per la giuventetgna che entra en vigur il 1. da schaner 2007. Ina cumissiun per la protecziun da l'uffant e per l'agid per la giuventetgna ch'è vegnida installada da nov surpiglia la coordinaziun en quest sectur. La gestiun da la cumissiun, a la quala appartegnan maximalmain nov commembras e commembers, vegn surdada a l'uffizi chantunal dal servetsch social.
L'incumbensa da la cumissiun nova è d'elavurar la basa per la collavuraziun coordinada tranter las autoritads e tranter ils posts che s'occupan per l'ina da la protecziun da l'uffant sut l'aspect dal dretg civil e per l'autra dal dretg penal per giuvenils e da l'ulteriur agid per la giuventetgna. Latiers tutgan las autoritads penalas da giuventetgna, ils uffizis da servetsch social per giuvenils, las avugadias uffizialas, las autoritads d'educaziun, d'assistenza e da polizia sco er ils posts da surveglianza d'uffants confidads. Ultra da quai giuditgescha la cumissiun l'opportunitad da relaschs sin il champ da l'agid per la giuventetgna. En il senn d'in post spezialisà duai la cumissiun er s'occupar da dumondas generalas da l'agid legal per la giuventetgna sco er dals svilups e dals trends en il sectur da la protecziun da l'uffant. Il catalog d'incumbensas da la cumissiun cuntegna tranter auter er las incumbensas da la cumissiun per la protecziun da l'uffant ch'existiva gia e che vegn pervia da quai schliada.
Ultra da quai è il departament d'educaziun, cultura e protecziun da l'ambient vegnì incumbensà da designar in post da consultaziun per dumondas da la giuventetgna. Sin plaun chantunal manca en l'administraziun actualmain in post che sa dar infurmaziuns generalas davart dumondas da la giuventetgna a persunas interessadas. Tar las incumbensas da quest post da consultaziun tutgi da dar infurmaziuns en il sectur da dumondas generalas da la giuventetgna sco er da prender encunter giavischs e d'als renviar als posts cumpetents.

Per la regenza sto l'ordinaziun davart las telefericas anc vegnir repassada
Tenor la regenza grischuna sto l'ordinaziun davart meds da transport a suga ch'è vegnida tramessa en consultaziun anc vegnir repassada ed adattada. La necessitad da relaschar in'ordinaziun tar la nova lescha davart las telefericas - che sa chatta actualmain anc en la discussiun parlamentara finala - n'è betg contestada. L'ordinaziun davart meds da transport a suga cuntegna disposiziuns ch'èn necessarias per exequir la lescha davart las telefericas. Las prescripziuns da basa sa chattan en la lescha davart las telefericas sezza. Ord vista da la regenza sto l'ordinaziun davart meds da transport a suga vegnir repassada ed adattada en divers secturs. Quai pertutga en spezial la coordinaziun da la procedura federala d'approvaziun dal plan per telefericas sco talas d'ina vart e las proceduras chantunalas per eventuals stabiliments accessorics sco pistas da skis, indrizs d'ennavar e stabiliments da parcar da l'autra vart. I sto vegnir impedì che decisiuns cuntradictoricas u nuncoordinadas vegnian prendidas. In ulteriur basegn da regulaziun exista plinavant en reguard a la coordinaziun da la procedura d'approvaziun dal plan per telefericas e per las proceduras chantunalas dal plan directiv e dal plan d'utilisaziun ch'èn necessarias e che ston vegnir fatgas l'emprim. Tar questa dumonda sa mussian gia ussa cruschadas da las cumpetenzas scriva la regenza en sia consultaziun a la confederaziun.

Il Grischun n'è betg perencletg cun la nova clav da repartiziun per persunas cun ina dimora per in onn e cun ina dimora curta
Per la regenza grischuna n'è la nova clav da repartiziun per persunas cun ina dimora per in onn e cun ina dimora curta betg acceptabla en la furma che vegn proponida da la confederaziun. En l'ordinaziun davart la limitaziun dal dumber da las estras e dals esters (OLE) fixescha il cussegl federal annualmain ils dumbers maximals per forzas da lavur da stadis che n'èn betg commembers da la UE u da la AECL. Sin giavisch da divers chantuns propona il cussegl federal ussa ina nova clav da repartiziun. La repartiziun vegn fatga da nov en relaziun cun las persunas ch'èn occupadas en mintga chantun. Per il chantun Grischun ha quai la consequenza ch'i stattan a disposiziun mo pli 64 - empè da 402 - unitads da contingent per persunas cun ina dimora curta. Ditg cun procentualas vegn il contingent per persunas cun ina dimora curta tenor la OLD scursanì per 84 pertschient. Sco che la regenza scriva a la confederaziun ston ins dentant far quint ch'il basegn da forzas da lavur da terzs stadis en la branscha turistica vegn a s'augmentar pervi dals segns positivs en questa branscha.
Tenor la regulaziun vertenta vegnan las forzas da lavur - che interpresas estras dal territori da la UE/AECL tramettan en Svizra per pli ditg che 90 dis per onn chalendar - messas a quint al contingent tenor la OLE. La regenza propona da metter a quint questas forzas da lavur en il futur al contingent da la UE/AECL che ha ina dotaziun bler pli gronda. Quest proceder mitigiass il problem per la gronda part dals chantuns. Sco alternativa propona la regenza d'applitgar da princip la nova clav da repartiziun, però da tschertgar ina regulaziun speziala cun quels chantuns muntagnards e turistics che vegnan en difficultads pervia da la nova repartiziun. Questa regulaziun pudess per exempel prevair ch'ils chantuns muntagnards e turistics pudessan mantegnair almain 50 pertschient da lur contingent vertent, e quai malgrà l'applicaziun da la nova clav da repartiziun.

Contribuziuns chantunalas a differentas instituziuns
- Club alpin svizzer: Per renovar e per engrondir la chamona da Terri survegn la secziun Piz Terri dal club alpin svizzer ina contribuziun da maximalmain 40'900 francs or dal fond da sport.
- Associaziun puschlavina da battasendas: Per construir ina nova chamona da battasenda survegn l'associaziun puschlavina da battasendas ina contribuziun da maximalmain 100'000 francs or dal fond da sport.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun
Neuer Artikel