La regenza grischuna ha approvà las concessiuns dals dretgs da las
auas per las ovras electricas idraulicas da la part sura dal Puschalav.
Uschia pon las ovras existentas da la Rätia Energie (RE) vegnir manadas
vinavant durant ulteriurs 80 onns. Cun las concessiuns approvadas vegn
concedida a la RE ultra da quai in'opziun che permetta d'amplifitgar las
ovras electricas.
Ils 2 da fanadur 1997 respectivamain ils 8 da settember 1998 han las
vischnancas da Puschlav e da Puntraschigna concedì a la RE novas
concessiuns per las ovras electricas idraulicas da la part sura dal
Puschlav. Quellas cuntegnan d'ina vart la cuntinuaziun dal manaschi da
l'implant existent sco tal e da l'autra vart ils projects da renovaziun
e d'amplificaziun. Ils projects da renovaziun e d'amplificaziun
cumpiglian essenzialmain l'engrondiment dal volumen d'utilisaziun dal
Lago Bianco tras la construcziun da dus mirs da fermada e
correspundentamain tras in'accumulaziun pli auta dal lai, la
construcziun nova da las ovras electricas Cavaglia II e Robbia II sco er
la construcziun da la centrala sutterrana da gulivaziun Prairol.
Mesiras per proteger l'ambient
Per il nov concessiunament èn stads necessaris scleriments extendids
areguard l'ambient. En quest connex ha la RE concludì da realisar ina
planisaziun da protecziun e d'utilisaziun. Quella permetta - sin
fundament da mesiras da cumpensaziun ecologicas correspundentas en la
planira da Cavaglia e tar Angeli Custodi - in augment da l'utilisaziun
da l'aual Pila e dal Cavagliasch. La planisaziun da protecziun e
d'utilisaziun è vegnida approvada dal cussegl federal il cumenzament da
l'onn. Ultra da quai prenda la RE numerusas mesiras per proteger
l'ambient en la dimensiun da ca. 1,8 milliuns francs. Quellas reguardan
tranter auter la colliaziun da differentas auas pitschnas sut
Annunziata, l'installaziun da biotops e da stgalas da peschs,
correcziuns ecologicas en il sectur da la sbuccada dal Poschiavino sco
er la revitalisaziun da regiuns umidas. La protesta da differentas
organisaziuns da la protecziun da l'ambient vegn refusada, uschenavant
ch'ella n'è betg vegnida obsoleta sin fundament d'adattaziuns dal
project.
Cuntinuaziun dal manaschi e project d'amplificaziun
Las ovras electricas da la part sura dal Puschlav sa cumponan da
trais stgalims dad ovras electricas che han - sch'i vegn cuntinuà cun il
manaschi - ina prestaziun da la turbina installada da 43 megawatt (MW)
ed ina prestaziun da la pumpa da 3 MW. Resguardond la nova regulaziun da
l'aua restanta importa la producziun annuala da las ovras en media ca.
130 milliuns uras kilowatts. Quai correspunda a var 1,7 pertschient da
la producziun annuala totala dal Grischun. L'applicaziun da las
directivas vertentas da la lescha federala davart la protecziun da las
auas chaschuna a la RE, cumpareglià cun il manaschi tenor il dretg vegl,
ina sperdita da producziun da 9,6 pertschient. Senza la planisaziun da
protecziun e d'utilisaziun fiss la sperdita anc pli gronda. Cun il
project d'amplificaziun po la prestaziun da la turbina percunter vegnir
augmentada a 192 MW e la prestaziun da la pumpa a 114 MW. La media
annuala da la producziun d'energia prognostitgada vegn augmentada a 206
milliuns uras kilowatt. Ultra da quai po la producziun vegnir spustada
per gronda part da la stad sin l'enviern ed uschia vegnir adattada
meglier als basegns da las consumentas e dals consuments.
Indemnisaziuns impurtantas per las vischnancas e per il chantun
Perquai ch'il chantun e las vischnancas renunzian da laschar
returnar dals implants electrics en lur posses, paja la RE al chantun ed
a las vischnancas concessiunarias 23 milliuns francs. Vitiers vegnan
prestaziuns annualas regularas a las vischnancas ed al chantun, en
spezial en furma da tschains d'aua e da taglia sin implants idraulics da
mintgamai var 900'000 francs, sch'i vegn cuntinuà cun il manaschi sco
fin ussa, e dad 1,1 milliuns francs, sche las ovras vegnan
amplifitgadas. Ultra da quai po l'energia vegnir furnida per cundiziuns
da preferenza. Per l'utilisaziun dal Lago Bianco survegn la vischnanca
da Puntraschigna in tschains d'utilisaziun annaual da ca. 78'000 francs,
sch'i vegn cuntinuà cun il manaschi sco fin ussa resp. da 178'000
francs, sche las ovras vegnan amplifitgadas.
Persunas che dattan infurmaziuns:
- cusseglier guvernativ Stefan Engler, schef dal departament da
construcziun, traffic e selvicultura dal Grischun, tel. 081 257 36 01
- Werner Böhi, manader da l'uffizi d'energia, tel. 081 257 36 21
Gremi: regenza
Funtauna: rg chanzlia chantunala dal Grischun